Regional güc mərkəzi olan Azərbaycan pozitiv beynəlxalq imicə malikdir

Bakı:

30 °C

49 %

2 m/s

Əlaqə

AZ RU EN

Ana səhifə / Siyasət / Regional güc mərkəzi olan Azərbaycan pozitiv beynəlxalq imicə malikdir

Regional güc mərkəzi olan Azərbaycan pozitiv beynəlxalq imicə malikdir

07.10.2015 [10:05]

Bir çox ölkələrin rəsmiləri, ekspertlər, o cümlədən dünya mətbuatı Azərbaycanın inkişafını, daxili və xarici siyasətini yüksək qiymətləndirir, əldə edilən nailiyyətləri təqdirəlayiq hal kimi xarakterizə edirlər
Müstəqil xarici siyasət kursuna malik olan Azərbaycan Cənubi Qafqaz regionunun lider dövləti olmaqla yanaşı, müasir beynəlxalq münasibətlər sistemində etibarlı tərəfdaş kimi tanınır. Milli maraqlara müvafiq surətdə reallaşdırılan xarici siyasət sayəsində ölkəmiz həm ikitərəfli münasibətlər, həm də beynəlxalq təşkilatlar çərçivəsində səmərəli və qarşılıqlı-faydalı əməkdaşlıq əlaqələri formalaşdırıb.
Azərbaycanın xarici siyasəti həyata keçirilən səmərəli daxili siyasətə uyğundur, başqa sözlə, bu kursu tamamlayır. Uğurlu daxili və xarici siyasətin fonunda Azərbaycanın dinamik inkişaf strategiyası rasional səciyyə daşıyır, eləcə də ölkəmiz heç bir beynəlxalq qurumdan, milli dövlətdən asılı olmayan müstəqil siyasət kursuna malikdir. Yəni Azərbaycanda həyata keçirilən siyasət sırf ölkənin milli maraqlarına söykənir və əsas strateji hədəf uzunmüddətli inkişafın təmin olunmasıdır. Bundan başqa, ölkəmizin beynəlxalq mövqeyi davamlı olaraq möhkəmlənir, Azərbaycan beynəlxalq münasibətlər sisteminin nüfuz və güc iyerarxiyasında mütəmadi yüksəlişə malikdir. Rasional inkişaf strategiyasının həyata keçirilməsi bütün sahə və sektorların inkişafını təmin etməklə yanaşı, Azərbaycan iqtisadiyyatının beynəlxalq iqtisadi sistemə uğurlu inteqrasiyasına da təkan verir. Ölkə iqtisadiyyatı dünyanın rəqabətqabiliyyətli iqtisadiyyatları pilləsində davamlı surətdə irəliləyir.
Bunlara paralel olaraq Cənubi Qafqaz geosiyasi məkanının lider dövləti olan Azərbaycan sahib olduğu zəngin enerji ehtiyatlarından səmərəli şəkildə istifadə etməklə beynəlxalq miqyasda enerji təhlükəsizliyinin təmin edilməsində mühüm rol oynayan başlıca aktorlardan biri kimi çıxış edir. Ölkəmiz milli dövlətçilik prinsiplərinə müvafiq olaraq həyata keçirilən praqmatik və rasional siyasət nəticəsində miqyasına görə regional, əhəmiyyətinə görə isə qlobal xarakterli transmilli layihələrin mərkəzi oyunçusuna çevrilib. Təsadüfi deyil ki, Xəzər dənizinə xarici sərmayədarları ilk dəfə dəvət etməklə uzunmüddətli qarşılıqlı-faydalı əməkdaşlığın sağlam təməlini atan Azərbaycanın iştirakı olmadan bu gün regionda heç bir layihə gerçəkləşdirilmir.
O da qeyd edilməlidir ki, bu günə qədər həyata keçirilən və əməkdaşlığa təkan verən layihələrdə Azərbaycanın siyasi iradəsi və qətiyyəti öz sözünü deyib. Bu kontekstdə Azərbaycanın səmərəli və çoxşaxəli xarici siyasəti sayəsində Xəzər regionunun təhlükəsizliyinin təmin olunması təkcə regional əhəmiyyət kəsb etmir, beynəlxalq xarakter daşıyır. Çünki Xəzər regionunun təhlükəsizliyi Avropanın enerji təhlükəsizliyinin təmin olunmasında da mühüm faktor kimi çıxış edir. Belə ki, Avropa Xəzər regionunun özünün enerji təhlükəsizliyinin təmin olunmasında, qarşılıqlı-faydalı əməkdaşlıq platformalarının gerçəkləşdirilməsində Azərbaycanın enerji siyasətinin əhəmiyyətini xüsusi olaraq qeyd edir. Çünki Azərbaycan