Radikal müxalifət xalqa və dövlətə xəyanət yolu tutub

Bakı:

20 °C

83 %

1 m/s

Əlaqə

AZ RU EN

Ana səhifə / Siyasət / Radikal müxalifət xalqa və dövlətə xəyanət yolu tutub

Radikal müxalifət xalqa və dövlətə xəyanət yolu tutub

22.06.2021 [08:50]

Ölkəmizdə fəaliyyət göstərən 48 siyasi partiyanın iyunun 15-də Şuşa şəhərində imzalanan Türkiyə ilə Azərbaycanın Müttəfiqlik münasibətləri haqqında Bəyannəməyə dəstək nümayiş etdirməsi və buna dair birgə bəyanat qəbul etməsi milli birliyimizin növbəti nümunəsidir. Təəssüfləndirici haldır ki, hələ 44 günlük müharibə dövründə özünü siyasi həmrəylikdən kənarda saxlayan AXCP və Müsavat Partiyası Şuşa Bəyannaməsi ilə bağlı siyasi partiyaların birgə bəyanatına qoşulmayaraq növbəti dəfə xəyanətkar mövqelərini cəmiyyətə nümayiş etdirdilər. Bu fakt bir daha həmin siyasi təşkilatların dövlət, xalq maraqlarından deyil, şəxsi mənafedən çıxış etdiklərini, eləcə də fərqli xarici dairələrin sifarişləri ilə idarə olunduqlarını sübuta yetirir.
Məsələ ilə bağlı fikirlərini bölüşən Milli Məclisin deputatı, YAP İdarə Heyətinin üzvü Şahin İsmayılov bildirib ki, 48 siyasi partiyanın Şuşa Bəyannaməsi ilə bağlı birgə bəyanat imzalaması xalqın birliyinin real nümunəsi, dövlətin uğurlu siyasətinə dəstəyin göstəricisidir: “Siyasi partiyaların birgə Bəyanatına imza atmayan partiya rəhbərləri hər zamankı kimi özlərinin şəxsi ambisiyalarını və hakimiyyət maraqlarını üstün tutublar. Əfsuslar olsun ki, istər Vətən müharibəsi zamanı, istərsə də Şuşa Bəyannaməsinə dəstək ifadə edilən zaman bir qrup marginal dəstə özlərini yenə kənara çəkdilər. İşləri yalnız Azərbaycanı qaralamağa çalışmaq olan bu qüvvələr, görəsən, nə istəyirlər? Onların başıpozuq hakimiyyəti nəticəsində ərazilərimiz itirilmiş, həmin vaxtlarda Azərbaycan dövlətinin mövcudluğu sual altına düşmüşdü. Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusu torpaqlarımızı işğaldan azad etdi. Bu marginallar isə hər vəchlə Qələbəmizə kölgə salmağa çalışır, absurd iddialar səsləndirirlər. Hələ də başa düşmürlər ki, Azərbaycan xalqı onları tarixin arxivinə göndərib”.
YAP İdarə Heyətinin üzvü, partiyanın Sumqayıt şəhər təşkilatının sədri Ramiz Hüseynov isə bildirib ki, Şuşa Bəyannaməsi Azərbaycan və Türkiyə arasındakı dostluq və qardaşlıq münasibətlərinin yeni mərhələsinin başlanğıcıdır. R.Hüseynovun sözlərinə görə, istər Azərbaycan ictimaiyyəti, istərsə də Türkiyə cəmiyyəti bu Bəyannaməni böyük coşqu və sevinclə qarşılayır. Bunun nəticəsidir ki, Azərbaycanda fəaliyyət göstərən 48 siyasi partiya birgə bəyanat qəbul edərək Şuşa Bəyannaməsini dəstəklədiyini bildirib: “İki partiyanın - AXCP ilə Müsavat Partiyasının bu bəyanatı imzalamaması isə onların növbəti dəfə xalqla, dövlətlə bir yerdə olmadıqlarının göstəricisidir. Ümumiyyətlə, bu hal ilk deyil. Ötən il dövlət sərhədinin Tovuz rayonu istiqamətində erməni təxribatları baş verən zaman, eləcə də 44 günlük Vətən müharibəsi dövründə Azərbaycanda fəaliyyət göstərən siyasi partiyalar dəfələrlə birgə bəyanatlar imzaladılar və xalqla, dövlətlə, ordu ilə birgə olduqlarını bildirdilər. Məhz bu iki partiya heç bir birgə bəyanata imza atmamaqla öz xəyanətkar mövqeyini açıq şəkildə ortaya qoydu. Azərbaycan cəmiyyəti bu partiyaların xarici sifarişlər əsasında hərəkət etməsinin növbəti dəfə şahidi oldu”.
Pərviz SADAYOĞLU

Paylaş:

Baxılıb: 710 dəfə