Akademik Milli Dram Teatrı dünyanın əsas teatrları sırasında…

Bakı:

25 °C

65 %

2 m/s

Əlaqə

AZ RU EN

Ana səhifə / Mədəniyyət / Akademik Milli Dram Teatrı dünyanın əsas teatrları sırasında…

Akademik Milli Dram Teatrı dünyanın əsas teatrları sırasında…

23.11.2023 [14:18]

Müşfiqə

Azərbaycan IX Sankt-Peterburq Beynəlxalq Mədəniyyət Forumunda təmsil olunub. “Birləşmiş mədəniyyətlər forumu” adı altında gerçəkləşən forumda 73 ölkədən nümayəndə heyəti, eləcə də 30 ölkənin mədəniyyət nazirləri iştirak edib.

Eləcə də Akademik Milli Dram Teatrı Forumda təmsil olunub. Forum çərçivəsində teatr sənətinə həsr olunan xüsusi paneldə Rusiya, Belarus və Serbiya milli teatrlarının rəhbərləri ilə yanaşı, Azərbaycan Dövlət Akademik Milli Dram Teatrının direktor səlahiyyətlərini icra edən Əməkdar mədəniyyət işçisi İlham Əsgərov çıxış edib. Səfər çərçivəsində Aleksandrinsk Teatrın direktoru Sergey Yemelyanov, Belarus Akademik Milli Teatrının direktoru Aleksandr Şestakov və Serbiya Respublikasının Milli Teatrının direktoru Diana Qrbiç ilə görüşüb, qarışılıqlı əməkdaşlıq, qastrol səfərlərinin və festivalların təşkili haqqında müzakirələr aparıb.

Görüşlə bağlı “Yeni Azərbaycan”a çıqlama verən İlham Əsgərov bildirib ki, Rusiyanın çoxəsrlik tarixə malik milli teatrı olan Aleksandrinski Teatrı ilə əməkdaşlıq əlaqələrinin qurulması Azərbaycan-Rusiya mədəni əlaqələrinin daha möhkəmlənməsinə kömək edəcək, dostluq və yaradıcılıq münasibətlərinin inkişafına töhfə verəcək: “Forum çərçivəsində təşkil olunan panel teatr rəhbərlərinin şəxsi tanışlığı, yaradıcı əlaqələrinin genişlənməsi, müasir teatr istiqamətlərinin müzakirəsi baxımından çox faydalı oldu. Səfər çərçivəsində Aleksandrinski Teatrın direktoru Sergey Yemelyanovla 2024-cü ildə qarşılıqlı səfərlərin təşkili məsələsini müzakirə edərək razılığa gəldik. Akademik Milli Dram Teatrı 2024-cü ilin sentyabrında Sankt-Peterburqda keçiriləcək XV Beynəlxalq Teatr Festivalında iki tamaşa ilə çıxış edəcək. Aleksandrinski Teatrı isə həmin ilin oktyabrında iki tamaşa ilə Bakıya qastrol səfərinə dəvət olunub. Eyni zamanda “Milli Teatr Məktəbi” layihəsi çərçivəsində Bakıda master-klass və mühazirələr keçiriləcək, mədəniyyət menecerləri üçün əyani üç günlük ixtisasartırma proqramı təşkil olunacaq”.

Akademik Milli Dram Teatrı Belarus Akademik Milli Teatrı və Serbiya Respublikası Milli Teatrı ilə də əməkdaşlıq əlaqələri üzərində çalışır: “Gələcəkdə dünyanın ən böyük teatrları ilə yaradıcı əlaqələrinin qurulması istiqamətində də vacib addımlar atılacaq. Azərbaycanın teatr tarixi, müasir teatr mühiti və tamaşalarımız onlar üçün maraqlıdır, dostluq və əməkdaşlıq etmək istəyirlər. Məqsədimiz Milli Teatrı beynəlxalq teatr mühitinin ən vacib üzvünə çevirmək, dünyanın böyük teatrlarının yaxın tərəfdaşı etməkdir”.

Paylaş:

Baxılıb: 770 dəfə