Çernobıl qəzasından 23 il keçir

Bakı:

2 °C

80 %

9 m/s

Əlaqə

AZ RU EN

Ana səhifə / Siyasət / Çernobıl qəzasından 23 il keçir

Çernobıl qəzasından 23 il keçir

24.04.2009 [15:36]

İyirmi üç il əvvəl, 1986-cı il aprelin 26-da çernobıl Atom Elektrik Stansiyasının dördüncü blokunda texniki və texnoloji qəza dünyanı sarsıtdı. Böyük bir ərazi xarabazara çevrildi, yüz minlərlə adam radioaktiv şüalanmadan çarəsiz xəstəliyə, tədrici ölümə məhkum oldu. Azərbaycan çernobıl Əlilləri İttifaqının sədri, ikinci qrup əlil Mirhəsən Həsənov həmin hadisəni xatırlayaraq deyir: “SSRİ-də belə hadisələr əvvəllər də baş vermişdi. Ancaq o vaxt nüvə energetikasından istifadədə məxfilik hökm sürdüyündən bu hadisələr gizli saxlanılmış, heç bir məlumat verilməmişdi. çernobıl qəzası zamanı Sovet İttifaqına rəhbərlik edən Mixail Qorbaçov da dəhşətli qəzanın nəticələrini dünyadan gizlətməyə, faciənin miqyasını azaltmağa çalışırdı. O zaman əsasən gənclərdən ibarət yeddi min nəfərdən çox Azərbaycan vətəndaşı həyatını riskə qoyaraq çernobıla yollanmışdı. Məni də Minskdəki hərbi hissədən gətirmişdilər. Bizi qəzanın fəsadları barədə məlumatlandırmamış, bunu yanğın hadisəsi kimi qələmə vermişdilər. Heç bir hazırlıq keçməyən, radioaktiv şüalanma, radiasiya - gigiyena haqqında adi təsəvvürü olmayan neçə-neçə həmyerlimiz elə orada həyatla vidalaşmış, qalanları isə vətənə ömürlük əlil kimi qayıtmış, sonra ağır xəstəliklərə tutulmuşlar. Onlardan iki min nəfərdən çoxu artıq sıralarımızda yoxdur”.
Qəzanın aradan qaldırılmasında iştirak etmiş 5 min nəfərin hamısı isə 1-ci və 2-ci dərəcəli əlillərdir. Onların uşaqları da həmin qəzadan əziyyət çəkir. Fiziki və mənəvi zərbə aldıqlarına baxmayaraq, çernobılçılarımız uzun müddət diqqətdən kənarda qalıb, haqsızlıqlarla üzləşib, heç bir qayğı görməyiblər. Yalnız ulu öndər Heydər Əliyevin 1993-cü ildə xalqın təkidli tələbi ilə hakimiyyətə qayıdışından sonra onlar qayğı və diqqət ilə əhatə edildilər. 1993-cü ilin dekabrında Milli Məclisdə “çernobıl qəzasının ləğvində iştirak etmiş və həmin qəza nəticəsində zərər çəkmiş vətəndaşların statusu və sosial müdafiəsi haqqında” Qanun qəbul olundu. Bununla ümummilli lider Heydər Əliyev bu kateqoriyaya aid insanlara hörmət və ehtiramını bir daha göstərdi. Ulu öndərin layiqli davamçısı möhtərəm Prezident İlham Əliyevin də çernobıl əlillərinə münasibəti göz qabağındadır. Dövlətimizin başçısının imzaladığı “Azərbaycan dövlətinin ərazi bütövlüyünün, müstəqilliyinin və Konstitusiya quruluşunun müdafiəsi zamanı əlil olanlara, 1990-cı il 20 Yanvar hadisələri zamanı əlil olanlara, hərbi xidmət dövründə çernobıl qəzasının aradan qaldırılmasına cəlb edilmiş hərbi qulluqçulara və şəhid ailəsi üzvlərinə verilən müavinətlərin artırılması haqqında” Fərman onların maddi vəziyyətini xeyli yüngülləşdiribdir. çernobıl qəzasında əlil olanlar ayda 250-270 manat pensiya alırlar. İldə bir dəfə isə müalicə üçün onlara 150 manat verilir. çernobıl əlilləri Prezidentin fərdi təqaüdünü alan müharibə əlilləri kateqoriyasına daxil ediliblər. Hazırda birinci qrup çernobıl əlilləri 90 manat, ikinci qrup əlillər 70 manat, üçüncü qrup əlillər isə 50 manat Prezident təqaüdü alırlar. ölkədə əlillərin sosial reabilitasiyası üçün 12 mərkəz və 2 müalicə pansionatı fəaliyyət göstərir. çernobıl əlilləri dövlətimizin diqqət və qayğısından çox məmnundurlar. Təkcə ötən il çernobıl əlillərinə 48 mənzil verilib. Hazırda Nərimanov rayonunda onlar üçün yeni bina inşa olunur. Mingəçevirdə bərpa mərkəzinin tikintisinə başlanıb. Azərbaycan bu məqsədlə Belarus və Ukraynanın təcrübəsini öyrənib. Bərpa mərkəzlərində çernobıl əlilləri və onların ailə üzvlərinə tibbi xidmət də göstəriləcək, yeni peşə öyrədiləcək. Bakı şəhərində və regionlarda da sosial reabilitasiya mərkəzləri istifadəyə veriləcək. Artıq onlar üçün texniki avadanlıq da alınıb. Əminik ki, Azərbaycanın iqtisadi inkişafı, ölkəmizin maliyyə imkanları çernobılçıların mənzil şəraitini yaxşılaşdırmağa, sosial müdafiəsini gücləndirməyə, onlara tibb xidmətinin səviyyəsini yüksəltməyə kömək edəcək. Yeri gəlmişkən, 2009-2013-cü illəri əhatə edən regionların sosial-iqtisadi inkişafı Dövlət proqramında əlillərin mənzil təminatının daha da yaxşılaşdırılması nəzərdə tutulur.
Xatırladaq ki, əlamətdar ildönümü ərəfəsində İttifaqın üzvləri Fəxri Xiyabanda ulu öndər Heydər Əliyevin xatirəsini anıb, məzarı önünə əklil qoyublar. Görkəmli oftalmoloq alim, akademik Zərifə xanım Əliyevanın da məzarı üstünə gül dəstələri düzülüb. Daha sonra Şəhidlər Xiyabanında azadlığımız uğrunda canlarından keçmiş qəhrəmanlarımızın məzarları ziyarət olunub.

Paylaş:

Baxılıb: 1241 dəfə