Qardaşdan qonaq olmaz!

Bakı:

25 °C

78 %

8 m/s

Əlaqə

AZ RU EN

Ana səhifə / Siyasət / Qardaşdan qonaq olmaz!

Qardaşdan qonaq olmaz!

22.02.2024 [10:10]

Türkiyənin müxtəlif şəhərlərinə səfərlərimdən xatirimdə qalan ortaq bir anı var. O da olduğum hər yerdə qarşılaşdığım, hər kəsdən eşitdiyim bu cümlədir: “Siz qonaq deyilsiniz, siz qardaşımızsınız. Qardaşdan qonaq olmaz”. Əlbəttə, bu bizim üçün də belədir. Qardaş ölkədən gələn hər kəs bizim doğmamız, özümüzdür. Məncə, zamanında Xalq şairimiz Bəxtiyar Vahabzadənin dediyi sözlər bu gün hər iki ölkə vətəndaşlarının qəlb səsidir:

Ana yurdda yuva qurdum

Ata yurda könül verdim

Ana yurdum, ata yurdum

Azərbaycan-Türkiyə.

Çox qədim, köklü tarixə malik qardaşlığımızın müasir dövrümüzdə bu cür genişlənməsi, dərinləşməsi təbii ki, hər iki ölkə başçısının doğru, qərarlı mövqeyi, yürütdüyü siyasət sayəsindədir. Bu gün Azərbaycan və Türkiyənin qardaşlığı ən başda hər ölkə prezidentinin bir-birinə qardaş münasibətindən qaynaqlanır.

Azərbaycan Respublikasının Prezidenti, cənab İlham Əliyevin ənənəvi olaraq prezident seçildikdən sonra ilk rəsmi səfərini Türkiyəyə etməsi qardaşlığımızın daha bir nümunəsi, parlaq örnəyidir.

Belə ki, cənab İlham Əliyev ölkəmizdə keçirilən Zəfər seçkilərində qalib gəldikdən sonra ilk rəsmi səfərini Ankaraya etdi. Rəsmi mərasimlə qarşılanan Əliyev Prezident Rəcəb Tayyib Ərdoğanla görüşdü. Liderlərin daha sonra nümayəndə heyətlərinin iştirakı ilə keçirilən görüşündə bir daha bütün dünyaya önəmli mesajlar verildi, Azərbaycan-Türkiyə dostluğu, doğmalığı dilə gətirildi.

Ölkəmizin başçısı səfər əsnasında keçirilən qarşılıqlı görüşdə iki ölkə arasında qüvvətlənən əlaqələrdən danışarkən dedi: “Mənim prezident seçkilərindən sonra ilk rəsmi səfərim qardaş Türkiyəyədir. Bu da təbiidir. Türkiyə ilə Azərbaycan arasındakı münasibətlərin bənzəri, tayı yoxdur və bu əlaqələr hər gün daha da güclənir”.

“Biz əcdadlarımızdan qalan bütün ənənələrə sadiqik. Bu gün Türkiyə-Azərbaycan birliyi təkcə bölgə üçün deyil, Avrasiya üçün önəmli amilə çevrilib”-deyən İ.Əliyev əlavə edib ki, Türkiyə bölgəmizdə əmin-amanlığın, sülhün və işbirliyinin qarantıdır”.

“Dost dar gündə tanınar”-deyib atalarımız. Mən isə düşünürəm ki, əsl dost dar günündə köməyinə yetib, sevincində gülüşünə səmimiyyətlə qoşula biləndir. Axı birinin xoşbəxtliyinə ortaq olmaq kədərinə ağlamaqdan daha çətindir.

Türkiyənin bizim üçün əsl qardaşlığı 44 günlük Vətən müharibəsində və qazandığımız Zəfər günlərində bir daha təsdiqləndi. Dövlətimizin başçısı səfər çərçivəsində bu mövzuya da toxundu və bir daha 44 günlük Vətən müharibəsində bütün qardaş Türkiyənin, şəxsən Prezident Rəcəb Tayyib Ərdoğanın Azərbaycanın yanında olmasının, mənəvi və siyasi dəstəyinin torpaqlarımızın azad edilməsində aparıcı rol oynadığını, Qarabağ dastanının yazılmasında mühüm amil olduğunu bildirdi.

Türkiyə Cümhuriyyətinin başçısı cənab Rəcəb Tayyib Ərdoğanın mövqeyi də dəyişməzdir: “Azərbaycan ilə Ermənistan arasında davamlı sülhün imzalanmasının bölgəmizdə və dünyada sülh, əmin-amanlıq və sabitlik üçün yeni bir ümid mənbəyi olacağı şübhəsizdir. Bu prosesdə Azərbaycan ilə birlikdə çiyin-çiyinə hərəkət edirik”.

Bəli, Türkiyə və Azərbaycan tarix boyunca bir olub, birlik olub. Onun bu dostluğunun, qardaşlığının qarşısını almağa, onu bir-birindən ayrı salmağa çalışan qüvvələr hər zaman olub, olacaq da. Amma nə məsafə, nə qırılan fiziki bağlar iki ölkə və iki xalq arasındakı mənəvi telləri qıra bilməyib. Şairin də dediyi kimi: “Birdir bizim hər halımız, Diləyimiz, amalımız”:

Dinimiz bir, dilimiz bir

Ayımız bir, ilimiz bir

Eşqimiz bir, yolumuz bir

Azərbaycan-Türkiyə.

Şahanə MÜŞFİQ

Paylaş:

Baxılıb: 578 dəfə