Ermənistanın separatizmə dəstəyi...

Bakı:

14 °C

74 %

3 m/s

Əlaqə

AZ RU EN

Ana səhifə / Siyasət / Ermənistanın separatizmə dəstəyi...

Ermənistanın separatizmə dəstəyi...

22.02.2022 [10:16]

Belə bir destruktiv yanaşmanın heç bir gələcəyi yoxdur

Nardar BAYRAMLI

Ermənistanın Xarici İşlər Nazirliyi Qarabağda erməni separatizminin başlanmasının 34-cü ildönümü ilə bağlı bəyanat yayıb. Bəyanatda separatizmə “haqq” qazandırılır və Qarabağ separatçılarına dəstək ifadə olunur. Azərbaycan Xarici İşlər Nazirliyi isə bu bəyanatı pisləyib.

Xarici İşlər Nazirliyinin Mətbuat xidməti Ermənistan XİN-in Azərbaycan SSR-in Dağlıq Qarabağ Muxtar Vilayətinin (DQMV) radikal ermənilərinin aqressiv separatçılığının əsasını qoyan 1988-ci il 20 fevral tarixli qeyri-qanuni qərarını dəstəkləyən bəyanatını qınayıb. Qeyd olunub ki, sözügedən qondarma qərar SSRİ Konstitusiyasına, DQMV haqqında 1981-ci il Qanununa, habelə bütün digər müvafiq normativ hüquqi aktlara ziddiyyət təşkil edib: “Ermənistanın aqressiv erməni separatçılarını dəstəkləməsi və Azərbaycana qarşı ərazi iddialarından çıxış edərək təcavüzkar siyasət həyata keçirməsi Azərbaycanın ərazilərinin bir hissəsinin 30 ilə yaxın hərbi işğal altında qalmasına, bu torpaqlarda qanlı etnik təmizləməyə, bir milyon azərbaycanlının fundamental hüquqlarının pozulmasına səbəb olub. Ermənistan XİN-in “dirçəliş” kimi qiymətləndirdiyi aqressiv separatçılıq bölgədə onilliklər ərzində davam edən genişmiqyaslı fəlakətə gətirib çıxarıb. Bu vəziyyət bölgənin uzun illər ərzində sülh və təhlükəsizlik şəraitində inkişafına ciddi əngəl törədib”.

“Hazırda bölgədə beynəlxalq hüququn bərqərar olduğu və iki dövlət arasında münasibətlərin normallaşması istiqamətində cəhdlərin edildiyi bir vaxtda Ermənistan XİN-in xalqlararası nifaqı təşviq edən bəyanatla çıxış etməsi bir tərəfdən bu ölkənin məsuliyyətsiz davranışını, digər tərəfdən isə baş verən son hadisələrdən hələ də dərs çıxarmadığını göstərir. Ermənistan XİN-in nəzərinə çatdırırıq ki, belə bir destruktiv yanaşmanın heç bir gələcəyi yoxdur”, - deyə Azərbaycan XİN-in məlumatında vurğulanıb.

Mövzu ilə bağlı qəzetimizə açıqlama verən Milli Məclisin Beynəlxalq münasibətlər və parlamentlərarası əlaqələr komitəsinin üzvü Ramin Məmmədov bildirib ki, bu gün Cənubi Qafqaz regionunun mənzərəsi fərqlidir. Onun sözlərinə görə, 44 günlük Vətən müharibəsi nəticəsində Azərbaycanın yaratdığı reallıqlar bölgənin gələcəyi üçün yeni imkanlar yaradıb: “Burada sülh, təhlükəsizlik və əməkdaşlıq ən önəmli yer tutur. Müharibədə ağır məğlubiyyətə uğrayan Ermənistan hakimiyyəti də sülhün və əməkdaşlığın tərəfdarı olduğunu bəyan edir. Amma Qarabağda separatçılığın baş qaldırmasına haqq qazandırmaq erməni tərəfinin sülh məsələləri ilə bağlı bəyanatlarına tamamilə ziddir. Bu o deməkdir ki, Ermənistan hakimiyyəti sözdə bir, əməldə isə başqa mövqe nümayiş etdirir. Ermənistan və Qarabağ separatçıları anlamalıdır ki, onlar bundan sonra Azərbaycanın ərazi bütövlüyünə qarşı heç bir addım ata bilməzlər. Rusiya sülhməramlılarının isə bölgədə yerləşdirilməsi müvəqqətidır. Qarabağdakı separatçılar isə həmin hadisəni artıq “təntənəli” qeyd edə bilmirlər”.

Həmsöhbətimizin fikrincə, burada əsas səbəblərdən biri rəsmi Bakının mövqeyidir: “Müharibədən sonra separatçı rejimin müəyyən cəhdlərinin qarşısı Azərbaycanın tələbi ilə alınıb. Rəsmi Bakının xüsusilə separatçıların özləri üçün düzəltdikləri “tarixi günləri” qeyd etməsinə qarşı sərt mövqe sərgiləyir. Ötən ilin 2 sentyabr tarixində qondarma “müstəqillik günləri”nin təntənəli qeyd edilməməsi də Azərbaycanın bununla bağlı tələbi idi. Həmin vaxt erməni mediası da Bakının bir çox məsələyə veto qoyduğunu yazırdı. Nəticə etibarilə “mərasimin” təntənəli keçirilməsi, hərbi yürüşün edilməsinə icazə verilmədi. Məlumatlar var idi ki, separatçılar “mərasimi” təntənəli keçirmək, eləcə də “yürüş” etmək üçün sülhməramlılardan icazə istəyib, amma Azərbaycanın bu məsələ ilə bağlı sərt mövqeyi əsas gətirilərək icazə verilməyib. Erməni mənbələri yazırdı ki, Bakının tələbi əsasında sülhməramlılar separatçı-terrorçulara maksimum “gözə görünməməyi” tapşırıb. Belə bir şəraitdə Ermənistanın Xarici İşlər Nazirliyinin bəyanatının proseslərə zərrə qədər təsiri yoxdur. Amma bu fakt bir daha Ermənistanın regionda sülh təşəbbüslərinə qarşı çıxmaq niyyətini ortaya qoyur. Bütün hallarda, Azərbaycan qarşı tərəfə xəbərdarlıq edir və ermənilər bu xəbərdarlıqdan nəticə çıxarmalıdır”.

Paylaş:

Baxılıb: 1193 dəfə