Dağıdıcı müxalifətə xaricdən ayrılmış 40 milyon dollar artıq təsdiqini tapmaqdadır

Bakı:

12°C

87%

0m/s

Əlaqə

AZ RU EN

Ana səhifə / Siyasət / Dağıdıcı müxalifətə xaricdən ayrılmış 40 milyon dollar artıq təsdiqini tapmaqdadır

Dağıdıcı müxalifətə xaricdən ayrılmış 40 milyon dollar artıq təsdiqini tapmaqdadır

02.04.2011 [12:11]

Bu gün xaricdə təhsilalma vəd edərək, tələbələri itaətsizliyə çağıran dağıdıcı müxalifət sabah silahlı qarşıdurma yaratsa, heç də təəccüblənməməliyik
Dağıdıcı müxalifət xalqın onlara məqsədlərini reallaşdırmaq üçün dəstək vermədiyini görüncə psixoloji dalana düşərək yavaş-yavaş özünü ifşa etməyə başlayıb. Xarici siyasi qruplaşmalardan daxil olmuş sifarişi nəyin bahasına olursa-olsun həyata keçirməyə çalışan dağıdıcı müxalifət artıq verdiyi bəyanatlarda əsl siması, fəaliyyət istiqaməti və kimlərin sifarişilə işlədiyi haqqında anlamadan məlumat ötürür.
Məlum olduğu kimi, “Yeni Müsavat” qəzetində dağıdıcılara xaricdən ayrılmış 40 milyon dollar məsələsi geniş müzakirə olunmaqdadır. Dağıdıcı-ekstremist müxalifətin “ideoloji-təbliğat ruporu” olan bu qəzet partiya funksionerlərinin, öz düşərgələrinə xidmət edən ekspertlərin cəfəngiyyat dolu açıqlamalarını yerləşdirməklə, izi itirməyə çalışırlar. Dağıdıcı müxalifət hər vəchlə çalışır ki, təyin etdikləri mitinqlərə güclə yığdığı 5-10 nəfəri də itirməsin. Əslində isə, onlar bu yolla bir daha Azərbaycanın milli maraqlarına zidd planlar ortaya atan xarici qərəzli qüvvələrin sifarişlərini həyata keçirmək üçün 40 milyon dollar yardım aldığını sübut etmiş olurlar.
ümumiyyətlə, dağıdıcı müxalifətin mitinq ərəfəsi verdiyi bir sıra bəyanatlardan da anlamaq olurdu ki, ölkədə qarışıqlıq yaradaraq, 90-cı illərin əvvəllərindəki hadisələrin yenidən yaşanmasını arzulayan bu qüvvələr hansısa xarici mənbədən külli miqdarda yardım alıb. Ermənilərin və digər xarici siyasi qruplaşmaların sifarişi ilə hazırlanmış 11 martla bağlı sosial şəbəkələrdəki aksiyaya dəstək olaraq, bəzi yerlərdə “bir manatlıq” əskinasların üzərində təbliğat xarakterli yazıların yazılması və paylanılması, eyni zamanda, müxalifətin dövlətinə, xalqına qarşı çıxan tələbələrin xaricdə təhsil almasını təmin edəcəklərilə bağlı bəyanatlar verməsi bir daha həmin faktı təsdiqləyir.
Onsuz da cəmiyyətdən gizlin bir şey qalmayıb. Dağıdıcı müxalifət nümayəndələri artıq terrorçu-ekstremist qüvvələrlə də əlaqə yaradır və görüşlər keçirirlər. Xarici siyasi dairələrin mətbəxində hazırlanmış oyunların qaydalarına uyğun hərəkət edən dağıdıcı müxalifət hakimiyyətə gəlmək üçün bütün vasitələrdən istifadə etməyi artıq göz önünə alıb. Bu gün xaricdə təhsilalma vəd edərək, tələbələri itaətsizliyə çağıran dağıdıcı müxalifət sabah silahlı qarşıdurma yaratsa heç də, təəccüblənməməliyik.
Onsuzda bu müxalifət qan üzərində hakimiyyətə gəlmək təcrübəsinə malikdir. Hər bir kəsin yadındadır ki, bu dağıdıcı müxalifət vaxtilə qanlı 20 Yanvar faciəsindən və Xocalı soyqırımından istifadə edərək, hakimiyyətə gəlmişdi. Bunu yaxşı bilən xalq hələ o zaman AXC-Müsavat hakimiyyətinə o qədər ikrah hissilə yanaşırdı ki, heç bir il keçmədi ki, onları devirdi və Yeni Azərbaycan Partiyasını (YAP) hakimiyyətə gətirdi. Bu gün də eyni münasibəti sərgiləyən cəmiyyətimiz maliyyələşməsi və fəaliyyəti haqqında mütəmadi olaraq hesabat verməyən, sosial dayağı demək olar ki, qohum-tanışdan ibarət olan dağıdıcı müxalifət partiyalarının ölkədə xaos və anarxiya yaratmaq cəhdlərini qəbul etmir. Redaksiyamıza daxil olan şikayət məktublarından da aydın şəkildə görünür ki, dağıdıcı müxalifət qanunsuz əməllərilə insanları bezdirib.
Vətəndaşların dağıdıcı müxalifəti qəbul etməməsinin də səbəbləri hər kəsə bəllidir. Bilirik ki, bu müxalifət ötən 20 il ərzində xalqımıza qarşı səmimi olmayıb və cəmiyyətimiz dağıdıcı-ekstremistlərə aid siyasi təşkilatları qrant, xaricdən daxil olmuş maliyyə vəsaitlərinin mənimsənildiyi və daha çox qərəzli dairələrin maraqlarına işlədiyi psevdopartiyalar kimi tanıyır. Ona görə də, dağıdıcı müxalifət cəmiyyətdə qanunsuz əməllərinə dəstək verəcək insan tapmırlar. Bu mənada xarici mənbələrdən aldıqları 40 milyon dollar hesabına müxtəlif təxribat xarakterli addımlar atmaqla, qərəzli dairələrdən verilmiş sifarişi həyata keçirməyə çalışırlar. Bu addımları ilə dağıdıcı müxalifət maddi maraqları naminə nəinki tələbələri, hətta, dövlətçiliyimizi də xərcləməyə hazır olduğunu nümayiş etdirirlər. Bununla əlaqədar olaraq, hər birimizi düşündürən suallar isə hələ də öz cavabını gözləməkdədir: dağıdıcı müxalifətə 40 milyon dollar vermiş xarici siyasi dairələr sonradan bunun əvəzinə nəyi və nə qədər istəyəcək? Və ya sonradan bu pulların qaytarılması necə olacaq, kimin cibindən çıxacaq? Bəlkə, dağıdıcı müxalifət xarici qüvvələrdən aldığı yardımın əvəzinə Dağlıq Qarabağı, milli sərvətlərimizi və maraqlarımızı girov qoyub və s.
Bir daha əminliklə demək istəyirik ki, dağıdıcı müxalifətin bu xəyanəti də baş tutmayacaq. 11 və 12 martda olduğu kimi, bundan sonra da bütövlükdə cəmiyyətimiz həmin qüvvələri dövlətimizin imicinə zərər vuran əməllərinə görə qınayacaq, mitinqlərə qatılmayacaq və xarici qüvvələrin sifarişlərini həyata keçirən dağıdıcı müxalifətə dəstək verməyəcək.
Ramil VƏLİBƏYOV

Paylaş:

Baxılıb: 823 dəfə