Yaponiyada gözləri elektromaqnit dalğalarından qoruyan kontakt linzalar yaradılıb

Bakı:

26 °C

51 %

0 m/s

Əlaqə

AZ RU EN

Ana səhifə / Dünya / Yaponiyada gözləri elektromaqnit dalğalarından qoruyan kontakt linzalar yaradılıb

Yaponiyada gözləri elektromaqnit dalğalarından qoruyan kontakt linzalar yaradılıb

04.06.2025 [20:03]

Yaponiyalı fiziklər kontakt linzalar üçün işığı keçirən, lakin elektronika, eləcə də sənaye və tibbi cihazlar tərəfindən yaradılan elektromaqnit dalğalardan gözü qoruyan şəffaf nanoörtük hazırlayıblar. AZƏRTAC xəbər verir ki, bu barədə Vaseda Universitetinin mətbuat xidməti məlumat yayıb.

“Hazırda elektronika ilə təchiz olunmuş “ağıllı” kontakt linzaların hazırlanması ideyası geniş ictimaiyyətin diqqətini cəlb edir. Əgər bu texnologiyalar gerçəkləşsə, bu, gözlərimizin linzaların rabitə sistemləri tərəfindən yaradılan elektromaqnit dalğaların birbaşa təsirinə məruz qalacağı anlamına gəlir. Bu dalğalardan qorunmaq üçün biz ikiölçülü materiallar əsasında xüsusi örtük hazırlamışıq”, – deyə Vaseda Universitetinin professoru Takeo Miyake bildirib.

Bu problemi həll etmək üçün fiziklər adi kontakt linzaların səthinə tərkibində keçid metalları və karbon atomları olan, çox zaman isə azot, flüor və ya oksigen də ehtiva edən “maksen” adlanan ikiölçülü materiallardan hazırlanmış örtükləri tətbiq etməyə imkan verən bir yanaşma işləyib hazırlayıblar. Maksen təbəqələri qeyri-adi xüsusiyyətlərə malikdir və metallara bənzər davranış göstərir.

Yapon fizikləri titan karbid əsaslı maksen təbəqələrinin elə bir strukturu və xüsusiyyətlərini müəyyən edə biliblər ki, bu örtük görünən işığın 90 faizini keçirir, lakin “ağıllı” kontakt linzaların fəaliyyəti zamanı yarana biləcək elektromaqnit dalğaların keçməsinə mane olur. Tədqiqatçılar bu nanopörtüklə təchiz olunmuş bir neçə linzanın prototipini hazırlayıb və onların qoruyucu xüsusiyyətlərini təcrübədə yoxlayıblar.

Bu məqsədlə alimlər kontakt linzaları heyvanların gözünə yerləşdirərək maksen örtüyünün mikrodalğa şüalanması ilə necə qarşılıqlı təsir göstərdiyini müşahidə ediblər. Təcrübələr göstərib ki, bu örtük geniş tezlik diapazonunda elektromaqnit dalğalarının təxminən 93 faizini səpələyərək onları gözün torlu qişası və digər strukturları üçün daha az təhlükəli olan infraqırmızı şüalanmaya çevirir.

Fiziklərin qeyd etdiyinə görə, onların hazırladığı yanaşma maksen təbəqələrinin istənilən növ substrat və material üzərinə çəkilməsinə imkan verir. Bundan əlavə, bu materiallar yüksək biouyğunluğa malikdir. Bu xüsusiyyətlər maksenlərin yalnız kontakt linzalar üçün deyil, həm də müxtəlif növ bioelektronika, tibbi implantlar və orqanizmlə birbaşa təmasda olan digər cihazlar üçün qoruyucu örtük kimi istifadəsini mümkün edə bilər.

Paylaş:

Baxılıb: 400 dəfə