“Bu proqramda iştirak edəcəyimə görə çox həyəcanlıyam”

Bakı:

13 °C

76 %

3 m/s

Əlaqə

AZ RU EN

Ana səhifə / Sosial / “Bu proqramda iştirak edəcəyimə görə çox həyəcanlıyam”

“Bu proqramda iştirak edəcəyimə görə çox həyəcanlıyam”

17.07.2015 [11:40]

Beynəlxalq Yay Məktəbinin tələbələri ilə müsahibə
Bakı Beynəlxalq Multikulturalizm Mərkəzi Bakı Slavyan Universiteti və Azərbaycan Respublikasının Prezidenti yanında Bilik Fondu ilə birgə cari ilin yaz semestrində “Azərbaycan multikulturalizmi” fənninin tədris olunduğu yerli və xarici universitetlərdə təhsil alan tələbələr üçün “Multikulturalizm Azərbaycanda həyat tərzi kimi: öyrən, araşdır, paylaş” adlı Beynəlxalq Yay Məktəbi layihəsi keçirməyi planlaşdırır.
İyulun 21-dən avqustun 1-dək keçirilməsi nəzərdə tutulan Beynəlxalq Yay Məktəbində iştirakçılar Azərbaycanın tarixi, dili, etnoqrafiyası, mədəniyyəti haqqında biliklərə yiyələnməklə yanaşı, Azərbaycanın regionlarına səfər edəcək, müxtəlif etnik qrupların adət-ənənələri ilə yerində tanış olacaq ki, bu da nəticədə tələbələrə Azərbaycan multikulturalizmi haqqında praktik biliklərini zənginləşdirmək imkanı yaradacaq. Beynəlxalq Yay Məktəbi ərəfəsində həm xarici ölkə universitetlərini, həm də ölkəmizi təmsil edən tələbələrdən bu tədbirdən gözləntilərini soruşduq.
Litva Vytautas Magnus Universitetinin tələbəsi, Gediminas Laskauskas bildirdi ki, Beynəlxalq Yay Məktəbindən ən əsas gözləntim Azərbaycanın gözəl mədəniyyəti və ənənələri ilə tanışlıqdır: “Başqa sözlə, mən bu Yay Məktəbinin Azərbaycanın milli mədəni xüsusiyyətlərini, tarixini öyrənmək, görmək və hiss etmək üçün doğru yer olduğuna inanıram. İkinci və çox mühüm məqsəd maraqlı, tolerant, dostsevər, müxtəlif mədəniyyətlərə sahib olan insanlarla, həmçinin, ekspertlərlə, siyasətçilərlə və başqa sahələrin mütəxəssisləri ilə tanışlıqdır. Son olaraq, mən özüm də iki ölkə, Litva və Azərbaycan arasında ayrıca körpü qurmaq istərdim. Bu müxtəlif formatlarda ola bilər, akademik və ya şəxsi. Mənim bu ölkəyə və ümumiyyətlə Qafqaz regionuna ilk səfərimdir. Şəxsi təcrübəmdən və beynəlxalq münasibətlər sahəsində olan tədqiqatlara əsaslanaraq deyə bilərəm ki, Azərbaycan müxtəlif forumlarda, mədəni və idman tədbirlərində fəal iştirak edərək öz beynəlxalq imicini artırır. Bu ölkənin müasirliklə birləşmiş zəngin mədəni irsi var və ölkə regionun əsas dövlətinə çevrilib. Azərbaycan multikulturalizm ideyalarını təbliğ edir, Avropa Birliyinin “Şərq Tərəfdaşlığı” Proqramında iştirak edir. Buna görə də mən səbirsizliklə Azərbaycana gəlməyimi gözləyirəm. Paytaxt Bakı dünyada sürətlə inkişaf edən şəhər kimi tanınır. Mənə orada təkçə turizm yerləri deyil, həmçinin, kənd həyatını və etnik qrupların kompakt yaşadığı yerləri də görmək maraqlıdır. Qafqaz dağlarını görmək imkanının olması da çox maraqlıdır. Bu yaxınlarda Yay Məktəbinin proqramı ilə tanış olmuşam və etiraf etməliyəm ki, müxtəlif mühazirələrin, fəaliyyətlərin, mövzuların və gedəcəyimiz şəhərlərin sayı məni heyran edib”.
İtaliya Neapol II Federiko Universitetinin tələbəsi Karlo Kotaldo qeyd etdi ki, mənim Beynəlxalq Yay Məktəbindən gözləntilərim multikultural mühitlə, dünyanın fərqli ölkələrindən gələn insanlarla, fərqli fikirlərlə tanış olmaq, öz şəxsi bacarıqlarımı inkişaf etdirmək və gələcəkdə mənim karyerama faydalı ola biləcək əlaqələr yaratmaqdır: “Sözün düzü, “Erasmus” tələbə mübadiləsi proqramından əvvəl mənim Azərbaycan haqqında çox məlumatım yox idi, mən azərbaycanlıları tanıdıqca, bu ölkə ilə maraqlanmağa başladım. Onlar öz mədəniyyətləri haqqında danışanda, bu məni çox təsirləndirdi və qürurlandırdı. Mən öyrəndikcə bu ölkənin inkişaf etmiş və böyük potensiala malik olduğunu gördüm. Mən Azərbaycan milli mətbəxinin dadına baxmaq istəyirəm, Azərbaycanda olan mənzərələri, guşələri görmək və sadə azərbaycanlılarla söhbət etmək istəyirəm. Məhz bunlar mədəniyyətin və ənənələrin ən gözəl göstəricisidir. Proqram çox yaxşı balanslaşdırılıb, dinamikanı çox sevdim. Mühazirələr və səyahətlərarası cədvəl çox yaxşıdır. Proqram bir çox sahəni əhatə edir, tarixdən incəsənətə, dindən idmana kimi hər şey öz əksini tapıb. Mən bu proqramda iştirak edəcəyimə görə çox həyəcanlıyam”.
Azərbaycan Diplomatik Akademiyasının tələbəsi Tokay Əhmədov Beynəlxalq Yay Məktəbindən gələcək karyera üçün yeni tanışlıq əldə etmək imkanlarını gözlədiyini söylədi.
Gəncə Dövlət Universitetinin tələbəsi Raksana Bayramova bildirdi ki, gözləntilərim çoxdu: “Ən əsası, yeni dostlar qazanmaq, yeni mədəniyyətlərlə tanış olmaq, eyni zamanda, ölkəmizi, mədəniyyətimizi xarici ölkə nümayəndələrinə tanıtmaq, Azərbaycan multikulturalizmini daha dərindən öyrənmək, təbliğ etmək, birlikdə gözəl və səmərəli vaxt keçirmək və s. Düşünürəm ki, Yay Məktəbi biz gənclərə çox şey qazandıracaq”.
Bakı Beynəlxalq Multikulturalizm Mərkəzinin Mətbuat xidməti

Paylaş:

Baxılıb: 767 dəfə