Daha 2 gün...

Bakı:

23 °C

52 %

4 m/s

Əlaqə

AZ RU EN

Ana səhifə / Xəbər lenti / Daha 2 gün...

Daha 2 gün...

29.11.2023 [11:20]

Qəzzada atəşkəsin müddəti uzadılıb

Ölənlərin sayı isə 16 min nəfərə çatıb

Yaxın Şərqdə vəziyyət gərgin olaraq qalır. İsrail və HƏMAS müvəqqəti atəşkəsə razılaşsalar da, bu, qanlı toqqşumanın qarşısını almaq iqtidarında deyil. Xatırladaq ki, noyabrın 23-də tərəflər dörd günlük müvəqqəti atəşkəsə razılaşmışdı. Əldə olunan razılaşmaya görə, atəşkəs dövründə Qəzzaya hücumlar müvəqqəti dayandırılmalı, əsir mübadiləsi və humanitar yardımlar təmin edilməli idi. Tərəflər 50 israilli girov və İsrail həbsxanalarında saxlanılan 150 fələstinli qadın və uşağın azad edilməsi şərtləri daxilində bu atəşkəsə razılaşmışdı. Bundan başqa, Qəzza zolağına humanitar yardımın göndərilməsinə icazə verilib. İsrail atəşkəs müddətində Qəzza zolağında fələstinlilərin anklavın şimalı ilə cənubu arasındakı yolda sərbəst hərəkətini təmin edəcəyinə söz vermişdi.

Dördgünlük atəşkəs razılaşmalarının şərtlərinə əməl edilməsi tərəflər arasında bu müddətin artırılması ilə nəticələnib. Belə ki, ötən gün İsrail və Fələstinin radikal HƏMAS hərəkatı Qəzza zolağında humanitar atəşkəsin daha iki gün uzadılması barədə razılığa gəlib. Bu barədə Qətər Xarici İşlər Nazirliyinin rəsmi nümayəndəsi Məcid bin Məhəmməd əl-Ənsari bildirib. Əl-Ənsari sosial şəbəkə hesabında yazıb: “Qətər Dövləti davam edən vasitəçilik çərçivəsində Qəzza zolağında humanitar atəşkəsin daha iki gün uzadılmasına dair razılıq əldə olunduğunu elan edir”.

HƏMAS hərəkatı hər gün 10 girovu azad edərsə, İsrail atəşkəs rejimini uzatmağa hazır olduğunu bəyan edib. “The Times of Israel” qəzeti yazır ki, indiyədək 117 fələstinli məhbus yəhudi dövlətinin həbsxanalarından azad edilib. Daha 40 fələstinli məhbusun noyabrın 27-də azadlığa buraxılıb.

BMT Təhlükəsizlik Şurası isə İsrail və HAMAS-la bağlı sessiya keçirməyi nəzərdə tutur. Bu barədə TŞ-ya sədrlik edən Çin Xalq Respublikasının Xarici İşlər Nazirliyinin sözçüsü Vanq Venbin mətbuat brifinqində deyib. O bildirib ki, Çin xarici işlər naziri Van İ BMT Təhlükəsizlik Şurasının İsrail və HAMAS-la bağlı noyabrın 29-da keçiriləcək sessiyasına sədrlik etmək üçün Nyu-Yorka səfər edib. “Çin ümid edir ki, bu görüşə sədrlik edərək atəşkəsin reallaşmasına kömək etmək üçün öz üzərinə düşəni edə bilər”, - XİN sözçüsü qeyd edib.

İsrail-Fələstin məsələsi ilə bağlı yaradılan təmas qrupu isə Barselonada İspaniyanın xarici işlər naziri Xose Manuel Albares ilə görüşüb. Təmas qrupuna Türkiyənin xarici işlər naziri Hakan Fidan da daxildir. Türkiyə Xarici İşlər Nazirliyinin məlumata əsasən, görüş zamanı İsrail-Fələstin cəbhəsində baş verən son hadisələr və problemin həlli istiqamətində atılacaq addımlar nəzərdən keçirilib.

Qeyd edək ki, noyabrın 11-də yaradılan təmas qrupuna Türkiyə, Səudiyyə Ərəbistanı, Misir, İndoneziya, Qətər, İordaniya, Fələstin nümayəndələri ilə yanaşı, Ərəb Dövlətləri Liqasının Baş katibi Əhməd Əbul Qeyt də daxildir.

Qəzzada isə ölənlərin sayı artmaqdadır. Fələstin Səhiyyə Nazirliyinin məlumatına görə, oktyabrın 7-də başlanan hərbi toqquşmalar nətiəsində Qəzzada həlak olanların sayı 16 min nəfərə çatıb.

N.BAYRAMLI

Paylaş:

Baxılıb: 501 dəfə