İsmayıl Koncuk: Azərbaycan həmkarlar ittifaqları dünyadakı həmkarlar təşkilatları arasında nüfuz qazanıb

Bakı:

24 °C

54 %

2 m/s

AZ RU EN

Ana səhifə / Siyasət / İsmayıl Koncuk: Azərbaycan həmkarlar ittifaqları dünyadakı həmkarlar təşkilatları arasında nüfuz qazanıb

İsmayıl Koncuk: Azərbaycan həmkarlar ittifaqları dünyadakı həmkarlar təşkilatları arasında nüfuz qazanıb

10.10.2017 [10:04]

Oktyabrın 9-da Azərbaycan Həmkarlar İttifaqları Konfederasiyasının sədri, Milli Məclisin deputatı Səttar Möhbalıyev Azərbaycan Təhsil İşçiləri Azad Həmkarlar İttifaqının XVII hesabat-seçki konfransında iştirak edən Beynəlxalq Təhsil Birliyinin Avropa regionu üzrə direktoru Susan Floken, Türkiyə Təhsil İşçiləri Həmkarlar İttifaqının və Dövlət Qulluqçuları Həmkarlar İttifaqları Konfederasiyasının sədri İsmayıl Koncuk, Rusiya Elm və Təhsil İşçiləri Həmkarlar İttifaqının sədri Qalina Merkulova və digər xarici qonaqlarla görüşüb.
AZƏRTAC xəbər verir ki, görüşdə Səttar Möhbalıyev Azərbaycan həmkarlar ittifaqlarının tarixindən söz açıb. Qonaqlara bir sıra mühüm proqramların həyata keçirilməsində, qanunvericilik aktlarının qəbul olunmasında, sosial problemlərin həllində və digər işlərin görülməsində konfederasiyanın rolu barədə məlumat verib.
Həmçinin Azərbaycanda gedən geniş abadlıq-quruculuq işlərindən, regionların sosial-iqtisadi inkişafından, səhiyyə, idman və digər sosial sahələrdə aparılan işlərdən söhbət açılıb.
Sonra Beynəlxalq Təhsil Birliyinin Avropa regionu üzrə direktoru Susan Floken qarşılıqlı əlaqələrin əhəmiyyətindən danışıb. O deyib: “Azərbaycanın yerləşdiyi ərazi region üçün strateji əhəmiyyət daşıyır. Burada fəaliyyət göstərən Azərbaycan Təhsil İşçiləri Azad Həmkarlar İttifaqı bizim üçün doğma bir təşkilatdır. Bu təşkilatla gələcəkdə də əməkdaşlığı davam etdirəcəyik, yeni-yeni uğurlara imza atacaq və qarşılıqlı surətdə münasibətlərimizi inkişaf etdirəcəyik”.
Geniş məlumata, ətraflı izahata görə minnətdarlığını bildirən qonaq deyib ki, təhsil sahəsində qeyri-bərabərlik məsələsini hər zaman gündəmdə saxlamaq lazımdır və Azərbaycan Təhsil İşçiləri Azad Həmkarlar İttifaqı Respublika Komitəsi bunu həmişə gündəmdə saxlamağa çalışır. “Mənim təşkilatım da digər sahələr kimi müəllimlərin iş şəraitinin yaxşılaşdırılması və təkmilləşdirilməsi sahəsində müəyyən yardımlar göstərir”, - deyə Susan Floken vurğulayıb.
Söhbət zamanı çıxış edən Türkiyə Təhsil İşçiləri Həmkarlar İttifaqının və Dövlət Qulluqçuları Həmkarlar İttifaqları Konfederasiyasının sədri İsmayıl Koncuk bildirib ki, beynəlxalq aləmdə Azərbaycan kifayət qədər öz varlığını göstərən bir ölkədir. O, həmkarlar ittifaqları ilə uzunmüddətli əlaqələri yüksək qiymətləndirib və bu münasibətlərin daha da genişləndirilməsinin vacibliyindən danışıb. Qeyd edilib ki, Azərbaycan həmkarlar ittifaqları dünyadakı həmkarlar təşkilatları arasında nüfuz qazanıb, bu sahədə işləri daha da yaxşılaşdırmaq üçün bütün səylər birləşdirilməlidir.
Rusiya Elm və Təhsil İşçiləri Həmkarlar İttifaqının sədri Qalina Merkulova Azərbaycan Təhsil İşçiləri Azad Həmkarlar İttifaqı Respublika Komitəsi ilə əməkdaşlığa xüsusi əhəmiyyət verdiklərini və dostluq əlaqələrinin daha da inkişaf etməsini arzuladıqlarını bildirib.
Görüşdə qarşılıqlı maraq doğuran məsələlər ətrafında fikir mübadiləsi aparılıb.

Paylaş:

Baxılıb: 476 dəfə