Roma Opera Teatrında Cüzeppe Verdinin “Foskari ailəsinin iki nümayəndəsi” operasının yeni quruluşda nümayişi olub

Bakı:

26 °C

53 %

3 m/s

AZ RU EN

Ana səhifə / Siyasət / Roma Opera Teatrında Cüzeppe Verdinin “Foskari ailəsinin iki nümayəndəsi” operasının yeni quruluşda nümayişi olub

Roma Opera Teatrında Cüzeppe Verdinin “Foskari ailəsinin iki nümayəndəsi” operasının yeni quruluşda nümayişi olub

08.03.2013 [17:22]

Azərbaycanın birinci xanımı Mehriban Əliyeva operanın yeni quruluşda premyerasına tamaşa edib
AzərTAc xəbər verir ki, martın 6-da Roma Opera Teatrında Cüzeppe Verdinin “Foskari ailəsinin iki nümayəndəsi” operasının yeni quruluşda nümayişi olub.
Azərbaycanın birinci xanımı, Heydər Əliyev Fondunun prezidenti Mehriban Əliyeva operanın yeni quruluşda premyerasına tamaşa edib.
Mehriban xanım Əliyevanı Roma Opera Teatrının idarə heyətinin sədri, İtaliya paytaxtının meri Covanni Alemanno qarşılayıb.
Roma opera teatrı 1880-ci ildə açılıb. Məhz bu teatrda Ciakomo Puççininin “Toska”, Pyetro Maskanyinin “Maskalar” və digər tanınmış bəstəkarların operalarının premyeraları olub. Bu səhnədə Cemma Bellinçoni, Hariklea Darkle, Antonio Kotonyi, Enrike Karuzo, Tito Skipa, Mersedes Lyopart kimi görkəmli ifaçılar çıxış ediblər.
Azərbaycanın birinci xanımı Mehriban Əliyeva teatrın direktoru Kapello De Martino, Roma Opera Teatrı Fondunun prezidenti xanım Daniella Traldi, İtaliyanın müdafiə naziri Giampaolo Di Paola, İtaliya Konstitusiya Məhkəməsinin sədri Franko Qallo, parlament məsələləri üzrə nazir Dino Piero Giarda və İtaliyanın digər ictimai-siyasi xadimləri ilə görüşüb. Azərbaycan ilə İtaliya arasında müxtəlif istiqamətlərdə, o cümlədən mədəniyyət sahəsində əlaqələrin inkişafından məmnunluq ifadə olunan görüşdə Heydər Əliyev Fondunun ölkələrimiz arasında münasibətlərin inkişafına töhfə verdiyi vurğulanıb.
Sonra operanın vətəni sayılan İtaliya paytaxtında Rikardo Mutinin dirijorluğu ilə Cüzeppe Verdinin “Foskari ailəsinin iki nümayəndəsi” operasının yeni quruluşda təqdimatı olub.
Lord Bayronun eyniadlı tragediyası əsasında yazılan əsər ilk dəfə 1844-cü ildə məhz Romada “Arcentino” teatrında səhnələşdirilib. Operanın əsas qəhrəmanları Françesko Foskari, Yakopo Foskari, Lukretsiya və Loredanodur. Hadisə 1457-ci ildə Venesiyada baş verir. Bayronun bu tragediyası zahirən az effektli görünsə də, psixoloji dərinlikləri ilə fərqlənir. Buradakı ziddiyyətlər əsas qəhrəmanların düşdüyü vəziyyəti açmağa imkan verir. Operada sevgi intriqası yoxdur, onun əsas məzmununu siyasi mübarizənin qurbanına çevrilən Foskari nəslinin faciəvi taleyi təşkil edir. Əsərdə əsas diqqət lirik səhnələrə yönəlib. İlk dəfə olaraq məhz bu operada Cüzeppe Verdi üç aktdan ibarət struktura müraciət edib. Operanın kompozisiyasına gəlincə isə 1-ci və 3-cü pərdədə hadisələr bir-birini sürətlə əvəzləyir, 2-ci pərdə isə əsərin lirik xarakterinin açılmasına xidmət edir. Operanın yekun akkordu faciəvi gücünə görə Verdinin digər əsərlərindəki musiqidən çox fərqlənir və bəstəkarın yaradıcılığının zirvəsi hesab edilir.
“Foskari ailəsinin iki nümayəndəsi” operasının yeni quruluşda təqdimatı tamaşaçıların sürəkli alqışları ilə qarşılanıb.
Sonra Azərbaycanın birinci xanımı London, La-Skala, Filadelfiya, hazırda isə Çikaqo simfonik orkestrinin dirijoru Rikardo Muti ilə görüşüb. Dünyanın ən görkəmli dirijorlarından olan maestro Roma Opera Teatrının da fəxri dirijorudur və bu sənət məbədində ən böyük premyeralarda orkestrə rəhbərlik edir.
Günün sonunda Azərbaycanın birinci xanımı Mehriban Əliyevanın şərəfinə Roma Opera Teatrının idarə heyətinin sədri, Roma şəhərinin meri Covanni Alemanno tərəfindən şam yeməyi verilib.

Paylaş:

Baxılıb: 1158 dəfə