EKO üçün nümunəvi ölkə

Bakı:

28 °C

47 %

3 m/s

Əlaqə

AZ RU EN

Ana səhifə / Xəbər lenti / EKO üçün nümunəvi ölkə

EKO üçün nümunəvi ölkə

14.11.2023 [11:38]

İnamlı inkişaf templərinə malik olan Azərbaycan bütün parametrlər baxımından EKO üçün nümunəvi ölkə sayıla bilər. Son 20 il ərzində bütün dünyada Azərbaycan kimi dinamik iqtisadi inkişaf göstəricilərinə malik olan ölkələrin sayı çox azdır. Ardıcıllıqla aparılan islahatlar sayəsində respublikamız özünün iqtisadi və bu əsasda siyasi müstəqilliyini tam təmin edib. Bu gün ölkəmiz heç bir beynəlxalq maliyyə qurumundan asılı deyil, əksinə özü başqa coğrafiyalarda böyük həcmlərdə investisiyalar yönəltməklə bir sıra irimiqyaslı layihələr reallaşdırır. Azərbaycanın moderatorluğu ilə həyata keçirilən enerji və nəqliyyat layihələri həm regional, həm də qlobal əhəmiyyət daşıyır. Son 20 il ərzində Azərbaycan iqtisadiyyatına 310 milyard ABŞ dolları həcmində sərmayə qoyulub və bunun 200 milyard dolları qeyri-neft sektorunun payına düşür. Bu, ölkəmizdə olan münbit sərmayə iqliminin nəticəsidir.

Güclü dövlət olan Azərbaycanın 2020-ci ildə Vətən müharibəsini Zəfərlə başa vurması və bunun nəticəsi olaraq ərazi bütövlüyünü, 2023-cü ildə isə Qarabağda suverenliyini təmin etməsi də EKO dövlətləri üçün bir qürur mənbəyidir. Bildirldiyi kimi, Ermənistan Azərbaycanın 20 faizə yaxın ərazisini təqribən 30 il ərzində işğal altında saxlamışdı. Ermənistanın həyata keçirdiyi etnik təmizləmə siyasəti nəticəsində bir milyondan artıq azərbaycanlı öz dədə-baba yurdlarından qovulmuş, qaçqın və məcburi köçkünə çevrilmişdir. 2020-ci ildə Azərbaycan BMT Nizamnaməsindən irəli gələn legitim özünümüdafiə hüququndan istifadə edərək Vətən müharibəsində Ermənistanı döyüş meydanında məğlubiyyətə uğratdı və BMT Təhlükəsizlik Şurasının 1993-cü ildə qəbul etdiyi və 27 il ərzində kağız üzərində qalmış dörd qətnamənin icrasına özü nail oldu. İşğal dövründə Ermənistan Azərbaycanın doqquz şəhərini və yüzlərlə kəndini yer üzündən silib, İslam dininə məxsus mədəni və tarixi irsimizi dağıdıb və təhqirlərə məruz qoyub. O cümlədən 67 məsciddən 65-i dağıdılıb, qalanları isə inək və donuz saxlanılması üçün tövlə kimi istifadə olunub. Prezident İlham Əliyev EKO Zirvə toplantısındakı çıxışında Azərbaycanın Qarabağda suverenliyini tam təmin etməsinə də diqqət çəkərək vurğulayıb: “Bu il sentyabrın 19-20-də keçirilmiş birgünlük antiterror əməliyyatı nəticəsində Azərbaycan Qarabağdakı qanunsuz separatçı rejimin mövcudluğuna son qoydu və özünün beynəlxalq səviyyədə tanınmış əraziləri üzərində suverenliyini tam bərpa etdi. Biz ərazi bütövlüyümüzü və suverenliyimizi güc yolu ilə, beynəlxalq hüquqa və BMT Nizamnaməsinə uyğun olaraq bərpa etmişik və bununla qürur duyuruq.

Mən bu tarixi Qələbə münasibətilə Azərbaycanı təbrik edən ECO-nun üzv dövlətlərinə təşəkkürümü bildirirəm”.

Mübariz

Paylaş:

Baxılıb: 634 dəfə