23 aprel - dönüş nöqtəsinə çevrilən gün

Bakı:

24 °C

88 %

3 m/s

Əlaqə

AZ RU EN

Ana səhifə / Gündəm / 23 aprel - dönüş nöqtəsinə çevrilən gün

23 aprel - dönüş nöqtəsinə çevrilən gün

13.09.2023 [10:00]

Ağdam-Xankəndi yolu açıqdır...

Rusiya hökumətinin təşəbbüsü ilə Azərbaycan Qızıl Aypara Cəmiyyəti və Rusiya Qızıl Xaç Cəmiyyətinin birgə əməkdaşlıq memorandumuna əsasən, Azərbaycanın Qarabağ iqtisadi rayonunda yaşayan erməni sakinlərinin ərzağa olan ehtiyaclarının qarşılanması məqsədilə Rusiya Qızıl Xaç Cəmiyyəti tərəfindən göndərilən humanitar yükün Xankəndiyə çatdırılması təmin olunub. Xatırladaq ki, Qarabağ separatçılarının qəbul etmək istəməməsi səbəbindən yük maşını iki gün Bərdə şəhərində gözləməli olmuşdu. Lakin problem həll edildi və artıq ərzaq və qeyri-ərzaq məhsulları yüklənmiş TIR Qarabağda yaşayan erməni əsilli şəxslərə çatdırılıb.

Separatçıların nümayəndələri humanitar yükün qarşısını almağa çalışsalar da, buna nail ola bilməyiblər. Belə ki, erməni medasının məlumatına görə, Ağdam-Xankəndi yolunu bağlamaq istəyən bir qrup separatçı Rusiya sülhməramlılarının xəbərdarlığından sonra ərazidən uzaqlaşdırılıblar.

XİN: İrəliləyiş kimi qiymətləndiririk

Qızıl Aypara Cəmiyyəti ilə əlaqələndirilmiş şəkildə Rusiya Qızıl Xaç Cəmiyyətinin (RQXC) yük avtomobilinin Ağdam-Xankəndi yolu vasitəsilə Xankəndinə keçidinin təmin olunması Azərbaycan Xarici İşlər Nazirliyi tərəfindən də müsbət dəyərləndirilib. Bu barədə nazirliyin mətbuat katibi Ayxan Hacızadə deyib ki, Azərbaycanın Qarabağ bölgəsində Ermənistanın qondarma rejimi tərəfindən problem və təxribatların törədilməsinə baxmayaraq, RQXC tərəfindən göndərilən yükün Azərbaycanla əlaqələndirilmiş şəkildə məhz Ağdam-Xankəndi yolu ilə keçməsini bu yolun açılması istiqamətində müsbət addım və mühüm irəliləyiş kimi qiymətləndiririk.

Ağdam-Xankəndi və Laçın yollarının eyni zamanda açılması məsələsinə gəlincə Ayxan Hacızadə qeyd edib: “Ağdam-Xankəndi və Laçın yollarından eyni vaxtda istifadə məsələsinə gəldikdə isə Azərbaycanın ABŞ və digər tərəfdaşlar ilə yüksək səviyyəli təmaslar zamanı da qeyd etdiyi kimi, ölkəmiz bu iki yoldan BQXK vasitəsilə eyni zamanda istifadə məsələsinə razılıq verib. Təəssüf ki, bu razılığın da həyata keçirilməsinə mane olan tərəf Ermənistan tərəfindən Qarabağ bölgəsində yaradılmış qondarma rejimdir. Bir daha bəyan edirik ki, Azərbaycan tərəfi Ağdam-Xankəndi yolu ilə paralel olaraq, Laçın sərhəd-buraxılış məntəqəsində müvafiq olaraq sərhəd və gömrük prosedurlarına əməl etməklə BQXK vasitəsilə yüklərin daşınmasına şərait yaratmağa hazırdır”.

Azərbaycan Qızıl Aypara Cəmiyyətinin yük avtomobilləri isə 16 gündür ki, Ağdam-Xankəndi yolunda gözləyir. Bu barədə jurnalistlərə açıqlama verən Azərbaycan Qızıl Aypara Cəmiyyətinin baş katibi Ceyhun Mirzəyev deyib ki, bu yüklərin də Qarabağda yaşayan erməni əsilli sakinlərə çatdırılması istiqamətində müzakirələr davam edir.

“Humanitar böhran” şousunun sonu

Ağdam-Xankəndi yolu ilə Rusiyaya məxsus humanitar yükün Qarabağ ermənilərinə çatdırılması Laçın yolunu bir daha gündəmə gətirib. Bu il aprelin 23-də Laçın sərhəd nəzarət-buraxılış məntəqəsinin yaradılması tarixi hadisədir. Bu sərhəd nəzarət-buraxılış məntəqəsinin yaradılması Azərbaycanın suveren hüququdur və beynəlxalq normalara əsaslanır. “Laçın” postunun yaradılmasına etiraz edən Ermənistan onun ləğvi üçün Beynəlxalq Ədalət Məhkəməsinə şikayət etmişdi. Lakin Məhkəmə Ermənistanın iddiasını rədd edərək bu sərhəd nəzarət-buraxılış məntəqəsinin yaradılmasının Azərbaycanın suveren hüququ olduğunu bir daha təsdiqlədi. Eləcə də, Ermənistan və Fransanın təşəbbüsü ilə avqustun 16-da BMT Təhlükəsizlik Şurasının iclasında da Laçın yolu ilə bağlı aparılan müzakirələr iflasa uğradı.

Bütövlükdə, 23 apreldə Laçın sərhəd nəzarət-buraxılış məntəqəsinin yaradılması regionda vəziyyəti əhəmiyyətli dərəcədə dəyişdirdi və dönüş nöqtəsinə çevirdi. Artıq Ermənistan Qarabağ separatçılarına nə silah-sursat daşıya bilir, nə də xarici ölkələrin təmsilçilərinin qanunsuz səfərlərini təşkil edir. Ona görə də, hazırda “humanitar böhran” şousu yaratmağa çalışır. Ağdam-Xankəndi yolunun açılması isə bu şounun da sonu deməkdir.

Nardar BAYRAMLI

Paylaş:

Baxılıb: 864 dəfə