Şəhid ailələrinə diqqət və qayğı göstərilməsi Azərbaycanda həyata keçirilən sosial siyasətin mühüm istiqamətlərindən biridir

Bakı:

26 °C

50 %

10 m/s

AZ RU EN

Ana səhifə / Siyasət / Şəhid ailələrinə diqqət və qayğı göstərilməsi Azərbaycanda həyata keçirilən sosial siyasətin mühüm istiqamətlərindən biridir

Şəhid ailələrinə diqqət və qayğı göstərilməsi Azərbaycanda həyata keçirilən sosial siyasətin mühüm istiqamətlərindən biridir

05.02.2019 [09:47]

Şəhid ailələrinin sosial müdafiəsinin gücləndirilməsi istiqamətində reallaşdırılan məqsədyönlü tədbirlər ardıcıl xarakter daşıyır
Azərbaycanda dövlət siyasətinin çox mühüm tərkib hissəsini sosial siyasət təşkil edir. Əhalinin sosial müdafiəsinin gücləndirilməsi, insanların sosial rifah halının daha da yaxşılaşdırılması istiqamətində görülən ardıcıl və məqsədyönlü işlər çərçivəsində şəhid ailələri, müharibə əlilləri də yüksək dövlət qayğısı ilə əhatə olunublar. Ümumiyyətlə, şəhid ailələrinə diqqət və qayğı Prezident İlham Əliyevin həyata keçirdiyi siyasi kursun mühüm istiqamətlərindən biridir. İndiyə qədər bu kateqoriyadan olan vətəndaşlara 6654 mənzil, 6144 avtomobil, ötən il isə 626 mənzil verilib. Bu il həmin vətəndaşlara azı 800 mənzilin təqdim olunması nəzərdə tutulur. Şəhid ailələrinə və müharibə əlillərinə, Milli Qəhrəmanlara verilən Prezident təqaüdünün də məbləği ötən dövrdə mütəmadi artırılıb, bu qəbildən olan insanların uşaqlarına aylıq sosial müavinətin verilməsi təmin olunub. 2018-ci ildə keçirilən prezident seçkilərindəki qələbəsindən sonra Prezident İlham Əliyevin imzaladığı ilk Fərman bu təbəqənin sosial müdafiəsinin gücləndirilməsini nəzərdə tutur. Qeyd edək ki, “Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların ailə üzvlərinin sosial müdafiəsinin yaxşılaşdırılması ilə bağlı əlavə tədbirlər haqqında” Azərbaycan Respublikası Prezidentinin 2018-ci il 19 aprel tarixli Fərmanına əsasən 1997-ci il avqustun 2-dək Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların vərəsələrinə bu Fərmanla müəyyənləşdirilmiş qaydada 11.000 (on bir min) manat məbləğində birdəfəlik ödəmə verilməsi nəzərdə tutulub. Vurğulayaq ki, ölkəmizdə “Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların ailə üzvlərinin sosial müdafiəsinin yaxşılaşdırılması ilə bağlı əlavə tədbirlər haqqında” Azərbaycan Respublikası Prezidentinin 2018-ci il 19 aprel tarixli Fərmanının icrasına ötən il noyabrın 14-dən başlanılıb. Şəhidlərin vərəsələrinə birdəfəlik ödəmənin verilməsi prosesi qanunvericiliyin tələblərinə ciddi riayət olunmaqla və şəffaflıq tam təmin edilməklə həyata keçirilir. Hazırda şəhid hərbi qulluqçuların vərəsələrinə ödənişlərin həyata keçirilməsi müvafiq qaydada davam etdirilir. Dövlət başçısının 28 yanvar 2019-cu il tarixində imzaladığı “Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların ailə üzvlərinin sosial müdafiəsinin yaxşılaşdırılması ilə bağlı əlavə tədbirlər haqqında” Azərbaycan Respublikası Prezidentinin 2018-ci il 19 aprel tarixli 1 nömrəli Fərmanında dəyişiklik edilməsi barədə Fərmanla birdəfəlik ödəmə veriləcək şəhid ailələrinin əhatə dairəsi daha da genişlənib. Yəni dövlət başçısının növbəti humanist təşəbbüsü ilə əlavə olaraq 2264 şəhid hərbi qulluqçu və 461 şəhid polisimizin vərəsələrinə də birdəfəlik ödəmə veriləcək. Birdəfəlik ödəmələr artıq 12268 şəhidin vərəsələrini əhatə edir və ödəniləcək vəsaitin həcmi 135 milyon manata çatır.
