“Nezavisimaya qazeta”: İlk dəfədir ki, Rusiya sərhədlərindən kənarda belə yüksək səviyyəli tədbir keçirilir

Bakı:

22 °C

54 %

2 m/s

AZ RU EN

Ana səhifə / Siyasət / “Nezavisimaya qazeta”: İlk dəfədir ki, Rusiya sərhədlərindən kənarda belə yüksək səviyyəli tədbir keçirilir

“Nezavisimaya qazeta”: İlk dəfədir ki, Rusiya sərhədlərindən kənarda belə yüksək səviyyəli tədbir keçirilir

30.12.2014 [09:41]

Rusiyada çıxan “Nezavisimaya qazeta” nəşrində yaxın xarici ölkələr siyasəti şöbəsinin icmalçısı Viktoriya Panfilovanın Heydər Əliyev Mərkəzində Azərbaycanın birinci xanımı, Heydər Əliyev Fondunun prezidenti Mehriban Əliyevanın təşəbbüsü ilə böyük rus şairi Mixail Lermontovun anadan olmasının 200 illiyinə həsr edilmiş tədbirlərdən bəhs edən məqaləsi dərc edilib.
Məqalədə deyilir: “Mixail Lermontovun yaradıcılığı və həyatı haqqında bu günlərdə Bakıda danışılıb. Heydər Əliyev Mərkəzində Azərbaycanın birinci xanımı, Heydər Əliyev Fondunun prezidenti Mehriban Əliyevanın təşəbbüsü ilə Mixail Lermontovun 200 illiyinə həsr edilmiş tədbirlər, o cümlədən Fondun icraçı direktoru Anar Ələkbərovun moderatorluğu ilə “M.Y.Lermontovun yaradıcılıq irsi dünya mədəniyyətinin tərkib hissəsi kimi” adlı “dəyirmi masa” və Azərbaycan Mədəniyyət və Turizm Nazirliyi tərəfindən, Eduard Artemyevin “Mələk” əsərinin dünya premyerasının da səsləndiyi bayram konserti keçirilib. “Lermontov irsi” Assosiasiyasının prezidenti, Rusiya Federasiyasının ictimai palatasının üzvü Mixail Lermontov da Fondun dəvəti ilə Bakıya gəlmişdi.
Çoxsaylı qonaqlar “Rəssam Lermontovun əsərlərinin reproduksiyaları”, “Şairin bədii obrazı uşaqların gözü ilə”, “Lermontovun şəxsiyyətinin və ədəbi yaradıcılığının Azərbaycan Dövlət Rəssamlıq Akademiyasının tələbələri və müəllimləri tərəfindən təqdimatı” bölmələrindən ibarət sərgi ilə tanış olublar. Bakıda böyük şairin şərəfinə bayram tədbirləri müxtəlif ölkələrdə keçirilmiş dünya tədbirlərinin vacib hissəsi idi”.
Məqalə müəllifi Heydər Əliyev Fondunun vitse-prezidenti Leyla Əliyevanın nitqindən sitat gətirir: “Azərbaycanda böyük rus mədəniyyətinə və ədəbiyyatına həmişə dərin məhəbbət və ehtiramla yanaşıblar. Bu günün özündə ölkəmizin məktəblərində rus dilinin öyrənilməsi tam həcmdə saxlanılıb, Rus Dram Teatrı, Rus Mədəniyyət Mərkəzi, Bakı Slavyan Universiteti fəaliyyət göstərir, M.V.Lomonosov adına Moskva Dövlət Universitetinin Bakı filialı mövcuddur. Əlbəttə, biz, Lermontovun Azərbaycan dilini öyrənməsi ilə çox qürur duyuruq. Böyük maarifçi, filosof və Azərbaycan dramaturgiyasının banisi Mirzə Fətəli Axundzadə Lermontovun müəllimi olub”.
Viktoriya Panfilovanın sözlərinə görə, Qafqaz Lermontovu özünə cəlb edib, o burada həyatın dolğunluğunu hiss edib. V.Panfilova yazıb: “O dövrdə Rusiyada təhsilli adamlar arasında Qafqazı Mixail Lermontov kimi yaxşı bilən az idi. Ona görə də Azərbaycanda Lermontovun yaradıcılığına xüsusi münasibət var. Eynilə Rusiyada Azərbaycan şairlərinin yaradıcılığını yüksək qiymətləndirirlər: Sankt-Peterburqda Nizamiyə, Moskvada isə Axundova abidə ucaldılıb. Azərbaycanda Lermontovun 200 illiyinin belə yüksək səviyyədə qeyd edilməsi nəzərdən qaçmayacaq. Təntənəli gecədə “Lermontov irsi” Assosiasiyasının prezidenti Mixail Lermontovun qeyd etdiyi kimi, “Rusiya sərhədlərindən kənarda belə yüksək səviyyəli tədbir ilk dəfədir ki, keçirilir”. O, Lermontovlar ailəsi adından minnətdarlığını bildirərək vurğulayıb ki, şairin ən unudulmaz əsərləri Qafqazda yaradılıb, Azərbaycanda böyük şairin yaradıcılığına göstərilən münasibətdən qürur duyur”.

Paylaş:

Baxılıb: 682 dəfə