Türk Dünyasında Vahid Mənəvi İrs və İslam Həmrəyliyi: Bakı Toplantısı və Seyid Yəhya Bakuvi Fəlsəfəsi

Bakı:

23 °C

60 %

5 m/s

AZ RU EN

Ana səhifə / Arxiv / Türk Dünyasında Vahid Mənəvi İrs və İslam Həmrəyliyi: Bakı Toplantısı və Seyid Yəhya Bakuvi Fəlsəfəsi

Türk Dünyasında Vahid Mənəvi İrs və İslam Həmrəyliyi: Bakı Toplantısı və Seyid Yəhya Bakuvi Fəlsəfəsi

21.09.2026 [15:14]

Türk Dövlətləri Təşkilatının (TDT) Müsəlman Dini İdarə Rəhbərləri Şurasının Bakı şəhərində keçirilən 7-ci toplantısı və dahi filosof Seyid Yəhya Bakuviyə həsr olunmuş Beynəlxalq Konfrans Türk-İslam dünyasının mənəvi inteqrasiyasında yeni bir tarixi mərhələnin əsasını qoymuşdur. Azərbaycan Respublikasının Prezidenti İlham Əliyevin sentyabrın 15-də TDT-yə üzv və müşahidəçi ölkələrin dini idarə rəhbərlərini, eləcə də beynəlxalq İslam təşkilatlarının nümayəndələrini qəbul etməsi bu mötəbər tədbirin dövlət səviyyəsində daşıdığı strateji əhəmiyyəti bir daha nümayiş etdirdi.

Seyid Yəhya Bakuvi XV əsrdə yaşayıb-yaratmış, özünün fəlsəfi-dini görüşləri və Xəlvətiyyə təriqəti ilə Şərq dünyasının mənəvi xəritəsini zənginləşdirmiş nəhəng mütəfəkkirdir. Onun təbliğ etdiyi mülayim İslam, mənəvi saflıq, dözümlülük və humanist dəyərlər bu gün qlobal miqyasda qarşıdurmaların və parçalanmaların artdığı bir dövrdə bəşəriyyət üçün ən çox ehtiyac duyulan ideyalardandır. Konfrans çərçivəsində qeyd edildiyi kimi, Bakının belə bir mənəvi dialoq mərkəzinə çevrilməsi təsadüfi deyildir; Azərbaycan Nizami Gəncəvi, İmadəddin Nəsimi, Məhəmməd Füzuli və Şah İsmayıl Xətai kimi dahi şəxsiyyətləri bəxş edən zəngin mədəniyyət beşiyidir.

Prezident İlham Əliyev öz çıxışında vurğulamışdır ki, Azərbaycan həm Türk dünyasının ayrılmaz hissəsi, həm də qədim Qafqaz Albaniyası və Atabəylər dövlətinin varisi olan unikal bir coğrafiyadır. Bu unikal mövqe ölkəmizə Türk və Qafqaz xalqları arasında sarsılmaz dostluq və qardaşlıq körpüsü rolu oynamaq imkanı verir. Dövlət başçısının qeyd etdiyi kimi, İslam həmrəyliyi yalnız sözdə deyil, əməli-praktiki addımlarla gücləndirilməlidir. Gələn il Bakıda keçiriləcək İslam Əməkdaşlıq Təşkilatının Zirvə Görüşü də məhz bu birliyin daha da möhkəmlənməsinə, musulman ölkələri arasında anlaşılmazlıqların aradan qaldırılmasına xidmət edəcəkdir.

Toplantıda iştirak edən TDT Baş katibi Kubanıçbek Ömüralıyev, Türkiyə Diyanət İşləri İdarəsinin sədri Safi Arpaquş, Müsəlman Ağsaqqalları Şurasının baş katibi Məhəmməd Əbdülsalam və digər dini liderlər TDT çərçivəsində Fətva Komitəsinin fəaliyyətini və ortaq dini qərarların qəbulunu yüksək qiymətləndirmişlər. Dini liderlər islamofobiya və ikili standartlara qarşı vahid cəbhədən çıxış etməyin zəruriliyini bildirərək, Bakı görüşünün bütün dünyaya barış və həmrəylik mesajı verdiyini yekdilliklə təsdiqləmişlər.

Azər SÜLEYMANOV,

Yeni Azərbaycan Partiyası Nəsimi rayon təşkilatının sədri

Paylaş:

Baxılıb: 232 dəfə