Ermənistanın yenidən “qara günlər”i başlayır

Bakı:

25 °C

66 %

10 m/s

Əlaqə

AZ RU EN

Ana səhifə / Dünya / Ermənistanın yenidən “qara günlər”i başlayır

Ermənistanın yenidən “qara günlər”i başlayır

29.07.2015 [09:50]

Serj Sarkisyanın təcili məzuniyyətə getməsi isə ölkədə daxili gərginliyi sabitləşdirməyə yönəlib
Bir qədər əvvəl elektrik enerjisi tariflərinin artırılmasına etiraz əlaməti olaraq xalq kütlələrinin Yerevan küçələrində fasiləsiz oturaq aksiyaya başlaması Serj Sarkisyan hakimiyyətinin sonunun yaxınlaşmasından xəbər verirdi. Yerli analitiklərin fikrincə, ermənilərin hər hansı bir səbəbdən hakimiyyətə qarşı belə kütləvi aksiyalara əl atması xalqın Serj Sarkisyan rejiminə etibarsızlığının bariz nümunəsidir. Odur ki, ölkədaxili belə bir gərginliyin fonunda Sarkisyanın təcili olaraq qeyri-müəyyən müddətə məzuniyyətə yollanmasını ekspertlər hakimiyyətin etirazçılar qarşısında “taym-aut” götürməsi kimi qiymətləndirirlər.
Doğrudur, iyunun ikinci yarısından başlayaraq təqribən 20 gün davam edən etiraz aksiyasının nəticəsində hökumət müvəqqəti geri çəkilməli oldu. Aksiyaçıları sakitləşdirmək üçün Serj Sarkisyan elektrik enerjisi tariflərinə nəzərdə tutulan artımın dövlət büdcəsi hesabına ödəniləcəyini bəyan etdi. Lakin bunun məqsədli şəkildə edildiyini, hökumətin əlavə vaxt qazanmaq üçün belə bir güzəştə getdiyini etirazçılar da yaxşı başa düşürdülər. Odur ki, hakimiyyətə qarşı növbəti mitinqlərini iyulun son həftəsinə planlaşdırdılar. Yerli analitiklərin qənaətinə görə, əgər yaxın günlərdə Serj Sarkisyan ortalıqda görünməsə, məzuniyyətindən geri dönməsə, Yerevan küçələrinin yenidən etiraz dalğasına bürünməyəcəyinə kimsə zəmanət vermir. Çünki aclıq və səfalət içində yaşayan ermənilərin tək dərdi elektrik enerjisi tariflərinin artması ilə bağlı deyil. Yerli “tert.am” saytının yazdığına görə, miqrasiya problemi, işsizlik, ölkədəki korrupsiya və rüşvətxorluq, eləcə də, məmur özbaşınalığı sadə erməniləri lap boğaza yığıb. Bir qarın çörəkpulu qazanmaqdan ötrü ermənilər qonşu dövlətlərə - Rusiya və Gürcüstana, eləcə də, Türkiyəyə üz tutmalı olurlar. Ölkədə ali təhsilli gənclərin iş tapmaları əsl problemə çevrilib. Demək olar ki, bütün dövlət vəzifələri Serj Sarkisyan komandasının üzvlərinin, eləcə də, onların yaxın qohum-əqrabalarının nəzarətindədir və dövlət qulluğunda çalışanların böyük əksəriyyəti yaşlı ermənilərdir. Belə bir şəraitdə gənclərin özlərinə karyera qurmaları əsl müşkülə dönüb.
Elə ötən ay keçirilən etiraz aksiyalarının təşkilatçısı olan “Qalx, Ermənistan” vətəndaş hərəkatının özəyini də məhz həmin gənclər təşkil ediblər.
Yerli analitiklərin fikrincə, Serj Sarkisyan rejimi daxili gərginliyi bir qədər sabitləşdirmək məqsədilə, guya, ölkədə tezliklə konstitusiya islahatlarının aparılacağı vədini ortaya atıb. Lakin bu islahatların nədən ibarət olacağı və hansı müddətdə həyata keçiriləcəyi barədə bir kimsədə məlumat yoxdur. Belə güman olunur ki, bu islahatlar, əslində, Sarkisyan rejiminin ömrünü uzatmağa hesablanmış addımlardan ibarət olacaq. Analitiklərin fikrincə, xalqdan dəstəyini itirən Sarkisyan rejimi öz nicat yolunu bu dəfə “parlament çoxluğu”nda axtaracaq və öz qanunsuz əməllərinə parlament vasitəsilə “haqq qazandıracaq”. Lakin Ermənistan müxalifətinin bunu asanlıqla “həzm” edəcəyi inandırıcı görünmür. Ermənistan Milli Konqresinin əlaqələndiricisi Levon Zurabyanın sözlərinə görə, konstitusiyaya belə düzəlişlər yolverilməzdir. Bu, qarşıdakı günlərdə müxalifətin hökumətin bu istiqamətdəki özbaşına siyasətinə qarşı birləşməsi ilə nəticələnəcək və yenidən ölkədə fasiləsiz etiraz aksiyalarına start veriləcək. Yerevan küçələrinə axışacaq ermənilər Sarkisyan rejimindən ölkəni və xalqı xilas etməyi tələb edəcəklər. Qarşıdakı günlərdə başlayacaq etiraz mitinqlərinin hansı nəticələrə gətirib çıxaracağını indidən söyləmək çətin olsa da, görünən odur ki, Serj Sarkisyanın ölkədə yürütdüyü siyasət Ermənistanı bir dövlət kimi məhvə aparır. Ya vəlvələdən, ya zəlzələdən, əgər Sarkisyan öz işğalçılıq siyasətini dəyişməsə, qonşu dövlətlərlə mehriban münasibətlər yaradılmasına cəhd göstərməsə, gec-tez bu dövlət məhv olmaq təhlükəsi ilə üz-üzə dayanacaq.
Səlim LOĞMANOĞLU

Paylaş:

Baxılıb: 1374 dəfə