Azərbaycan–Almaniya iqtisadi tərəfdaşlığında yeni mərhələ

Bakı:

27 °C

51 %

12 m/s

Əlaqə

AZ RU EN

Ana səhifə / Arxiv / Azərbaycan–Almaniya iqtisadi tərəfdaşlığında yeni mərhələ

Azərbaycan–Almaniya iqtisadi tərəfdaşlığında yeni mərhələ

27.07.2026 [10:32]

Azərbaycan Respublikasının Prezidenti İlham Əliyevin 21 iyul 2026-cı il tarixində Almaniya Federativ Respublikasına rəsmi səfəri iki ölkə arasında siyasi, iqtisadi və strateji tərəfdaşlığın inkişafı baxımından mühüm hadisə kimi qiymətləndirilir. Müasir dövrdə beynəlxalq münasibətlərdə iqtisadi diplomatiya xüsusi əhəmiyyət daşıyır və dövlətlər arasında etibarlı tərəfdaşlığın möhkəmləndirilməsində qarşılıqlı investisiyalar, ticarət əlaqələri və biznes əməkdaşlığı əsas rol oynayır. Məhz bu baxımdan Prezident İlham Əliyevin Almaniyaya səfəri Azərbaycanın xarici siyasət kursunun iqtisadi istiqamətinin növbəti uğurlu təzahürü hesab oluna bilər.

Səfər zamanı dövlət başçısı çıxışında vurğuladı ki, hazırda Azərbaycanda 200-dən çox Almaniya şirkəti uğurla fəaliyyət göstərir və onların sayı gələcəkdə daha da artacaq. Bu fikir ölkəmizdə formalaşdırılmış əlverişli investisiya mühitinə, həyata keçirilən iqtisadi islahatlara və xarici investorların Azərbaycana olan etimadına verilən yüksək qiymət kimi dəyərləndirilə bilər. Almaniya Avropanın ən güclü iqtisadiyyatlarından biri olmaqla yanaşı, yüksək texnologiyalar, sənaye, maşınqayırma, bərpa olunan enerji və innovasiya sahələrində dünya liderlərindən biridir. Bu potensialın Azərbaycan iqtisadiyyatı ilə birləşdirilməsi hər iki ölkə üçün qarşılıqlı faydalı nəticələr vəd edir.

Prezident İlham Əliyevin rəhbərliyi ilə son illərdə həyata keçirilən iqtisadi siyasət Azərbaycanın beynəlxalq investisiya məkanında mövqeyini əhəmiyyətli dərəcədə gücləndirib. Qeyri-neft sektorunun inkişafı, sənaye parklarının yaradılması, rəqəmsal iqtisadiyyatın genişləndirilməsi, nəqliyyat-logistika imkanlarının artırılması və yaşıl enerji layihələrinin reallaşdırılması xarici şirkətlər üçün yeni əməkdaşlıq imkanları formalaşdırıb. Almaniya şirkətlərinin ölkəmizdə uğurla fəaliyyət göstərməsi də məhz bu siyasətin real nəticələrindən biridir.

Səfər çərçivəsində qarşılıqlı sərmayə qoyuluşu məsələlərinin müzakirə olunması və Alman şirkətlərinin Azərbaycanda daha geniş fəaliyyət göstərməsi üçün konkret təkliflərin irəli sürülməsi gələcəyə hesablanmış strateji yanaşmanın göstəricisidir. Bu əməkdaşlıq yalnız kapital axınının artmasına deyil, həm də qabaqcıl texnologiyaların tətbiqinə, müasir idarəetmə təcrübəsinin paylaşılmasına, yüksək ixtisaslı kadrların hazırlanmasına və yeni istehsal sahələrinin yaradılmasına töhfə verə bilər.Azərbaycanın əlverişli coğrafi mövqeyi, Şərq-Qərb və Şimal-Cənub beynəlxalq nəqliyyat dəhlizlərinin kəsişməsində yerləşməsi, həmçinin müasir infrastruktur imkanları Almaniya şirkətləri üçün ölkəmizi regionun mühüm iqtisadi mərkəzlərindən birinə çevirir. Bu amillər Almaniya investorlarının Azərbaycan bazarına marağını daha da artırır və uzunmüddətli tərəfdaşlıq üçün möhkəm zəmin yaradır.

Prezident İlham Əliyevin xarici siyasət kursunda iqtisadi diplomatiya mühüm yer tutur. Dövlət başçısının müxtəlif ölkələrə həyata keçirdiyi rəsmi səfərlər nəticəsində Azərbaycan beynəlxalq iqtisadi əlaqələrini genişləndirir, yeni investisiya layihələrinə start verir və ölkənin iqtisadi maraqlarını qlobal miqyasda uğurla müdafiə edir. Almaniyaya rəsmi səfər də bu baxımdan mühüm əhəmiyyət kəsb edir və Azərbaycan ilə Almaniya arasında iqtisadi münasibətlərin keyfiyyətcə yeni mərhələyə yüksəlməsinə xidmət edir.Bu gün Azərbaycan sabit siyasi mühitə, dinamik inkişaf edən iqtisadiyyata və etibarlı tərəfdaş imicinə malik dövlətdir. Almaniya ilə əməkdaşlığın daha da genişlənməsi ölkəmizin iqtisadi inkişafına, qeyri-neft sektorunun gücləndirilməsinə, innovasiyaların tətbiqinə və beynəlxalq rəqabət qabiliyyətinin yüksəlməsinə əlavə töhfələr verəcək. Prezident İlham Əliyevin Almaniyaya rəsmi səfəri bir daha göstərdi ki, Azərbaycanın həyata keçirdiyi uzaqgörən və praqmatik siyasət ölkənin beynəlxalq nüfuzunun artmasına, xarici tərəfdaşlarla əlaqələrin möhkəmlənməsinə və dayanıqlı iqtisadi inkişaf məqsədlərinə xidmət edir.

Anar Əhmədov

YAP Kəlbəcər rayon təşkilatının məsləhətçisi

Paylaş:

Baxılıb: 130 dəfə