Ali məktəblər arasında ən çox tələbə qəbulu Bakı Dövlət Universitetinin payına düşür

Bakı:

10 °C

93 %

5 m/s

Əlaqə

AZ RU EN

Ana səhifə / Elm / Ali məktəblər arasında ən çox tələbə qəbulu Bakı Dövlət Universitetinin payına düşür

Ali məktəblər arasında ən çox tələbə qəbulu Bakı Dövlət Universitetinin payına düşür

18.09.2018 [09:55]

Sentyabrın 17-də Bakı Dövlət Universitetində (BDU) 2018-2019-cu tədris ilinin başlanması və “Bilik günü” münasibətilə tədbir keçirilib.
AZƏRTAC xəbər verir ki, BDU-nun rektoru, akademik Abel Məhərrəmov bu əlamətdar gün münasibətilə birinci kurs tələbələrini təbrik edib. Rektor Prezident İlham Əliyevin uğurlu siyasəti nəticəsində həyata keçirilən səmərəli islahatlardan, o cümlədən elm və təhsilin inkişafına göstərilən dövlət qayğısından danışıb. Ümummilli lider Heydər Əliyevin “Azərbaycan xalqının milli sərvəti” adlandırdığı BDU-nun flaqman rolunu uğurla davam etdirdiyini, ölkəmizin milli universiteti statusunu qoruduğunu qeyd edib.
Universitetin tarixi keçmişi, müasir inkişaf mərhələləri barədə məlumat verən akademik A.Məhərrəmov bu il ali təhsil müəssisələrinə keçirilən qəbul imtahanlarında respublika ali məktəbləri arasında ən çox tələbə qəbulunun Bakı Dövlət Universitetinin payına düşdüyünü, bakalavriat və magistratura səviyyəsində qəbul olunanların (BDU-nun Qazax filialı da daxil olmaqla) 6220 nəfər təşkil etdiyini bildirib. Məlumat verilib ki, BDU-ya daxil olan tələbələrdən 1982-si 500-dən, 461-i 600-dən, 131-i 650-dən artıq, üç nəfər isə 700 bal toplayıb, 12 nəfər Prezident təqaüdünə layiq görülüb. Ümumilikdə universitet tələbələrinin sayı 23 minə qədərdir.
Universitetin 100 illik tarixi yubileyə hazırlaşmasından bəhs edən rektor yubiley ərəfəsində yeni yataqxana şəhərciyinin və Yüksək Texnologiyalar Mərkəzinin istifadəyə veriləcəyini bildirib.
Daha sonra sosial elmlər və psixologiya fakültəsinin dekanı, professor Hikmət Əlizadə, 700 bal toplayaraq hüquq fakültəsinin tələbəsi adını qazanmış Əzim Əzizli və valideyn Mahirə Əhmədova çıxış ediblər. Onlar bu qocaman ali təhsil ocağı, o cümlədən yeni tədris ili ilə bağlı xoş arzu və istəklərini bildiriblər.
Qeyd edək ki, bu il BDU-nun Qazax filialına qəbul olunan tələbələrin sayında artım müşahidə edilib. Belə ki, bu il filiala 561 nəfər tələbə qəbul olunub. Bu rəqəm ötən illə müqayisədə 172 nəfər çoxdur. Beləliklə, BDU-nun Qazax filialında cari tədris ilində 17 ixtisas üzrə təhsil alanların sayı 1006 nəfərə çatıb.
Bu tədris ilində BDU-nun “SABAH” qruplarına qəbul olunan tələbələrin sayı 250-dən 280-ə yüksəlib. Onlardan 264-ü BDU-nun tələbələridir. Ümumilikdə, BDU-nun 10 ixtisas üzrə “SABAH” qrupları tələbələrinin sayı ötən illə müqayisədə 106 nəfər artaraq 701-ə çatıb.
Magistratura səviyyəsinə qəbul edilənlərin sayı 776 nəfər olub. Bu da ötən illə müqayisədə 132 nəfər çoxdur. Təbiət, fundamental, humanitar və sosial elmlər sahəsi üzrə çoxprofilli ali təhsil ocağı olan BDU-nun 16 fakültəsində bakalavriat səviyyəsində 65, magistratura səviyyəsində isə 44 ixtisas və 235 ixtisaslaşma üzrə kadr hazırlığı həyata keçirilir və təhsil alan tələbələrin sayı 23 minə yaxındır.
Universitetdə təhsil alan tələbələrin təlim-tərbiyəsi ilə üç mindən çox əməkdaş, o cümlədən 1500 müəllim məşğul olur. Onlardan 300-dək əməkdaş elmlər doktoru, professor, minədək əməkdaş isə fəlsəfə doktoru, dosentdir.

Paylaş:

Baxılıb: 1732 dəfə