Dövlət iradəsini xalqdan alır...

Bakı:

27 °C

60 %

9 m/s

Əlaqə

AZ RU EN

Ana səhifə / MEDİA / Dövlət iradəsini xalqdan alır...

Dövlət iradəsini xalqdan alır...

10.08.2024 [11:04]

Milli maraqlarımızın qorunması həmişə prioritet olub

İctimai və milli maraqların, həmçinin dövlət maraqlarının müdafiəsi hər zaman bizim üçün ön planda olub. Respublikamızda bu məsələ bütün dövrlərdə aktuallıq kəsb edərək siyasətimizin əsas özəyini təşkil edir. Bütün dünya ictimaiyyəti üçün sirr deyil ki, Azərbaycan cəmiyyəti ictimai və dövlət marağı məfhumlarının mahiyyətini dərk edən, bu mövqeyi ictimai, siyasi münasibətlərdə və dövlətlə əlaqələrində nümayiş etdirməyi bacaran, formalaşmış yetkin bir cəmiyyətdir. Ona görə də cəmiyyətimiz intellektual əsaslarla formalaşmış modern bir cəmiyyətdir.

Prezident İlham Əliyevin yürütdüyü siyasətin təməlində dövlət maraqlarının, xalqla iqtidar arasında birliyin dayandığını bəyan etməsi heç də təsadüfi deyil. Bu o deməkdir ki, ölkəmizdə həm dövlət mənafeyinə zərər gəlməyən, həm də ictimai maraqlar təmin edilən, ortaq maraqlar müəyyənləşdirilən, üst-üstə düşən ideal siyasət formalaşıb.

Mövzu barədə “Yeni Azərbaycan”a açıqlama verən politoloq İlyas Hüseynov bildirib ki, bir dövlətin inkişafı, təşəkkül prosesi onun hansı məfkurə və ideyalara xidmət etməsindən çox asılıdır. Onun sözlərinə görə, dövlət o vaxt sürətli inkişafla irəliləyir ki, burada xalqla dövlət maraqları ictimai maraqlarla üst-üstə düşür: “Bu, o deməkdir ki, dövlət iradəsini xalqdan alır. Bir sözlə, dövlət xalq, xalq isə dövlət deməkdir. Bir dövlətin hərtərəfli inkişafında, təbii olaraq əsas inkişaf yollarındakı məqamlar dövlətin maraqlarının xalq tərəfindən müdafiə olunmasıdır. Çünki hər bir dövlət xalqın iradəsinə söykənərək onun milli maraqları üçün çalışır, ona söykənən siyasət həyata keçirir. Bu gün Azərbaycan bu sahədə çox böyük və uğurlu addımlar həyata keçirir. Birinci məsələ odur ki, ictimai maraqların dövlət maraqları ilə üst-üstə düşməsini biz Vətən müharibəsində qazandığımız qələbədə gördük. Bütün cəmiyyət Ali Baş Komandanla birgə “Dəmir yumruq” şüarı altında düşmənin başını əzdi. Siyasi, ictimai və digər maraqlarından asılı olmayaraq, hər bir azərbaycanlı bir yumruq halında birləşərək, əzmlə mübarizə apardı. Bununla da möhtəşəm qələbəmizi qazandıq”.

Dünyanın ən qürurlu

xalqlarından birinə çevrilmişik

İ.Hüseynov qeyd edib ki, dövlətin milli maraqlarına söykənən siyasəti həm diplomatik meydanda, həm də hərb meydanında öz uğurlu nəticəsini verdi: “Hər bir vətəndaş həmin anda bir əsgər idi. Yaşından, cinsindən, irqindən asılı olmayaraq, özünü azərbaycanlı sayan hər insan bir əsgərə dönərək, Vətənin qorunması üçün əlindən gələni etdi. Ona görə də bu gün dünyanın ən qürurlu xalqlarından birinə çevrilmişik. Təbii olaraq vətəndaşın mənafeyinin müdafiə olunması, onun maraqları üçün çalışmaq dövlətin bir nömrəli vəzifələrindən biridir. Bu mənada Azərbaycan bir sosial dövlət kimi bu siyasətini uğurla davam etdirir”.

Hələ də görüləsi işlərimiz var

Politoloqun fikrincə, bəzi problemlər var, lakin bu problemlərin həll edilməsi üçün dövlətlə bərabər vətəndaş cəmiyyəti, qeyri-hökumət təşkilatları, ictimai və digər icmalar, bələdiyyələr “canlı orqanizm” halında çalışmalı və dövlət maraqlarının müdafiəsi üçün vacib layihələri də icra etməlidirlər: “Bu mənada siyasi birliyin vəhdətində çox böyük uğurlar qazandıq. Vətən müharibəsindən keçən bu dövr ərzində bir neçəsini çıxmaqla, digər siyasi partiyalar da vacib anlarda dövlətin maraqları çərçivəsində birləşdilər və öz siyasətlərini yalnız dövlətin uğuru üçün ortaya qoydular. Eyni anda qeyri-hökumət təşkilatları və vətəndaş cəmiyyəti bu inkişafa öz töhfələrini vermiş oldular.

Göründüyü kimi, cəmiyyətdə və onun inkişafında vətəndaş cəmiyyətinin rolu danılmazdır. Vətəndaş cəmiyyəti və qeyri-hökumət təşkilatları dövlətdən kifayət qədər dəstək alaraq özlərinin təşəbbüsü ilə müxtəlif tədbirlər həyata keçirirlər. Amma hələ də görüləsi işlərimiz çoxdur. Buna görə də qeyri-hökumət təşkilatları hələ də çox maraqlı layihələr icra etməli, əsasən də beynəlxalq miqyasda böyük inkişaf etmiş ölkələrin vətəndaş cəmiyyəti qurumları ilə əlaqəli çalışmalı və ölkəmizin uğurlu siyasətini, həmçinin prioritetlərini təbliğ etməlidirlər”.

Yeganə BAYRAMOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “İctimai və dövlət maraqlarının müdafiəsi” istiqaməti üzrə hazırlanmışdır

Paylaş:

Baxılıb: 740 dəfə