Polşadan Ukraynaya təklif!

Bakı:

24 °C

64 %

3 m/s

Əlaqə

AZ RU EN

Ana səhifə / Xəbər lenti / Polşadan Ukraynaya təklif!

Polşadan Ukraynaya təklif!

22.09.2023 [11:44]

Taxıl ixracına kömək edəcəyik, ancaq...

Polşa Ukrayna taxılının ixracı ilə əlaqədar Kiyevlə danışıqlar aparmaq niyyətindədir. Bu barədə Polşanın kənd təsərrüfatı naziri Robert Telus açıqlama verib. Nazir qeyd edib ki, Polşa tərəfi taxıla tətbiq edilən embarqo ilə bağlı problemin həlli üçün Ukrayna ilə danışıqlara hazırdır. O, yerli kanala müsahibəsində bildirib: “Biz belə danışıqları gözləyirik və belə danışıqların baş tutmasına hazırıq.

Telusun sözlərinə görə, Polşa tranzitlə bağlı Ukraynaya kömək etmək istəyir. Lakin nazir qeyd edib ki, bu, Polşa fermerlərinin hesabına olmamalıdır. Onun fikrincə, hər şey ümumi həll yolunun tapılması istiqamətində düzgün istiqamətdə gedir.

Qeyd edək ki, Polşa Ukraynadan taxıl ixracına qadağa qoymuşdu. Buna cavab olaraq, Ukrayna da Polşadan soğan, pomidor, kələm və almaya embarqo tətbiq edib. Polşanın baş naziri Mateuş Moravetski isə Ukraynaya daha silah tədarük etməyəcəklərini açıqlayıb.

Mövzunu “Yeni Azərbaycan”a şərh edən politoloq Turan Rzayev bildirib ki, Rusiyanın “Taxıl sazişi”ndən çıxması fonunda regionda taxılın ixracı məsələsində müəyyən problemlər yaranıb. Onun sözlərinə görə, bu baxımdan, alternativ dəhlizlərin yaradılması təklifləri əvvəllər də var idi.

Məqsəd taxıl böhranından çıxış yolunun tapılmasıdır

Politoloqun qənaətincə, Polşanın belə bir təklif irəli sürməsi Ukrayna taxılının Avropa bazarına çıxarılması istiqamətində bir addımdır: “Nəzərə almaq lazımdır ki, artıq taxılın yay biçimi bitib və satış məsələsi gündəmdədir. Əgər vaxtında satış olmasa, dünya bazarında un məmulatlarının qiymətinin kəskin artımasına gətirib çıxara bilər. Bu da Avropa bazarında ciddi problemlərin yaranması deməkdir. Qarşıdan qış ayları gəlir və Rusiyanın Avropaya qaz nəqli məsələsi yenidən enerji böhranına səbəb ola bilər, qiymət artımları riskini nəzərə almaq lazımdır. İndiki məqamda Rusiya həm taxıl, həm də enerji üzərindən Qərbə təzyiq etməyə çalışır. Polşa isə ən azından taxıl üzərindəki təzyiqləri azaltmaq üçün belə bir təklif irəli sürüb. Bu təklifin nə dərəcədə uğurlu olacağını isə indidən söyləmək çətindir. Aydın məsələdir ki, məqsəd Avropa bazarının taxıl ehtiyacının ödənilməsi və taxıl böhranından çıxış yolunun tapılmasıdır.

Qiymət artımına səbəb olacaq

Politoloq Polşanın belə addım atacağı təqdirdə bu durumun qiymətlərin artmasına səbəb olacağını vurğulayıb: “Çünki Ukrayna özü birbaşa limanlarla, yəni dəniz yolu ilə taxılını rahat və təhlükəsiz şəkildə ixrac edirdi. Belə olduqda isə daşınma xərclərinin sayı azalırdı. Amma Polşa üzərindən taxıl ixracının olması təbii ki, xərcləri artıracaq və bu durum yeni qiymət artımlarına gətirib çıxaracaq”.

Yeganə BAYRAMOVA

Paylaş:

Baxılıb: 696 dəfə