Zəfər Günü mədəniyyət ocaqlarımızda

Bakı:

28 °C

65 %

3 m/s

Əlaqə

AZ RU EN

Ana səhifə / Xəbər lenti / Zəfər Günü mədəniyyət ocaqlarımızda

Zəfər Günü mədəniyyət ocaqlarımızda

03.11.2023 [11:54]

M.BAYRAMLI

Zəfər Günü münasibətilə paytaxtda və bölgələrdə silsilə tədbirlər keçiriləcək. Xalqımızın Zəfər Gününü xoş keçirməsi üçün bir-birindən maraqlı konsert proqramları və tamaşaların nümayişi nəzərdə tutulub.

Noyabrın 8-də Beynəlxalq Muğam Mərkəzində konsert proqramı təqdim olunacaq. Zəfər gününə həsr olunmuş konsert, eyni zamanda mərkəzin fəaliyyətə başlamasının 15 illiyinə həsr edilən silsilə tədbirlər çərçivəsində keçirilir. Proqramda BMM-nin solistləri, Əməkdar artistlər Təyyar Bayramov, Bəyimxanım Vəliyeva, Arzu Əliyeva və xanəndə Hüseyn Məlikov çıxış edəcəklər. Xanəndələri Rövşən Qurbanov (tar), Ceyhun Muradov (kamança), Əməkdar artist Təranə Əliyeva (qanun), Vasif Yusibli(ud), Amil Mustafayev (nağara), Rafael Əsgərov (balaban) müşayiət edəcək. Konsertə giriş isə sərbəstdir.

Mədəniyyət ocaqlarımız – teatrlarımız da bu tarixi günə xüsusi hazırlaşırlar. Bayram ərəfəsində igidlərimizin qəhrəmanlıqlarından bəhs edən tamaşalar nümayiş etdiriləcək. Belə ki, Azərbaycan Dövlət Akademik Milli Dram Teatrında sözügedən tarixdə İlyas Əfəndiyevin “Hökmdar və qızı” pyesi əsasında hazırlanmış “Qarabağnamə” tamaşası təqdim olunacaq. Eləcə də Zəfər Musiqi və Teatr Festivalı Çərçivəsində Konsert proqramı gözlənilir. Proqramda Azərbaycan bəstəkarlarının əsərləri səslənəcək.

Azərbaycan Dövlət Gənc Tamaşaçılar Teatrında isə “Yarımçıq qalmış” tamaşa nümayiş olunacaq. Bundan başqa, teatrın səhnəsində yazıçı-dramaturq İlqar Fəhminin eyniadlı əsəri əsasında hazırlanan “Balaca kişilər” tamaşası da təqdim ediləcək.

Məlum olduğu kimi bu günlərdə Mədəniyyət Nazirliyinin təşkilatçılığı ilə “Zəfər” musiqi və teatr festivalı keçirilir. Festival Bakı şəhəri ilə yanaşı Gəncə və Sumqayıt şəhərlərinin, İsmayıllı, Biləsuvar, Sabirabad, Xaçmaz rayonlarının bir sıra mədəniyyət ocaqlarında tarixi qələbəmizə həsr olunmuş silsilə tədbirlərlə davam edir. Festival çərçivəsində bədii kollektivlərin və solistlərin iştirakı ilə rəngarəng proqramlar, bəstəkarlarımızın tarixi zəfərimizə həsr etdiyi simfonik əsərlərdən və vokal-xor nömrələrindən ibarət konsert, vətən müharibəsindəki şanlı qələbəmizə həsr olunmuş tamaşalar, muğam axşamı və digər mədəni tədbirlərin təşkili nəzərdə tutulub. Festival çərçivəsində Kukla Teatrı noyabrın 8-də Vətən müharibəsi şəhidlərinin əziz xatirəsinə həsr olunan “Yeddi nar çubuğu” tamaşasını hazırlayıb. Azərbaycan xalq nağılının motivləri əsasında hazırlanan tamaşanın saat 12:00 seansı yalnız şəhid övladları üçün təşkil olunub.

Habelə Şuşa Dövlət Musiqili Dram Teatrı Zəfər Günündə “Dəmir Yumruq” adlı ədəbi-bədii kompozisiya ilə çıxış edəcək.

Paylaş:

Baxılıb: 693 dəfə