Azərbaycan ilə Fransa arasında kənd təsərrüfatı sahəsində əməkdaşlığın perspektivləri müzakirə edilib

Bakı:

23 °C

60 %

12 m/s

AZ RU EN

Ana səhifə / Siyasət / Azərbaycan ilə Fransa arasında kənd təsərrüfatı sahəsində əməkdaşlığın perspektivləri müzakirə edilib

Azərbaycan ilə Fransa arasında kənd təsərrüfatı sahəsində əməkdaşlığın perspektivləri müzakirə edilib

31.10.2013 [09:41]

Oktyabrın 30-da Fransanın Burqundiya regionunun Yon vilayətinin Ali Şurasının prezidenti Andre Vilyenin başçılıq etdiyi nümayəndə heyəti Kənd Təsərrüfatı Nazirliyində olub.
AzərTAc xəbər verir ki, görüşdə Azərbaycan ilə Fransa arasında kənd təsərrüfatı sahəsində əməkdaşlığın perspektivləri müzakirə edilib.
Kənd təsərrüfatı naziri Heydər Əsədov görüşün iki ölkənin aqrar sahədə əməkdaşlığının genişləndirilməsinə töhfə verəcəyini bildirib. Azərbaycan ilə Fransa arasında əlaqələrin uğurla davam etdirildiyini deyən nazir kənd təsərrüfatı sahəsində də əməkdaşlığın inkişaf etdiyini vurğulayıb.
Nazir Azərbaycanda üzümçülük və şərabçılıq sahəsinin inkişafı barədə qonaqlara məlumat verib. Bildirilib ki, ölkəmizdə üzümün yetişdirilməsi və onun emalı qədim və ənənəvi sahələrdən biridir. Ötən əsrin 70-80-ci illərində Azərbaycanda üzümçülük və şərabçılıq ən yüksək inkişaf dövrünü yaşayıb. Ümummilli lider Heydər Əliyevin rəhbərliyi ilə həyata keçirilən tədbirlər nəticəsində üzümçülüyün yüksək templə inkişafına nail olunub, emal müəssisələrinin maddi-texniki bazası möhkəmləndirilib, güclü kadr potensialı yaradılıb. Fransanın üzümçülük və şərabçılıq sahəsindəki tarixi təcrübəsindən istifadə edərək əməkdaşlığı genişləndirmək, fransız mütəxəssisləri ilə fikir mübadiləsi aparmaq zəruridir. Azərbaycanda fəaliyyət göstərən şərab zavodları ilə Avropa ölkələrinin şərabçılıq müəssisələri arasında əməkdaşlıq əlaqələrinin qurulması, yeni müştərək müəssisələrin yaradılması ölkəmizdə üzümçülük və şərabçılığın inkişafına güclü təkan verə biləcək amillərdən biridir.
Azərbaycanda Prezident İlham Əliyev tərəfindən aqrar sahəyə göstərilən diqqət və qayğıdan, əldə olunan nailiyyətlərdən danışan nazir bildirib ki, kənd təsərrüfatı istehsalının artırılması üçün böyük potensial var.
Heydər Əsədovu gələn ilin mart ayında Fransada keçiriləcək kənd təsərrüfatı sərgisinə dəvət edən Andre Vilye iki ölkə arasında kənd təsərrüfatı sahəsində əməkdaşlıqda maraqlı olduğunu bildirib, bu sahənin inkişafına dəstək verəcəklərini söyləyib.
Beynəlxalq Üzüm və Şərab Təşkilatının Baş katibi Federiko Kasteluççi Azərbaycanın bu təşkilata üzv olduğunu və ölkənin süfrə və texniki üzüm sortları baxımından böyük potensiala malik olduğunu bildirib. O, fransalı ekspertlərin Azərbaycana göndərilməsini, hər iki ölkə arasında kadr hazırlığı üzrə proqramların həyata keçirilməsini məqsədəuyğun hesab edib.
Yekunda nazir Heydər Əsədov bu görüşlərin mütəmadi olacağını və gələcək əməkdaşlığın daha da inkişaf etdiriləcəyinə töhfə verəcəyini bildirib.

Paylaş:

Baxılıb: 1074 dəfə