Xankəndidə Azərbaycan işığı

Bakı:

26 °C

70 %

2 m/s

Əlaqə

AZ RU EN

Ana səhifə / Xəbər lenti / Xankəndidə Azərbaycan işığı

Xankəndidə Azərbaycan işığı

26.09.2023 [11:00]

MÜBARİZ

Bir gün ərzində uğurla tamamlanan antiterror tədbirləri mühüm nəticələrə yol açmaqdadır. Ölkəmizin şərtləri əsasında əldə olunan razılaşmaya uyğun olaraq, 2023-cü il sentyabrın 21-də Yevlax şəhərində Azərbaycan Respublikasının Qarabağ bölgəsində yaşayan erməni sakinlərin nümayəndələri ilə keçirilmiş görüşdə müzakirə edilən məsələlərin həlli istiqamətində təxirəsalınmaz işlər davam etdirilir. Xəbər verildiyi kimi, görüş zamanı erməni tərəfi bağça və məktəblərin istilik sistemləri, təcili tibbi yardım və yanğınsöndürmə xidmətlərinin ehtiyacları təmin olunmaqla yanacağın təchiz edilməsini və humanitar dəstəyin həyata keçirilməsini xahiş etmişdi. Ölkəmizin qısa müddətdə hazırladığı reinteqrasiya proqramı görüşdə qarşı tərəfə təqdim olunub. Proqramda, həmçinin Qarabağda yaşayan erməni əsilli sakinlərin humanitar ehtiyaclarının qarşılanması da yer alıb və bu istiqamətdə müxtəlif səpkili tədbirlərin görülməsi nəzərdə tutulub.

Artq respublikamız qeyd olunan istiqamətlərdə tədbirlərin həyata keçirilməsinə start verib. Sentyabrın 22-də hər birinin tutumu 20 ton ərzaq məhsulları və gigiyenik vasitələr, eləcə də iki çörək dolu maşın Xankəndiyə yola salınıb. Yük karvanı hazırda açıq olan Ağdam-Xankəndi yolundan istifadə edilməklə təyinat yerinə çatdırılıb. Humanitar karvan təyinat nöqtəsinə çatdıqdan sonra əhaliyə paylanılıb.

Eyni zamanda, Azərbaycanın mərkəzi hakimiyyəti Qarabağ bölgəsinin erməni sakinləri üçün yanacaq göndərib. Dövlət Neft Şirkətinə (SOCAR) məxsus yanacaqla dolu 2 nəqliyyat vasitəsi Ağdam-Əsgəran-Xankəndi yolu ilə yola salınıb. Yükə 24 ton Aİ 92 markalı benzin, 40 ton dizel yanacağı daxildir. Yanacaq ilk növbədə bağçalar, təcili tibbi yardım və yanğınsöndürmə xidmətlərinə paylanılması üçün nəzərdə tutulur.

Bəhs olunan görüşdə müzakirə edilən məsələlərin həlli istiqamətində daha bir təxirəsalınmaz tədbir reallaşdırılıb. Prezident Administrasiyasının məlumatına əsasən, növbəti addım olaraq, Xankəndi şəhərinin Ermənistanın enerji sistemindən ayrılaraq Azərbaycan enerji sisteminə qoşulması təmin edilib.

Qeyd edək ki, hələ 2021-ci ildə “Azərenerji” tərəfindən tikilən və Prezident İlham Əliyevin iştirakı ilə istifadəyə verilən “Şuşa” yarımstansiyasında Xankəndi üçün ehtiyat yuvalar quraşdırılmışdı. 2023-cü il sentyabrın 19-dan etibarən “Azərenerji” tərəfindən “Şuşa” yarımstansiyası yaxınlığında əlavə 110 kV-luq yüksək gərginlikli dayaqların quraşdırılmasına və Xankəndi xətti ilə əlaqələndirilməsi işinə başlanılıb. Aparılan işlər nəticəsində artıq proses yekunlaşıb. Paralel olaraq “Azərenerji” və “Azərişıq” əməkdaşları ötürücü və paylayıcı şəbəkəni, mühafizə sistemlərini təftiş etdikdən sonra xəttə gərginlik verilib. Beləliklə, artıq Xankəndidə Azərbaycan işığı yanır.

Göründüyü kimi, Azərbaycanın bir gün ərzində uğurla həyata keçirdiyi antiterror tədbirlərinin nəticəsi olaraq regionda sülhün və təhlükəsizliyin təmin olunması üçün real imkanlar yaranıb. Artıq reinteqrasiyanın qarşısını alacaq süni maneələr aradan qalxıb. Qarabağda yaşayan ermənilərin Azərbaycan cəmiyyətinə reinteqrasiya məsələləri ölkəmizin qarşıya qoyduğu hədəflər sırasında yer alır. Qalib Azərbaycan ölkə qanunlarına riayət edəcək hər bir şəxsi vətəndaşlığa qəbul etməyə hazır olduğunu bəyan edib. Bu isə Azərbaycanın mühüm humanizm nümayişidir.

Paylaş:

Baxılıb: 655 dəfə