enerji ehtiyatlarının ixracında çoxvariantlı nəqletmə sisteminə - diversifikasiya edilmiş təchizata üstünlük verir və dünyanın aparıcı dövlətləri tərəfindən etibarlı strateji tərəfdaş kimi qiymətləndirilir. Müstəqil enerji siyasəti ölkəmizin beynəlxalq arenadakı mövqeyini, həmçinin regionun və regionətrafı coğrafiyanın strateji təhlükəsizliyini daha da gücləndirir. Digər tərəfdən, Azərbaycanın səmərəli enerji siyasəti yeni əməkdaşlıq platforması müəyyənləşdirməklə yanaşı, Avrasiyanın enerji xəritəsinin zənginləşməsinə strateji töhfələr verir.
Bütün bunları nəzərə alan bir çox ölkələrin rəsmiləri, ekspertlər, o cümlədən dünya mətbuatı Azərbaycanın inkişafını yüksək qiymətləndirir, əldə edilən nailiyyətləri təqdirəlayiq hal kimi xarakterizə edirlər. Bununla yanaşı, Azərbaycanın həyata keçirdiyi siyasət, dünyaya təqdim etdiyi mütərəqqi dəyərlər xüsusilə vurğulanır. Məsələn, Avropa Şurası Parlament Assambleyasının (AŞPA) payız sessiyasının plenar iclasında Avropa Şurasının (AŞ) baş katibi Tyobörn Yaqland son proseslər çərçivəsində diqqətə çatdırıb ki, Türkiyə və Azərbaycan kimi müsəlman əhalisi olan ölkələr öz qapılarını qaçqınların üzünə açmağa daha çox hazırdırlar. Biz isə Avropada qapıları daha çox qaçqınların üzünə bağlayırıq, hətta onları qovuruq.
Bundan başqa, Bolqarıstanın vitse-prezidenti Marqarita Popova da Azərbaycanın daxili və xarici siyasət kursunun təqdirəlayiq olduğunu diqqətə çatdırıb. O bildirib ki, Azərbaycanı müstəqil, sabit və iqtisadi uğurlu bir ölkəyə çevirdiyi üçün Prezident İlham Əliyevi təbrik etmək olar. Avropa İttifaqı Azərbaycanın korrupsiyaya qarşı mübarizə təcrübəsindən istifadə etməlidir.
Praqa Metropolitan Universitetinin beynəlxalq münasibətlər və Avropaşünaslıq Departamentinin rəhbəri, Beynəlxalq və Təhlükəsizlik məsələləri üzrə Mərkəzi Avropa Jurnalının (CEJİSS) baş redaktoru Mitçel Belfer isə diqqətə çatdırıb ki, Azərbaycan Avropa üçün əsas enerji aktorudur və belə olmağa davam edəcək: “Çexiya Azərbaycanın karbohidrogen məhsullarından asılıdır. Avropada bir çoxları bu fikri səsləndirirlər ki, Azərbaycan bütün öhdəliklərini yerinə yetirir və heç də bütün dövlətlər belə yüksək maliyyə intizamı ilə fərqlənmirlər. Əgər Avropa ittifaqı öz siyasətini iqtisadi artım və həmrəylik, siyasi harmoniya və hərbi potensialın birləşdirilməsi istiqamətində davam etdirsə, Azərbaycan daha irəli gedəcək və Avropanın strateji prioritetləri arasında mərkəzi yer tutacaq”.
M.Belfer onu da diqqətə çatdırıb ki, Dağlıq Qarabağ məsələsində heç bir güzəşt olmamalıdır, Dağlıq Qarabağ suveren Azərbaycanın ərazisidir.
Beləliklə deyilənlər həm də onun göstəricisidir ki, Azərbaycan özünün çoxvektorlu və balanslaşdırılmış xarici siyasət strategiyası ilə həm ikitərəfli münasibətlər kontekstində, həm də çoxşaxəli əlaqələr fonunda regional miqyaslı, qlobal xarakterli əməkdaşlıqlar platformasının mərkəzi oyunçusu rolunu oynamaqdadır. Ən əhəmiyyətlisi isə odur ki, bütün bunlar Azərbaycanın beynəlxalq mövqeyinin möhkəmlənməsinə, əməkdaşlığa əsaslanan tərəfdaşlıq münasibətlərinin inkişafına təkan verir, eyni zamanda, perspektiv nailiyyətlər üçün strateji zəmin rolunu oynayır. Bunlar ölkəmizin milli maraqlarına uyğun olmaqla bərabər, Azərbaycanın suverenlik səviyyəsini, heç bir dövlətdən, təşkilatdan asılı olmadığını da təsdiq edir.
Nurlan QƏLƏNDƏRLİ

Paylaş:

Baxılıb: 565 dəfə