Minimum əmək haqqı yüksəlib, müavinət və təqaüdlər artırılıb...

Bakı:

25 °C

60 %

8 m/s

Əlaqə

AZ RU EN

Ana səhifə / İqtisadiyyat / Minimum əmək haqqı yüksəlib, müavinət və təqaüdlər artırılıb...

Minimum əmək haqqı yüksəlib, müavinət və təqaüdlər artırılıb...

11.03.2025 [10:52]

Məlum olduğu kimi 2025-ci ilin yanvar ayından etibarən ölkəmizdə beşinci sosial islahat paketi çərçivəsində sosial artımların icrasına start verilib. Dövlət başçısının imzaladığı “Əhalinin sosial rifahının yaxşılaşdırılması sahəsində tədbirlərin davam etdirilməsi haqqında” sərəncamına uyğun olaraq, ilk növbədə, minimum əməkhaqlarının artımı təmin edilib. Minimum aylıq əməkhaqqının məbləği 16 faiz artırılaraq 345 manatdan 400 manata çatdırılıb. Bu artımlar sayəsində dövlət və özəl sektorda çalışan insanların maaşlarının ən aşağı məbləği 400 manat təşkil etməkdədir.

Minimum əmək haqqındakı artım sadəcə aşağı maaş alanların deyil, eləcə də vahid tarif cədvəlinin (VTC) bütün pillələri üzrə əmək haqlarında artımlarını təmin etməkdədir. Belə ki, dövlət büdcəsindən maliyyələşdirilən sahələrdə çalışan işçilərin aylıq tarif (vəzifə) maaşları da təxminən bir ay müddətində bu sərəncama uyğunlaşdırılacaq və artırılacaq. Sosial, elm, səhiyyə, mədəniyyət, gənclər və idman, kənd təsərrüfatı, ekologiya və ətraf mühitin mühafizəsi, mənzil-kommunal, nəqliyyat və rabitə, meliorasiya, su təsərrüfatı və balıqartırma sahələrində çalışan dövlət qulluqçusu statusu olmayan işçilərin də əmək haqqında artımlar qeydə alınmaqdadır.

Peşə hazırlığı ilə bağlı təqaüdlər 14 faiz artırılıb

Ölkə üzrə ən əhatəli artımlardan biri olan əmək pensiyalarının indeksasiyası da tam təmin edilib və indeksləşdirmə bütün növ əmək pensiyaçılarına şamil olunub. “Əmək pensiyaları haqqında” Qanunun 4-cü maddəsinə əsasən, yaşa görə əmək pensiyası, əlilliyə görə əmək pensiyası və ailə başçısını itirməyə görə əmək pensiyasıdır. Ona görə də, növündən asılı olmayaraq bütün əmək pensiyaçılarının pensiya məbləğində indeksasiyalar üzrə artımlar hesablanaraq ötən aydan ödənişi təmin edilib. Həmin pensiyaçıların təqaüdləri 8,4 faiz artıb.

Ötən aydan qüvvəyə minən minimum pensiya məbləğinin artımları da artıq təmin olunub və həmin pensiyaçılar 320 manat məbləğində təqaüdlərini əldə ediblər. Eləcə də ünvanlı dövlət sosial yardımı ilə bağlı artımlar da yanvardan hesablanmaqla hazırda bu vəsaiti alan ailələrə artımlarla birgə ödənilməkdədir.

Minimum əmək haqqı artımından sonra bir sıra təqaüdlərdə də artımlar öz həllini tapıb. “Məşğulluq haqqında” qanuna əsasən, Azərbaycanda peşə hazırlığına cəlb olunmuş şəxslərə minimum əməkhaqqının 50 faizi məbləğində təqaüd verilir. 2025-ci ilin yanvar ayından minimum əmək haqqı 345 manatdan 400 manatadək yüksəldiyindən bu təqaüd məbləği də artırılıb. Əvəllər həmin vətəndaşlarımıza ödənilən aylıq məbləğ 172.5 manat idisə, indi həmin təqaud artırılaraq 200 manat olub. Bu o deməkdir, peşə hazırlığına cəlb olunmuş şəxslərə verilən təqaüd məbləği 14 faiz artırılıb. Yaxın günlərdə digər təqaüdlərdə də artımlar təmin ediləcək.

Sosial paket çərçivəsində nəzərdə tutulan bir sıra müavinətlərdə də artım reallaşmaqdadır. Həmin artımların da artmasına əsas hüquqi-iqtisadi təminat verən amil minimum əmək haqqı məbləğinin dəyişməsidir. Çünki ölkəmizdə bəzi sosial müavinətlərin məbləği minimum əmək haqqı ilə birbaşa bağlıdır və minimum əmək haqqındakı dəyişiklik onların məbləğində artımlar ilə müşahidə olunur. Onlardan biri cəza çəkməkdən azad edilmiş tibbi və sosial yardıma ehtiyacı olan şəxslərə ödənilən müavinətlərdir. Həmin müavinətin məbləği minimum əmək haqqının 4 misli həcmindədir. Bu o deməkdir ki, həmin müavinətin məbləği də artıq 1380 manatdan 1600 manatadək yüksəlir.

Sosial paket üzrə bütün artımlar da təmin ediləcək

Həmçinin, özəlləşdirilən və idarəetməyə verilən dövlət müəssisələrinin istehsalat qəzası və yaxud peşə xəstəliyi nəticəsində sağlamlığı pozulmuş işçisinə və ya bu səbəbdən həlak olmuş işçisinin ailə üzvlərinə və himayəsində olan digər şəxslərə ödənilən aylıq müavinətlərin məbləği də artırılıb. Belə ki, peşə əmək qabiliyyəti itirildikdə - minimum aylıq əməkhaqqının əmək qabiliyyətinin itirilmə faizi məbləğində ödənilir. Məsələn, peşə əmək qabiliyyətini itirmə faizi 80 faizdirsə o zaman həmin aylıq müavinətin məbləği 276 manatdan 320 manatadək artırılıb.

Belə hallarda dünyasını dəyişənlərin ailə üzvlərinə və himayəsində olan digər şəxslərə aylıq müavinətin məbləği isə 345 manatdan 400 manata çatdırılıb.

Artımın baş verdiyi digər ödəniş dəfn üçün müavinətdir. Belə ki, əmək pensiyaçıları vəfat etdikdə isə əmək pensiyasının minimum məbləğinin üç misli məbləğində ödəniş edilir. Bu o deməkdir ki, pensiyaçı vəfat etdikdə dəfn üçün müavinət 840 manatdan 960 manata yüksəldilib.

Minimum əmək haqqı ilə bağlılığı olmayan bir sıra sosial müavinət və təqaüdlərin artımları isə yaxın günlərdə öz həllini tapacaq. Dövlət başçısı tərəfindən sosial müavinətlər və təqaüdlərin artırılması ilə bağlı Nazirlər Kabinetinə verilmiş tapşırığa əsasən, bu istiqamətdə təkliflərin hazırlanması yekunlaşmaqdadır. Həmin sosial təkliflər toplusu ilə bağlı mart ayının sonlarında yekun qərar verildikdən sonra mövcud olacaq hüquqi mexanizmə əsasən, sosial paket üzrə bütün artımlar da təmin ediləcək.

E.CƏFƏRLİ

Paylaş:

Baxılıb: 977 dəfə