Xatırlatmaq yerinə düşər ki, Prezident İlham Əliyev yanvarın 30-da şəhid ailəsi üçün Azərbaycan Respublikası Prezidentinin təqaüdünün artırılması haqqında da Fərman imzalayıb. Fərman şəhid ailələrinin sosial müdafiəsini gücləndirmək və onlara dövlət qayğısını artırmaq məqsədilə imzalanıb. Fərmana əsasən şəhid ailəsi üçün Azərbaycan Respublikası Prezidentinin təqaüdünün aylıq məbləği artırılaraq 2019-cu il fevralın 1-dən 300 manat müəyyən edilib. Nazirlər Kabinetinə bu Fərmandan irəli gələn məsələləri həll etmək tapşırılıb.
Ekspertlərin də qeyd etdikləri kimi, Azərbaycanda şəhid ailələrinin sosial müdafiəsinin gücləndirilməsi daim dövlətin diqqət mərkəzindədir. Məsələyə münasibət bildirən Milli Məclisin deputatı Mahir Abbaszadə deyib ki, ölkəmizdə həyata keçirilən dövlət siyasətinin mərkəzində Azərbaycan vətəndaşı dayanır. Onun sözlərinə görə, xüsusi qayğıya ehtiyacı olan vətəndaşlara, o cümlədən Qarabağ müharibəsi əlillərinə, şəhid ailələrinə dövlət tərəfindən yüksək diqqət və qayğı göstərilməsi təqdirəlayiq hal olmaqla yanaşı, mühüm əhəmiyyətə malikdir.
Millət vəkili əlavə edib ki, Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların ailə üzvlərinin daim dövlətin və şəxsən Prezident İlham Əliyevin diqqətində olması cəmiyyət tərəfindən yüksək qiymətləndirilir: “Xüsusilə də, Prezident İlham Əliyevin şəhid ailəsi üçün Azərbaycan Respublikası Prezidentinin təqaüdünün artırılması haqqında Fərmanı dövlətimizin başçısının şəhid ailələrinə xüsusi qayğısının daha bir ifadəsidir. Bütövlükdə, bu kateqoriyadan olan insanların sosial müdafiəsinin gücləndirilməsi istiqamətində tədbirlər ardıcıl xarakter daşıyır”.
Milli Məclisin deputatı Tahir Rzayev isə bildirib ki, Azərbaycanda həyata keçirilən sosial siyasətin səciyyəvi xüsusiyyəti budur ki, əhalinin bütün təbəqəsi yüksək diqqət və qayğı ilə əhatə olunub. Onun sözlərinə görə, şəhid ailələrinin sosial müdafiəsinin gücləndirilməsi istiqamətində davamlı tədbirlərin görülməsi onlara göstərilən yüksək dövlət qayğısının əyani ifadəsidir.
“Şəhid ailələrinə dövlət qayğısı davamlı xarakter daşıyır. Ötən il 626 şəhid ailəsinə yeni mənzillər, evlər verilib. Bu il isə əlavə 800 şəhid ailəsinə yeni mənzillərin, evlərin verilməsi nəzərdə tutulub. Bütün bunlar Azərbaycanda şəhid ailələrinin, müharibə əlillərinin yüksək dövlət qayğısı ilə əhatə olunduqlarını göstərir. Onu da diqqətə çatdırmaq lazımdır ki, Prezident İlham Əliyevin şəhid ailəsi üçün Azərbaycan Respublikası Prezidentinin təqaüdünün artırılması haqqında Fərmanı şəhid ailələrinin sosial müdafiəsinin gücləndirilməsinə xidmət edir, onlara yüksək diqqət və qayğının davamlı xarakter daşıdığını bir daha göstərir”, - deyə millət vəkili əlavə edib.
Nurlan QƏLƏNDƏRLİ

Paylaş:

Baxılıb: 768 dəfə