Rəsmi Tbilisi Qərbə “yox” deyir

Bakı:

25 °C

69 %

10 m/s

Əlaqə

AZ RU EN

Ana səhifə / Dünya / Rəsmi Tbilisi Qərbə “yox” deyir

Rəsmi Tbilisi Qərbə “yox” deyir

30.11.2024 [11:12]

Qonşu Gürcüstanda cari ildə hakim “Gürcü Arzusu - Demokratik Gürcüstan” Partiyasının təşəbbüsü ilə parlamentdə xarici təsirin şəffaflığının təmin edilməsi və ailə dəyərlərinin, milli ləyaqətin qorunması ilə bağlı iki mühüm qanunun qəbul edilməsi fonunda başlayan müxalifət - hakimiyyət qarşıdurması oktyabrın 26-da baş tutan parlament seçkilərindən sonra daha gərgin fazaya daxil olub. Seşkilərin müvafiq qurum tərəfindən təsdiqlənən nəticələrinə əsasən, hakim “Gürcü Arzusu - Demokratik Gürcüstan” Partiyası on birinci çağırış Gürcüstan parlamentində 150 mandatdan 89-nu qazanıb. Mərkəzi Seçki Komissiyasının (MSK) yekun protokoluna görə, qalan 61 mandatdan 19-na “Dəyişiklik üçün Koalisiya”, 16-sına “Birlik - Milli Hərəkat”, 14-nə “Güclü Gürcüstan”, 12-nə isə “Qaxariya Gürcüstan üçün” partiyaları sahib olublar. Bununla da, qonşu və dost ölkədə seçkilər baş tutmuş hesab olunur.

Müxalifət isə MSK-nın təsdiqlədiyi nəticələrlə hesablaşmır və seçkilərin qanun pozuntuları şəraitində keçirildiyini, nəticələrin saxtalaşdırıldığını iddia edir. Artıq parlamentin ilk iclasının keçirilməsinə və qanunverici orqanın səlahiyyətlərinin təsdiqlənməsinə baxmayaraq, müxalifət etirazları davam etdirir. Qeyd edək ki, hakimiyyət daxilində də parçalanma yaranıb. O cümlədən prezident Salome Zurabişvili də müxalifət sıralarında yer alır.

Son gecə aksiyasında 32 polis əməkdaşı yaralanıb

Prezident S.Zurabişvilinin çağırışına əsasən müxalifət permanent etirazlar taktikasına keçib. Parlamentin yaxınlığındakı küçələrdə çadırlar qurulub, tonqallar yandırılıb. Müxalifət hətta ayrı-ayrı fraksiyaların deputat mandatından imtina edən təmsilçilərindən ibarət alternativ parlamentin formalaşdırılması iddialarından çıxış edir. Hərçənd ki, müxalifət mövqeyində dayanan fraksiyalardan deputat mandatı qazanan təmsilçilərin sayı buna imkan vermir. Gürcüstan qanunvericiliyinə əsasən, parlamentin səlahiyyətli sayılması üçün minimum 76 deputat mandatı tələb olunur.

Hələlik müxalifət etirazlarını davam etdirir. Birləşmiş müxalifətin noyabrın 28-də axşam saatlarında başladığı etiraz aksiyası insidentsiz ötüşməyib. Gecə saatlarında aksiya iştirakçıları ilə asayiş keşikçiləri arasında qarşıdurma yaranıb. Nəticədə Gürcüstan Daxili İşlər Nazirliyinin (DİN) 32 əməkdaşı xəsarət alıb.

