Vergilər Nazirliyi beynəlxalq əməkdaşlığın genişləndirilməsinə böyük önəm verir

Bakı:

19°C

72%

6m/s

Əlaqə

AZ RU EN

Ana səhifə / İqtisadiyyat / Vergilər Nazirliyi beynəlxalq əməkdaşlığın genişləndirilməsinə böyük önəm verir

Vergilər Nazirliyi beynəlxalq əməkdaşlığın genişləndirilməsinə böyük önəm verir

25.07.2015 [10:33]

Orxan Musayev: IOTA-nın ən fəal üzvlərindən biri olan Vergilər Nazirliyi təşkilatın işində səmərəli və fəal iştirak edir
“Azərbaycan 2020: gələcəyə baxış” İnkişaf Konsepsiyası ilə əlaqədar olaraq Vergilər Nazirliyi tərəfindən qəbul edilən 2013-2020-ci illər üçün Strateji Planda beynəlxalq və regional təşkilatlar, eləcə də, digər dövlətlərin vergi orqanları ilə əməkdaşlığın genişləndirilməsi nəzərdə tutulub”. Bunu KİV-ə müsahibəsində Vergilər Nazirliyinin Beynəlxalq münasibətlər idarəsinin rəisi Orxan Musayev deyib.
Onun sözlərinə görə, beynəlxalq əməkdaşlığın gücləndirilməsi, hər zaman olduğu kimi, 2015-ci ildə də əsas prioritetlərdən biridir: “Vergilər Nazirliyi ikitərəfli və çoxtərəfli əməkdaşlıq mexanizmi çərçivəsində həm bir sıra mötəbər regional və beynəlxalq təşkilatlarla, həm də xarici ölkələrin vergi orqanları ilə əməkdaşlığı genişləndirir. Nazirliyin nümayəndələri Avropadaxili Vergi Administrasiyaları Təşkilatının (IOTA), İqtisadi Əməkdaşlıq və İnkişaf Təşkilatının (OECD), Avropa Kommersiya Qeydiyyatçıları Forumunun (ECRF) və digər regional və beynəlxalq təşkilatların tədbirlərində mütəmadi iştirak edirlər. Beynəlxalq təşkilatlarla mövcud əməkdaşlığın ikitərəfli formatda davam etdirilməsi məqsədilə Koreya Beynəlxalq Əməkdaşlıq Agentliyi, Almaniya Beynəlxalq Əməkdaşlıq Cəmiyyəti (GİZ), Avropa İttifaqı, Dünya Bankı, Beynəlxalq Valyuta Fondu və Asiya İnkişaf Bankı ilə danışıqlar aparılıb. Sözsüz ki, ölkəmizdə tez-tez beynəlxalq tədbirlərin keçirilməsi bu münasibətlərin daha da genişlənməsinə şərait yaradır”.
O.Musayev əlavə edib ki, Niderland Krallığının Rotterdam şəhərində baş tutan 19-cu Baş Assambleyada keçirilən səsvermənin nəticələri Vergilər Nazirliyi ilə IOTA, eləcə də, təşkilatın üzv dövlətləri arasında daha da intensivləşən əməkdaşlıqdan xəbər verir: “Vergilər Nazirliyi 2013-cü ildən bəri artıq üçüncü dəfədir ki, IOTA-nın əsas qərarverici və idarəetmə orqanı olan İcraiyyə Şurasına üzv seçilib. Qeyd edim ki, MDB məkanında ilk olaraq Azərbaycanın seçildiyi İcraiyyə Şurasının təşkilatın fəaliyyətində əhəmiyyətli rol oynayan müstəsna səlahiyyətləri var. Vergilər Nazirliyinin burada təmsil olunması təşkilatın fəaliyyətində yaxından iştirak etməyimizə şərait yaradır. Artıq ardıcıl olaraq üçüncü dəfə İcraiyyə Şurasına üzv seçilməyimiz heç də gözlənilməz olmadı. Çünki Vergilər Nazirliyi IOTA-nın ən fəal üzvlərindən biridir və təşkilatın işində səmərəli və fəal iştirakına görə təşkilata üzv olan digər ölkələr arasında da özünə layiqli yer qazanıb”.
Onun sözlərinə görə, Vergilər Nazirliyinin nümayəndələri müntəzəm olaraq IOTA-nın müxtəlif formatda keçirilən tədbirlərində, forumlarında iştirak edir və bu sahədə təcrübə mübadiləsi aparırlar. Məhz həmin forumlardan biri - Vergi üzrə Peşəkar Təlim və İnkişaf Forumu cari ilin 9-11 sentyabr tarixlərində Bakı şəhəri və Şamaxı rayonunda keçiriləcək. Forumda IOTA-nın 30 üzv dövlətindən 50-yə yaxın nümayəndənin iştirakı gözlənilir.

Paylaş:

Baxılıb: 924 dəfə