Antikorrupsiya tədbirləri uğurlu nəticələrini verməkdədir

Bakı:

4 °C

65 %

5 m/s

Əlaqə

AZ RU EN

Ana səhifə / İqtisadiyyat / Antikorrupsiya tədbirləri uğurlu nəticələrini verməkdədir

Antikorrupsiya tədbirləri uğurlu nəticələrini verməkdədir

09.07.2011 [12:21]

Dövlətimizin inkişaf tempinə müsbət təsir edən amil kimi bu istiqamətdə atılan addımların davamlılığı zəruridir
Azərbaycanda bütün sahələrdə həyata keçirilən sosial-iqtisadi siyasətin mühüm istiqamətlərindən birini cəmiyyətdəki neqativ hallara, qanun pozuntusuna, korrupsiya və rüşvətxorluğa qarşı intensiv mübarizə təşkil edir. ölkədə gerçəkləşdirilən sosial-iqtisadi islahatların səmərəliliyini artırmaq məqsədilə korrupsiyanın qarşısının alınması və bu sahədə hüquqpozmaların aradan qaldırılması dövlətin bu yöndə həyata keçirdiyi tədbirlərin başlıca istiqamətlərindəndir.
Məlum olduğu kimi, cari ilin yanvarın 14-də Prezident İlham Əliyev Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ildə qarşıda duran vəzifələrə həsr olunmuş iclasında ölkənin iqtisadi inkişafına maneə ola bilən bütün neqativ halların aradan qaldırılmasına, korrupsiya və rüşvətxorluğa qarşı mübarizə tədbirlərinin həyata keçirilməsinə dair müvafiq tapşırıqlarından sonra sistemli işlər aparılıb. İlk növbədə, dövlət orqanlarında korrupsiya əleyhinə mübarizə gücləndirilib, neqativ halların vaxtında aşkarlanması üçün nəzarət mexanizmi təkmilləşdirilib, “qaynar xətt” sisteminin tətbiqinə başlanılıb. Fəaliyyətində ciddi nöqsanlara yol verən bir sıra bələdiyyə, təhsil, səhiyyə, DİN işçilərinə qarşı görülən tədbirlər ölkəmizdə korrupsiyaya qarşı mübarizənin hərtərəfli xarakter daşıdığını göstərir.
Əhalinin sosial müdafiəsinin gücləndirilməsi, aztəminatlı vətəndaşlara dövlət qayğısının artırılması istiqamətində məqsədyönlü tədbirlər həyata keçirən Əmək və Əhalinin Sosial Müdafiəsi Nazirliyi də dövlət başçısının qarşıya qoyduğu vəzifələri rəhbər tutaraq korrupsiya və rüşvətxorluqla mübarizədə konkret və məqsədyönlü işlər görür. Vəzifələrinin icrasında, həmçinin, vətəndaşlara xidmət sahəsində yol verdikləri ciddi nöqsanlara görə Quba, Yardımlı və Xızı rayonlarının əhalinin sosial müdafiəsi mərkəzlərinin direktorları və 13 nəfər məsul əməkdaş vəzifələrindən azad edilib, 5 rayonun (Kürdəmir, Sabirabad, Zərdab, Biləsuvar, Ağcabədi) mərkəz direktorları müvəqqəti olaraq vəzifələrindən kənarlaşdırılıb, 15 nəfərə isə töhmət verilib. İctimai nəzarətin gücləndirilməsi məqsədilə “ünvanlı sosial yardım təyin edən komissiya haqqında Əsasnamə”yə əlavə və dəyişikliklər edilərək, həmin komissiyaların üzvləri siyahısına təşkilati-hüquqi formasından asılı olmayaraq idarə, müəssisə və təşkilatların (qeyri-hökumət təşkilatları və həmkarlar ittifaqları daxil olmaqla) nümayəndələri də daxil edilib.
Korrupsiyaya qarşı mübarizədə şəffaflığın artırılması, ərizə və şikayətlərin vaxtında və yerində araşdırılması məqsədilə həkim-ekspertlər zonalara ezam edilib, vətəndaşların qəbulunu asanlaşdırmaq və onlara göstərilən xidmətin keyfiyyətini artırmaq üçün tibbi-sosial ekspert komissiyalarının (TSEK) sayı artırılıb. Bununla yanaşı, 7 zona üzrə tibbi-sosial ekspert komissiyalarının sədrləri vəzifələrindən kənarlaşdırılıb, 8 nəfər həkim-ekspertə sonuncu xəbərdarlıqla şiddətli töhmət verilib. Eləcə də, Qarabağ müharibəsi əlillərinə və şəhid ailələrinə dövlət hesabına mənzillərin və avtomobillərin verilməsi üçün yaradılmış xüsusi komissiyanın işində şəffaflığın daha da artırılması məqsədilə komissiyanın tərkibinə Ombudsman Aparatının, Qeyri-Hökumət Təşkilatlarına Dövlət Dəstəyi Şurasının nümayəndələri, ayrı-ayrı əlil təşkilatlarının sədrləri də daxil edilib.
Yeri gəlmişkən, qeyd edək ki, bu günlərdə korrupsiyaya qarşı mübarizə tədbirləri çərçivəsində daha 3 polis vəzifəsindən azad edilib. Aparılan xidməti təhqiqat zamanı Oğuz RPŞ-nin Yol Patrul Xidməti əməkdaşlarının qanunsuz hərəkətləri tam sübut olunduqdan sonra onlar korrupsiya faktı ilə əlaqədar vəzifəsindən kənarlaşdırılıb.
Beləliklə, antikorrupsiya tədbirlərinin genişləndirilməsi və sərtləşdirilməsi bu prosesin kampaniya xarakteri daşımadığını göstərir. ümumiyyətlə, rüşvət və korrupsiya hallarına qarşı operativ tədbirlərin görülməsinin, həmçinin, effektiv nəticələrin əldə edilməsinin dövlətimizin inkişaf tempinə müsbət təsir edən amil olduğunu nəzərə alsaq, bu istiqamətdə atılan addımların davamlılığı zəruridir.
SEVİNC

Paylaş:

Baxılıb: 1355 dəfə