Azərbaycanın regionları ilə tanışlıq şagirdlərin dünyagörüşünün formalaşmasında mühüm rol oynayacaq

Bakı:

11 °C

100 %

1 m/s

AZ RU EN

Ana səhifə / Mədəniyyət / Azərbaycanın regionları ilə tanışlıq şagirdlərin dünyagörüşünün formalaşmasında mühüm rol oynayacaq

Azərbaycanın regionları ilə tanışlıq şagirdlərin dünyagörüşünün formalaşmasında mühüm rol oynayacaq

20.08.2014 [09:46]

Avqustun 19-da səhər saatlarında Astara şəhərindəki Heydər Əliyev parkında böyük izdiham vardı. Rayonun rəhbər işçiləri, müəllimlər, valideynlər və ictimaiyyətin nümayəndələri “Ölkəmizi tanıyaq” layihəsi çərçivəsində təşkil olunmuş maarifləndirici tur-aksiyasının iştirakçılarını Gəncə-Şəmkir-Göygöl marşrutu üzrə yola salmaq üçün Astara şəhərinin mərkəzi meydanına toplaşmışdılar.
Hamının çöhrəsindən sevinc, şadlıq oxunurdu. Müəllimlər və valideynlər məktəblilərə son tapşırıqlarını verir, səyahət zamanı vacib olan məsələləri bir daha onlara xatırladırdılar.
AzərTAc xəbər verir ki, tur-aksiyanın iştirakçıları parkda Ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad ediblər.
Qrupun rəhbəri, Kijabə qəsəbə tam orta məktəbinin müəllimi Azər Kişiyev iştirakçıların fikrini ifadə edərək deyib: “Azərbaycan Respublikasının Prezidenti İlham Əliyevin tapşırığına əsasən, ölkəmizdə ilk dəfə keçirilən maarifləndirici tur-aksiyanın iştirakçıları -Astara rayonunun ümumtəhsil məktəblərinin IX-XI sinif şagirdləri və onların müəllimləri dörd gün ərzində Gəncə şəhərinin, Şəmkir və Göygöl rayonlarının tarixi abidələri, sosial-iqtisadi inkişafı, görməli yerləri ilə yaxından tanış olacaqlar. Azərbaycanın regionları ilə tanışlıq şagirdlərin dünyagörüşünün formalaşmasında mühüm rol oynayacaq. Bizə bu imkanı yaradan dövlətimizin başçısına minnətdarıq”.
Astara şəhərindəki 2 nömrəli tam orta məktəbin XI sinif şagirdi Jalə Əlizadə çox həyəcanlı görünürdü. O, keçirdiyi hissləri bu sözlərlə ifadə edib: “Çox həyəcanlıyam. İlk dəfədir ki, tur-aksiyada iştirak edirəm. Ekskursiyanın proqramı ilə tanışam. Proqram çox zəngindir. Dahi Azərbaycan şairi Nizaminin vətəni qədim Gəncə şəhərini görmək mənim çoxdankı arzum idi. Artıq bu arzum reallığa çevrilib. Bizə bu imkanı Prezident İlham Əliyev yaradıb. Göstərilən diqqət və qayğıya görə dövlətimizin başçısına “Çox sağ olun!” deyirik”.
Ekskursiyanın digər iştirakçıları - Pensər kənd 1 nömrəli tam orta məktəbin X sinif şagirdi Elnarə Həsənova, Kijabə qəsəbə tam orta məktəbinin müəllimi Şeyda Babayeva, Astara şəhərindəki 2 nömrəli tam orta məktəbin XI sinif şagirdi Emilya Babayeva və başqaları da tur-aksiyanın təşkilindən razılıqlarını bildiriblər.
Bir azdan meydana toplaşanların xeyir-duası ilə avtobus Gəncə-Şəmkir-Göygöl marşrutu istiqamətində yola düşüb.

Paylaş:

Baxılıb: 1150 dəfə