“Bələdiyyələrin statusu haqqında” qanuna dəyişikliklər edilib

Bakı:

11 °C

82 %

1 m/s

Əlaqə

AZ RU EN

Ana səhifə / Daxili siyasət / “Bələdiyyələrin statusu haqqında” qanuna dəyişikliklər edilib

“Bələdiyyələrin statusu haqqında” qanuna dəyişikliklər edilib

29.10.2014 [10:07]

Siyavuş Novruzov: Bu gün Azərbaycanda bələdiyyələrin kifayət qədər fəaliyyəti var və bu, getdikcə daha da təkmilləşir
Milli Məclisin dünən keçirilən iclasında “Bələdiyyələrin statusu haqqında” qanuna dəyişikliklər məsələsi müzakirəyə çıxarılıb. Layihə haqqında parlamentin Regional məsələlər komitəsinin sədri Arif Rəhimzadə məlumat verib. Onun sözlərinə görə, qanuna yeni 22-1 və 22-2 maddələri əlavə edilir. Layihəyə əsasən, yeni 22-1-ci (Bələdiyyə üzvlərinin səlahiyyətlərinin dayandırılması) maddədə göstərilir ki, bələdiyyə üzvlərinin səlahiyyətlərinin dayandırılması onların “Bələdiyyə üzvünün statusu haqqında” qanunun 4-cü maddəsində nəzərdə tutulmuş hüquqlarının həyata keçirilməsinin müvəqqəti dayandırılmasından ibarətdir. Bələdiyyə üzvlərinin səlahiyyətləri məhkəmənin qərarı ilə dayandırılır.
Maddədə o da deyilir ki, bələdiyyə üzvlərinin səlahiyyətləri bu qanunun 22-ci maddəsinin 5-6-cı bəndlərində nəzərdə tutulmuş əsaslarla bələdiyyə üzvünün səlahiyyətlərinin itirilməsi və səlahiyyətlərinə xitam verilməsi ilə bağlı məhkəmədə icraata başlandığı tarixdən aşağıdakı müddətə dayandırılır:
- bələdiyyə üzvünün səlahiyyətlərinin itirilməsi və səlahiyyətlərinə xitam verilməsi barədə məhkəmənin qanuni qüvvəyə minmiş qərarından sonra bələdiyyə tərəfindən bu qanunun 23-cü maddəsinin 2-ci hissəsinə uyğun olaraq bələdiyyə tərəfindən qərar qəbul edilənədək; iş üzrə məhkəmə icraatına xitam verilməsi barədə məhkəmənin qərarı qüvvəyə minənədək.
Layihədə nəzərdə tutulan daha bir - 22-2-ci (Bələdiyyələrin vaxtından əvvəl buraxılması) maddədə göstərilir ki, Milli Məclis ona bu qanunun 52-2-ci maddəsinin 3-cü hissəsinə uyğun olaraq müraciət olduqda və bununla əlaqədar bələdiyyənin hesabatının dinlənilməsi nəticəsində onun fəaliyyətini qeyri-qənaətbəxş hesab etdikdə, Mərkəzi Seçki Komissiyası bələdiyyənin vaxtından əvvəl buraxılması haqqında qərar qəbul edir.
Müzakirələr zamanı bəzi millət vəkilləri bu layihəni tənqid edərək gündəlikdən çıxarılmasını təklif ediblər. Onlar iddia ediblər ki, bu dəyişikliklər, guya, bələdiyyələrin işini çətinləşdirəcək.
Amma Milli Məclis sədrinin birinci müavini Ziyafət Əsgərov bildirib ki, qanuna təklif olunan bu dəyişikliklər yerli özünüidarə orqanlarının maraqlarına uyğundur.
YAP İcra katibinin müavini, millət vəkili Siyavuş Novruzov da qanuna edilən dəyişiklikləri dəstəkləyib. O bildirib ki, bələdiyyələr birbaşa əhalinin sosial-məişət problemlərini həll edir: “Gördüyün işlər barədə hesabat verməyin nəyi pisdir? Seçici deyir ki, səni seçmişəm və gördüyün işlər barədə mənə hesabat ver. Parlamentin üzvləri də mütəmadi şəkildə öz seçiciləri ilə görüşür və qəbul olunan qanunlar, eləcə də, görülən işlər barədə seçicilərini agah edir. Vətəndaş probleminin hansı formada həll olunmasını öyrənmək istəyir. Bu da onun haqqıdır. Odur ki, görülən işlər barədə hesabat vermək lazımdır. Bu hesabatlılıqda qorxulu məqamın nə olduğunu hələ də anlaya bilmirəm. Bələdiyyələrin işini müzakirə edənlərin əksəriyyətinin heç bələdiyyələrin statusu barədə məlumatı da yoxdur. Bildiyimiz kimi, bələdiyyələrin məhəllə komitələri var. Həmin komitələr əhali ilə sıx təmasda olmalıdır. Komitələrin işçiləri binalarda, eləcə də həyətlərdə vətəndaşlarla görüşərək onlara hesabat verirlər. Axı bunun nəyi pisdir?”.
S.Novruzov, həmçinin, qeyd edib ki, hazırda bələdiyyələrin statusu ilə bağlı heç bir problem yoxdur: “Bu gün bələdiyyələrin fəaliyyət istiqamətləri ilə bağlı kifayət qədər səlahiyyətləri mövcuddur. İcra başçılarının bələdiyyələrin işlərinə müdaxilə edilməsi ilə bağllı səsləndirilən fikirlər də tamamilə yanlışdır. Bilməyənlərə bir daha xatırlatmaq istəyirəm ki, bələdiyyə seçkiləri dekabrın 23-də keçiriləcək. Hər bir siyasi partiya bələdiyyə seçkilərinə namizəd irəli sürə bilər. Hazırda Azərbaycanda 1607 bələdiyyə var”.
S.Novruzov bildirib ki, Yeni Azərbaycan Partiyasının bələdiyyə üzvlüyünə namizəd vermək üçün böyük potensialı var. Bir çox üzvlərin namizədliyini irəli sürmək arzusunda olduğunu deyən millət vəkilinin sözlərinə görə, onlara partiyanın qərarına hörmətlə yanaşmaq tövsiyə olunur. “Siyasi partiyalar üçün ən vacib seçkilərdən biri, məhz bələdiyyə seçkiləridir. Amma bir çox partiyaların bu seçkilərdə namizəd irəli sürməsi üçün sosial bazası yoxdur. Onlar yalnız parlament seçkilərində özləri və yaxın ətraflarının namizədliyini irəli sürürlər. Amma bələdiyyə seçkilərində sırf vətəndaşların problemlərini yaxından həll edən şəxslərin namizədliyi irəli sürülməlidir. Bu gün Azərbaycanda bələdiyyələrin kifayət qədər fəaliyyəti var və bu, getdikcə daha da təkmilləşir” - deyə, YAP İcra katibinin müavini vurğulayıb.
Nardar BAYRAMLI

Paylaş:

Baxılıb: 1495 dəfə