Radikal müxalifətin antimilli siması

Bakı:

21 °C

78 %

3 m/s

Əlaqə

AZ RU EN

Ana səhifə / Siyasət / Radikal müxalifətin antimilli siması

Radikal müxalifətin antimilli siması

09.06.2021 [09:08]

Hər zaman antimilli mövqeyi ilə seçilən radikal müxalifət düşərgəsi yenidən öz ampluasındadır. Belə ki, istər 44 günlük Vətən müharibəsi dövründə, istərsə də müharibədən sonrakı zaman kəsiyində torpaqlarımızın işğaldan azad edilməsinə sevinməyən, əksinə, erməni təbliğat maşınının bir hissəsi kimi çıxış edən dağıdıcı ünsürlər iyunun 4-də iki jurnalistin - Sirac Abışovun və Məhərrəm İbrahimovun, o cümlədən Susuzluq kənd icra nümayəndəsinin müavini Arif Əliyevin Kəlbəcər rayonu istiqamətində minaya düşərək həlak olmaları ilə əlaqədar Azərbaycan dövlətinə qarşı çirkin kampaniya aparmağa çalışırlar. Məsələn, “Müsavat” Partiyasının sədri Arif Hacılının ardından antimilli şuranın üzvü Gültəkin Hacıbəyli, AXCP sədri Əli Kərimli kimiləri bu məsələ ilə əlaqədar ermənipərəst mövqe nümayiş etdiriblər.
Məsələ ilə bağlı fikirlərini bölüşən Milli Məclisin deputatı Müşfiq Məmmədli bildirib ki, baş vermiş faciəvi hadisənin məsuliyyəti Ermənistanın siyasi-hərbi rəhbərliyinin üzərindədir. Millət vəkili düşmən ölkənin uzun illər işğal altında saxladığı Azərbaycan ərazilərini minalamasını hərbi və insanlığa qarşı cinayət adlandırıb: “Radikal müxalifət düşərgəsinin məsələyə münasibəti adekvat olmadığı qədər də təəssüfləndiricidir. Bu gün işğaldan azad edilmiş bölgələrimizdə minatəmizləmə işləri həyata keçirilir ki, bu da həmin ərazilərə qayıdacaq vətəndaşların təhlükəsizliyinin təmini üçün olduqca vacib şərtdir. Erməni terroruna məruz qalmış vətəndaşlarımızın həlak olmasının səbəbini min bir yerə yozmaqla hədəfi Ermənistanın cinayətkar əməllərindən yayındırmağa çalışan radikal müxalifət bununla əsl simasını ortaya qoyur. Adını “siyasətçi” qoymuş bu şəxslər baş vermiş hadisə ilə bağlı hansısa beynəlxalq təşkilata müraciət ünvanlamayıb, indiyə qədər ermənilərin minalanmış ərazilərin xəritələrini Azərbaycana verməsi ilə bağlı hər hansı bir fikir səsləndirməyiblər. Bu gün söylədikləri cəfəngiyyat isə onların ermənilərlə eyni mövqedən çıxış etdiklərini və eyni ünvandan sifarişlər aldıqlarını təsdiqləyir”.
YAP İdarə Heyətinin üzvü, partiyanın Sumqayıt şəhər təşkilatının sədri Ramiz Hüseynov Ermənistanın yürütdüyü siyasətin işğalçılığa, terrora söykəndiyini diqqətə çatdırıb. O deyib ki düşmən ölkə hələ müharibə dövründə döyüş ərazisindən kənarda yerləşən şəhər və kəndlərimizi hədəfə alıb, dinc insanları qətlə yetirib: “Radikal müxalifət düşərgəsi nümayəndələrinin iyunun 4-də baş vermiş hadisə ilə əlaqədar səsləndirdikləri absurd iddialar onların antimilli simasının göstəricisidir. Dağıdıcı müxalifət bu davranışı ilə bir daha milli maraqlara zidd mövqedə olduğunu nümayiş etdirir. Bu gün Azərbaycan ictimaiyyəti beynəlxalq aləmə, dünyanın aparıcı dövlətlərinə müraciətlər ünvanlayır, Ermənistanın törətdiyi bu qanlı cinayətə layiqli qiymətin verilməsinə, ən əsası, düşmən tərəfin minalanmış ərazilərin xəritələrini verməsinə nail olmağa çalışır. Belə bir zamanda erməniləri müdafiə etmək, dövlətin apardığı siyasətə qara yaxmağa çalışmaq milli maraqlarımıza xəyanətdir”.
Pərviz SADAYOĞLU

Paylaş:

Baxılıb: 717 dəfə