KOBİA və BP əməkdaşlığa başlayır

Bakı:

19°C

63%

4m/s

Əlaqə

AZ RU EN

Ana səhifə / İqtisadiyyat / KOBİA və BP əməkdaşlığa başlayır

KOBİA və BP əməkdaşlığa başlayır

13.03.2023 [11:09]

Kiçik və Orta Biznesin İnkişafı Agentliyi (KOBİA) və BP arasında əməkdaşlığa dair yeni Anlaşma Memorandumu imzalanıb.

AZƏRTAC xəbər verir ki, Sənədi KOBİA-nın İdarə Heyətinin sədri Orxan Məmmədov və BP-nin vitse-prezidenti Bəxtiyar Aslanbəyli imzalayıblar.

"Bakı KOB evi"ndə keçirilmiş imzalanma tədbirində qeyd edilib ki, yeni sənəd KOBİA və BP arasında səmərəli əməkdaşlığın davamıdır. Yeni memorandum çərçivəsində KOBİA və BP ölkəmizdə sahibkarlığın dəstəklənməsini hədəfləyən layihələrdə birgə əməkdaşlıq edəcəklər.

KOBİA-nın İdarə Heyətinin sədri Orxan Məmmədov deyib: "KOBİA mikro və kiçik sahibkarlığın inkişafı və onların dəstəklənməsi istiqamətində regionlarda müxtəlif qurum və təşkilatlarla birgə layihələr həyata keçirir. BP ilə əməkdaşlıq çərçivəsində reallaşacaq layihələr də regionlarda yerli icmaların gəlirlilik səviyyəsinin artmasına müsbət təsir göstərəcək, yeni bizneslərin yaranmasına və özünüməşğulluğa töhfə verəcək. Bu əməkdaşlıq çərçivəsi həm də təcrübə kimi digər layihələrin icrasında istifadə oluna bilər. İnanırıq ki, BP ilə birgə əməkdaşlığımız kiçik və orta sahibkarlığın inkişafına, onların fəaliyyətinin genişlənməsinə öz əhəmiyyətli töhfəsini verəcək".

BP-nin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli deyib: “Yeni Anlaşma Memorandumu imzalamaqla biz yerli bizneslərin inkişafını dəstəkləmək yönümündə səylərimizi davam etdirmək niyyətindəyik. Sahibkarlığın İnkişafı Proqramı layihəmiz yerli müəssisələrin potensialının artırılmasına çalışan bütün maraqlı tərəfləri bir araya toplamaqda uğurlu olmuşdur. Həqiqətən də, bu proqram yerli müəssisələrə beynəlxalq standartlara çatmaq və tədarük müqavilələri uğrunda rəqabət aparmaq üçün gözəl imkan yaradıb. İndi isə biz bu layihəni yekunlaşdırırıq və KOBİA ilə yeni birgə fəaliyyətə başlayırıq. Bu əməkdaşlıq vasitəsilə biz Sahibkarlığın İnkişafı Proqramının uğurunu daha da irəli aparmaq niyyətindəyik. Yerli sahibkarlığın inkişafına sərmayə qoyaraq son 15 il ərzində əldə etdiyimiz nəticələrlə qürur duyur və inanırıq ki, bu sahədə dəstəyimizi davam etdirmək üçün irəlidə yeni və daha maraqlı imkanlar açılacaq".

Tədbir çərçivəsində KOBİA və BP-nin dəstəyi ilə birgə həyata keçiriləcək iki yeni layihə barədə də məlumat verilib. Qeyd olunub ki, layihələrdən biri kənd yerlərində gənc sahibkarların inkişafına dəstək məqsədi daşıyır və Samux, Goranboy və Şəmkir rayonlarında həyata keçiriləcək. Layihə çərçivəsində aztəminatlı ailələrdən olan və sahibkarlığa maraq göstərən gənclər seçilərək onlara gələcək biznes fəaliyyətlərinə hazırlıq üçün təlim keçiriləcək. Təlimləri uğurla başa vuracaq gənclərə kiçik bizneslərini qura bilmələri üçün lazımi avadanlıqlar veriləcək, onlara mentor dəstəyi göstəriləcək. Layihə "Kənd İnkişafına Dəstək" İctimai Birliyi tərəfindən icra olunacaq.

Digər layihə rayondan seçilmiş aztəminatlı ailələr üçün gəlir və məşğulluq imkanları yaratmağı nəzərdə tutur. Layihə çərçivəsində aqroturizmlə məşğul olan yeddi sahibkarlıq subyektinin işçi heyəti üçün təlimlər keçiriləcək, mentorluq dəstəyi göstəriləcək və həmin müəssisələr avadanlıqlarla təchiz olunacaq. Bundan başqa, ehtiyac olduğu halda həmin sahibkarlıq obyektlərinin təmirinə də dəstək göstəriləcək.

Layihə Regional İnkişaf İctimai Birliyi tərəfindən icra olunacaq. Tədbirdə, həmçinin "Ekvita" şirkətinin, "Kənd İnkişafına Dəstək" İctimai Birliyi və Regional İnkişaf İctimai Birliyinin nümayəndələri sözügedən layihələr barədə məlumat veriblər.

Qeyd edək ki, layihələrin ümumi dəyəri 595 min manat təşkil edir.

Paylaş:

Baxılıb: 456 dəfə