“Böyük türk şairi Nazim Hikmət və Türk dünyası” kitabının təqdimatı olub

Bakı:

15°C

77%

4m/s

Əlaqə

AZ RU EN

Ana səhifə / Ədəbiyyat / “Böyük türk şairi Nazim Hikmət və Türk dünyası” kitabının təqdimatı olub

“Böyük türk şairi Nazim Hikmət və Türk dünyası” kitabının təqdimatı olub

09.12.2024 [23:29]

AMEA-nın Nizami Gəncəvi adına Ədəbiyyat İnstitutunda “Böyük türk şairi Nazim Hikmət və Türk dünyası” kitabının təqdimat mərasimi keçirilib.

Akademiyadan AZƏRTAC-a bildirilib ki, Nizami Gəncəvi adına Ədəbiyyat İnstitutunun Elmi şurasının qərarı ilə çap olunan kitabın müəllifi Türkiyənin Ərzincan Binəli Yıldırım Universitetinin Ədəbiyyat fakültəsi və Türk dili və ədəbiyyatı bölməsinin rəhbəri professor Əli Qafqasyalıdır. Kitab AMEA-nın prezidenti, Ədəbiyyat İnstitutunun direktoru akademik İsa Həbibbəyli “Nazim Hikmət sənətinin hikməti” adlı “Ön söz”ü ilə başlayır. Kitaba, həmçinin Türk Dövlətləri Təşkilatının Ağsaqqallar Şurasının sədri Binəli Yıldırım “Ön söz” yazıb.

Tədbiri açan AMEA-nın prezidenti akademik İsa Həbibbəyli akademiyada türkologiyanın inkişaf etdiyini, Türk dünyası ilə bağlı önəmli tədqiqatlar aparıldığını, AMEA-nın bir sıra elmi müəssisələrində bu istiqamətdə yeni şöbələrin yaradıldığını, eləcə də Türk dünyasının elmi qurumları ilə əlaqələrin daha da genişləndirildiyini vurğulayıb.

AMEA rəhbəri XX əsr dünya ədəbiyyatının böyük simalarından olan Nazim Hikmətin zəngin irsindən bəhs edərək, şairin həyat və yaradıcılıq yolunun Azərbaycanla bağlı məqamlarına diqqət yetirib. Bildirib ki, şairin ikinci Vətəni saydığı Azərbaycanda 1928-ci ildə ilk kitabı – “Günəşi içənlərin türküsü” nəşr olunub. Şairə həsr olunmuş ilk məqaləni də Bakıda dövrün görkəmli tənqidçisi Əli Nazim yazıb. Məqalə “Günəşi içirik... günəşlənirik” adlanırdı.

Akademik İsa Həbibbəyli Nazim Hikmətin bir çox şeirlərinin dünya ədəbiyyatı nümunələri arasında bənzərsiz olduğunu vurğulayıb: “Nazim Hikmət təkcə türk xalqına deyil, bütün Şərq xalqlarının poeziyasına təsir göstərmiş, şeirdə yeni yollar açmış novator sənətkardır. O, romantik ruhlu, dərin məzmunlu əsərləri ilə müasir türk ədəbiyyatının inkişafına böyük təkan verib”.

AMEA prezidenti bildirib ki, Azərbaycanda Nazim Hikmət haqqında kitablar, monoqrafiyalar, dissertasiyalar yazılıb. Akademik “Böyük türk şairi Nazim Hikmət və Türk dünyası” kitabının Türkiyə-Azərbaycanın müştərək işi kimi mühüm əhəmiyyət kəsb etdiyini bildirib, nəşrin Türkiyədə də yayılmasının vacibliyini vurğulayıb.

Sonra nəşrin müəllifi Türkiyənin Ərzincan Binali Yıldırım Universitetinin Ədəbiyyat fakültəsi və Türk dili və ədəbiyyatı şöbəsinin rəhbəri professor Əli Qafqasyalı kitabın məziyyətlərindən danışıb. Professor Azərbaycan-Türkiyə birliyi və qardaşlığının əbədi və sarsılmaz olduğunu söyləyib, Türk dünyasının ortaq ədəbiyyatının hazırlandığını diqqətə çatdırıb.

Tədbirdə Türkiyənin Ərzincan Binəli Yıldırım Universitetinin Sosial Elmlər İnstitutunun direktoru Necdet Tozlu, Bakı Dövlət Universitetinin Filologiya fakültəsinin Azərbaycan ədəbiyyatı kafedrasının dosenti Məti Osmanoğlu, Nizami Gəncəvi adına Ədəbiyyat İnstitutunun baş elmi işçisi professor Qəzənfər Paşayev, Milli Məclisin deputatı, filologiya elmlər doktoru Elnarə Akimova, Ədəbiyyat İnstitutunun Dünya ədəbiyyatı və komparativistika şöbəsinin müdiri professor Gülər Abdullabəyova çıxış ediblər. Çıxışlarda Nazim Hikmətin Azərbaycan, Türkiyə və dünya ədəbiyyatı tarixində hər zaman xatırlandığı və onun söz dünyasının nəhənglərindən biri olduğu vurğulanıb.

Paylaş:

Baxılıb: 365 dəfə