Bu barədə Gürcüstan DİN məlumat yayıb. Bildirilir ki, xəsarət alan polis əməkdaşından 13-nə cərrahiyyə əməliyyatı lazım olub, 1 polis hələ də xəstəxanadadır. Polisə tabe olmamaq və inzibati qaydanı pozmaq ittihamı ilə 43 nəfər saxlanılıb. Qeyd edək ki, etirazçılar polisə müxtəlif əşyalar, tüstü bombaları atıb və polis əməkdaşlarının gözlərinə lazer tutublar. Müxalifətin əsas ideoloqu qismində çıxış edən S.Zurabişvili xalqa müraciət ünvanlayaraq insanları “divandan qalxmağa və təslim olmamağa” çağırıb. “Bu gün bu ölkədə yeganə qanuni institut mənəm, bu ölkənin yeganə qanuni nümayəndəsiyəm, cəmiyyətimiz adından dünyaya danışmaq hüququna malik olan yeganə insanam. Mən bunu edəcəm və sona qədər burada, sizin və ictimaiyyətin yanında olacağam”, - deyə müraciətdə vurğulanır.

Gürcüstan Aİ ilə yollarını ayırır

Gürcüstanda yaşananlar əslində kollektiv Qərbin Cənubi Qafqaz siyasətindən qaynaqlanır. ABŞ, Avropa İttifaqı (Aİ) bölgədə Rusiyanın maraqlarına zərbə vurmaq istəyir və bu məqsədlə region dövlətlərindən platforma qismində istifadə etməyə çalışır. Fürsətcil Ermənistan Qərbdən gələn çağırışlara “hə” deyir. Həmişə milli maraqlarından çıxış edən və müstəqil siyasət aparan Azərbaycan, təbii ki, öz ərazisinin kənar güclər üçün platformaya çevrilməsinə birmənalı şəkildə razılıq vermir. Gürcüstanın hazırkı rəhbərliyi də Qərbin ələalma və yaxud şantaj siyasətinə boyun əymir və milli maraqlarını önə çəkir. Yuxarıda bəhs etdiyimiz iki qanun da məhz milli maraqlar əsas götürülməklə qəbul olunub. Bundan əndişələnən Qərb isə rəsmi Tbilisidən qisas almaq üçün yeni “rəngli inqilab” ssenarisini işə salıb. Artıq Avropa İttifaqı, ABŞ Gürcüstana maliyyə dəstəyini dayandırıb. Son olaraq isə bu günlərdə Avropa Parlamenti Gürcüstanın hökumət rəhbərlərinə sanksiya tətbiq edilməsi ilə bağlı qətnamə qəbul edib. 444 deputat qətnamənin lehinə, 72 nəfər isə əleyhinə səs verib. Qətnamədə Gürcüstanın bəzi rəsmi şəxslərinə qarşı sanksiyaların tətbiqi tələb edilir. Həmçinin Gürcüstan vətəndaşlarının vizasız gediş-gəlişi rejiminə yenidən baxılması təklif olunur.

Lakin hər şeydən göründüyü kimi, dost ölkənin hazırkı rəhbərliyi güclü milli iradəyə malikdir və Qərbin ənənəvi şantaj vasitələrinə boyun əymir. Qərbə itaətkar Gürcüstan lazımdır. İ.Kobaxidze hökuməti isə real müstəqillik prinsiplərindən çıxış edir.

“Gürcüstan hakimiyyəti Avropa İttifaqına üzvlüklə bağlı danışıqları 2028-ci ilin sonuna qədər gündəliyə gətirməyəcək”. Bu fikri Baş nazir “Gürcü Arzusu-Demokratik Gürcüstan” Partiyasının ofisində keçirdiyi brifinqdə ifadə edib.

Kobaxidze qeyd edib ki, Avropa İttifaqına üzvlük müzakirələrinin başlanması Gürcüstanı təhdid etmək üçün alət kimi istifadə olunur. Bu cür təhdidlər Gürcüstana namizədlik statusu məsələsində də edilib. “Avropa İttifaqına inteqrasiyanın mərhəmət kimi müzakirə olunması qətiyyən yolverilməzdir” - deyə, Kobaxidze vurğulayıb.

Baş nazir həmçinin Avropa Parlamentini Gürcüstanla bağlı qətnaməyə görə sərt tənqid edib. Belə görünür ki, rəsmi Tbilisi Aİ ilə yollarını ayırır.

Mübariz ABDULLAYEV

Paylaş:

Baxılıb: 615 dəfə