Özünüifşa...

Bakı:

13 °C

88 %

6 m/s

Əlaqə

AZ RU EN

Ana səhifə / Xəbər lenti / Özünüifşa...

Özünüifşa...

11.01.2024 [10:33]

Arif Hacılının “Elçibəy İnstitutu”ndan istefasının səbəbləri

İllərdir ki, siyasi manipulyasiyanı peşəyə çevirmiş rediküllər bu yolla özlərini siyasi arenada qorumağa çalışır. Özlərini hansısa “siyasi irsin” davamçısı elan etmiş bu qruplaşma əslində bu mahiyyətdən də maliyyə və qazanc üçün istifadə edirlər. Başqa sözlə, istismara məruz qoyduqları “siyasi yol” onlar üçün asan qazanc, ermənipərəst dairələrlə işbirliyinin daha da rahatlandırılması, maliyyə ianələri üçün pərdə rolunu oynayır.

Maraqlıdır ki, min bir təriflə “yaratdıqları” birlik və qrupları isə qısa zamanda məhvə məhkum olur. Bunun da bir sıra obyektiv səbəbləri var:

- Həmin qruplar və ya “qurumlar” səmimi ideoloji yükə malik olmur;

- Bu birliklər yalnız maddi mahiyyətə əsaslanır;

Həmin birliklərin dağılmasının kökündə isə maddi razılıqların əldə olunmaması, tərəflərdən birinin və ya birilərinin bu “siyasi irsi” daha çox istismar etməsi və pul qazanması kimi amillər dayanır.

Bu dəfə də analoji halın şahidinə çevrildik. Müsavat Partiyasının sədri Arif Hacılı sosial şəbəkə hesabında “Elçibəy İnstitutu”ndan istefa verdiyini açıqlayıb. O, qurumun digər üzvlərinin sabiq prezident Əbülfəz Elçibəyin adından şəxsi maraqlar üçün istifadə etdiyini iddia edib: “Təsisçilərindən biri olduğum “Elçibəy İnstitutu” adlı qurumdan istefa verirəm. Səbəb “Elçibəy İnstitutu”nun aparıcı üzvlərinin Elçibəyin yüksək adından onun irsini tədqiq və təbliğ etmək üçün deyil, Müsavatın təməl prinsipləri ilə üst-üstə düşməyən şəxsi maraqları naminə istifadə etmələridir”.

Göründüyü kimi, ənənəvi “dostlaşma”, “qruplaşma” və “ayrılma” mexanizmi “Elçibəy İnstitutu”ndan da “yan” keçmədi. Arif Hacılı söhbətin kimdən getdiyini açıqlamasa da, tuşlanan “xətkeşin istiqamətləri bəllidir...

Maraqlısı isə budur ki həmin təşkilatın üzvləri A.Hacılının bi “istefasının” nədən, kimdə və haradan qaynaqlandığını “bilmirlər”. Belə ki mətbuata açıqlama verən “Elçibəy institutu”nun üzvləri üçün bu istefa onlar üçün “gözlənilməz” olub. Məsələn, özünü “Elçibəy İnstitutu”nun aparıcı üzvlərindən sayan O.Qasımov deyib ki, son dövrlərdə “Elçibəy İnstitutu”nun fəaliyyətində ciddi aktivlik yoxdur: “Hər kəs fərdi qaydada öz fəaliyyəti ilə məşğul olur. Arif bəylə kimlərinsə ziddiyyətinin olması barədə heç bir məlumatım yoxdur. O baxımdan bu suallara cavab vermək mənə çətinlik yaradır”.

Qiyas Sadıqov isə Arif Hacılının il yarımdır ki, institutun iclaslarında iştirak etmədiyini, amma münasibətlərində bir az soyuqluq olduğunu bildirib. “Publik cəhətdən hər hansı bir siyasi məsələdə fikir ayrılıqlarımız olmayıb. Onun kimə görə bu bəyanatı verdiyini demək mənim üçün çətindir”.

Xatırladaq ki, 2020-ci ilin 17 noyabrında “ictimai birlik” statusu ilə yaradıldığı bəyan edilən “Elçibəy İnstitutu”nun “əsas qayəsi” kitablar, xüsusi buraxılışlar və s. nəşr etmək, elm və digər yaradıcılıq sahələri üzrə müsabiqələr elan etmək, mühazirələr, seminarlar təşkil etmək, kurslar açmaq, dinləmələr və s. tədbirlər keçirmək idisə, bunu alt qatında nələrin gizləndiyini hər kəs bilirdi - yenicə II Qarabağ müharibəsində qələbə qazanan Azərbaycana qarşı ermənipərəst mərkəzlərin oynayacağı siyasi oyunların, təşkil ediləcək təzyiq kampaniyalarının əsas “təkanverici qüvvəsi” kimi çıxış etmək bu institutun təsisçilərinə verilmiş “sifariş idi”. Həmin “institut”un təsisçilərinin kimliyi hər şeydən xəbər verir - İsa Qəmbər, Arif Hacılı, Arzu Səmədbəyli, Əli Kərimli, İsmayıl Musa, Qiyas Sadıqov, Oqtay Qasımov, Pənah Hüseyn...

Bu siyahıda yer alan Əli Kərimlinin və bəzilərinin “amal” və “məqsəd”ləri haqda xüsusi təqdimata ehtiyac yoxdur. Onların pul qazanmaq üçün dövlətə və xalqa xəyanətləri barədə saatlarla danışmaq olar - görünür, maraqların toqquşması yenidən özünüifşaya yol açıb. Belə olmasaydı, Arif Hacılı özünün “istefa ərizəsində” şəxsi maraqları naminə istifadə məsələsini qabartmazdı.

Bəli, hər şeyi özləri etiraf edir - onlar üçün iddia etdikləri, “Elçibəy yolu” da, “Rəsulzadə yolu” da yalnız asan “qazanc yolu”dur. Onlar hər hansı bir “siyasi irsin” davamçısı və ya qoruyucusu da ola bilməzlər - xalqının marağını qorumayan, onu ermənilərə pul qarşılığında satanlar üçün yeganə yol “axırıncı yol”dur...

MƏNSUR

Paylaş:

Baxılıb: 513 dəfə