Bolqarıstanın Baş naziri Plamen Oreşarski Azərbaycana rəsmi səfərə gəlib

Bakı:

28 °C

57 %

2 m/s

Əlaqə

AZ RU EN

Ana səhifə / Siyasət / Bolqarıstanın Baş naziri Plamen Oreşarski Azərbaycana rəsmi səfərə gəlib

Bolqarıstanın Baş naziri Plamen Oreşarski Azərbaycana rəsmi səfərə gəlib

20.02.2014 [09:41]

Bolqarıstan Respublikasının Baş naziri Plamen Oreşarski fevralın 19-da Azərbaycan Respublikasına rəsmi səfərə gəlib.
Hər iki ölkənin dövlət bayraqlarının dalğalandığı Heydər Əliyev Beynəlxalq Aeroportunda Bolqarıstanın Baş nazirinin şərəfinə fəxri qarovul dəstəsi düzülüb.
Bolqarıstanın və Azərbaycanın dövlət himnləri səsləndirilib.
Bolqarıstan Respublikasının Baş naziri Plamen Oreşarskini Azərbaycan Respublikası Baş nazirinin müavini İsmət Abasov və digər rəsmi şəxslər qarşılayıblar.
* * *
Fevralın 19-da Azərbaycana rəsmi səfəri çərçivəsində Bolqarıstan Respublikasının Baş naziri Plamen Oreşarskinin başçılıq etdiyi nümayəndə heyəti İçərişəhərlə tanış olub.
Əvvəlcə qonaqlara paytaxt Bakının qədim tarixi rəmzlərindən biri, milli memarlığımızın nadir nümunəsi, UNESCO-nun Dünya İrs Siyahısına daxil edilən Qız qalası abidəsinin qeyri-adi memarlıq özəllikləri barədə məlumat verilib.
Baş nazir Plamen Oreşarski və nümayəndə heyəti Kiçik Qala küçəsində təndir çörəyinə qonaq edilib.
Gəzinti zamanı qonaqlar orta əsr Şərq memarlığının şah əsəri, dünya əhəmiyyətli tarix-memarlıq abidəsi olan “Şirvanşahlar sarayı kompleksi” ilə tanış olublar.
Sonra Bolqarıstanın Baş naziri qədim əşyalar, ipək yaylıqlar və xalçalar satılan dükanlarda sənətkarlıq nümunələri ilə tanış olub.
Daha sonra Bolqarıstanın Baş naziri Plamen Oreşarski “İçərişəhər” Dövlət Tarix-Memarlıq Qoruğunun fəxri qonaqlar kitabına ürək sözlərini yazıb.
Azərbaycan paytaxtının qədim guşəsi ilə tanışlıqdan xatirə olaraq qonağa hədiyyə təqdim edilib.
* * *
Fevralın 19-da Bolqarıstanın Baş naziri Plamen Oreşarski Azərbaycana rəsmi səfəri çərçivəsində Dövlət Bayrağı Meydanı ilə tanış olub.
Bolqarıstanın Baş nazirinə məlumat verilib ki, Dövlət Bayrağı Meydanının təməli 2007-ci il dekabrın 30-da Prezident İlham Əliyevin iştirakı ilə qoyulub. Meydan üçün seçilmiş yer Dövlət Bayrağının paytaxtın müxtəlif nöqtələrindən görünməsinə imkan yaradır. 2010-cu il sentyabrın 1-də isə Prezident, Silahlı Qüvvələrin Ali Baş Komandanı İlham Əliyevin iştirakı ilə Dövlət Bayrağı Meydanının təntənəli açılış mərasimi keçirilib.
Bildirilib ki, meydandakı bayraq dirəyinin hündürlüyü 162 metrdir. Qurğunun ümumi çəkisi 220 tondur. Bayrağın eni 35 metr, uzunluğu 70 metr, ümumi sahəsi 2450 kvadratmetr, çəkisi isə təqribən 350 kiloqramdır.
Diqqətə çatdırılıb ki, meydanda qurulmuş Azərbaycan Respublikasının gerbi, dövlət himninin mətni və ölkəmizin xəritəsi qızıl suyuna salınmış bürüncdən hazırlanıb.
Baş nazir Plamen Oreşarski Prezident İlham Əliyevin təşəbbüsü ilə meydanda səkkizguşəli ulduz formasında yaradılmış Dövlət Bayrağı Muzeyi ilə də tanış olub.
Baş nazir Plamen Oreşarski muzeyin fəxri qonaqlar kitabına ürək sözlərini yazıb.
Bolqarıstan Respublikasının Baş nazirinə xatirə hədiyyəsi təqdim olunub.