Gəncədə “Səfir olsaydım, Azərbaycanı necə təbliğ edərdim” layihəsinin icrasına start verilib

Bakı:

11°C

87%

3m/s

Əlaqə

AZ RU EN

Ana səhifə / Sosial / Gəncədə “Səfir olsaydım, Azərbaycanı necə təbliğ edərdim” layihəsinin icrasına start verilib

Gəncədə “Səfir olsaydım, Azərbaycanı necə təbliğ edərdim” layihəsinin icrasına start verilib

02.12.2015 [09:59]

Tədbirə qatılan KİV təmsilçiləri eyni zamanda, Gəncədə bir sıra tarixi abidələri ziyarət ediblər
Gəncə şəhərində Demokratik İslahatçı Gənclər İctimai Birliyinin “Səfir olsaydım, Azərbaycanı necə təbliğ edərdim” layihəsinin icrasına start verilib. Azərbaycan Respublikasının Prezidenti yanında Gənclər Fondunun maliyyə dəstəyi ilə keçirilən ilk “dəyirmi masa”da kütləvi informasiya vasitələrinin nümayəndələri, yerli mətbu orqanların əməkdaşları, blok və xəbər saytlarının rəhbərləri və dövri mətbuatla fəal əməkdaşlıq edən gənclər iştirak ediblər.
Tədbiri giriş sözü ilə açan Demokratik İslahatçı Gənclər İctimai Birliyinin sədri Vüsalə Hüseynli deyib ki, layihənin keçirilməsində əsas məqsəd dünya ictimaiyyətini Azərbaycan həqiqətləri, Ermənistan-Azərbaycan, Dağlıq Qarabağ münaqişəsi barədə məlumatlandırmaq üçün mətbuatın təsir gücündən səmərəli istifadəyə nail olmaq, həmçinin Azərbaycan haqqında beynəlxalq aləmə daha dolğun və obyektiv məlumatlar çatdırmağa kömək göstərməkdir.
V.Hüseynli onu da bildirib ki, layihə çərçivəsində ilk tədbirin Gəncədə keçirilməsi heç də təsadüfi deyil: “Bu, 2016-cı il Avropanın Gənclər paytaxtı seçilən Gəncənin bir sıra beynəlxalq tədbirlərə ev sahibliyi edəcəyi və həmin tədbirlər zamanı Azərbaycan reallıqlarının təbliğinə daha mütəşəkkil şəkildə dəstək verilməsi ilə bağlıdır. Yəni bura artıq çoxlu turistlər gəlir, beynəlxalq gənclər təşkilatlarının təmsilçiləri mütəmadi səfərlər edirlər və biz də düşündük ki, gələn il öncəsi media nümayəndələrinə dəstək olaraq bu addımı ataq. Bir sözlə, layihə çərçivəsində ilk tədbirin Gəncədə keçirilməsi bu şəhərin Avropanın Gənclər paytaxtı kimi tanıdılması üçün beynəlxalq aləmdə bir kampaniya aparılmasına dəstək rolunu oynayır”.
“Dəyirmi masa”da iştirak edən ölkənin bir sıra aparıcı media qurumlarının nümayəndələri və yerli gənclər mövzu ətrafında çıxış edib, təkliflər səsləndiriblər. Eyni zamanda, xarici media səhifələrində Azərbaycanın təbliğində lobbiçilik siyasətinin qurulması və ondan səmərəli istifadə edilməsinin vacibliyi xüsusi vurğulanıb. Yeri gəlmişkən, müzakirələr zamanı Gəncədə fəaliyyət göstərən müxtəlif ali təhsil müəssisələrində təhsil alan gənclərin fəallığını xüsusi vurğulamaq yerinə düşər. Belə ki, müzakirələrdə fəal iştirak edərək mövzu ətrafında maraqlı fikirlər yürüdən Azərbaycan Dövlət Aqrar Universitetinin birinci kurs tələbələri Xalidə Nəsibzadə, Cəmaləddin Məmmədov, Aytac Səfərli və İlkin Qasımovun timsalında bu gün Gəncədə fəal, dövlətini sevən, Azərbaycanımızın maraqlarını qorumağa hazır bir gəncliyin yetişdiyinin şahidi olduq.
İki saata yaxın davam edən müzakirəni yekunlaşdıran Azərbaycan Dövlət Aqrar Universitetinin mətbuat xidmətinin rəhbəri Qalib Rəhimli “müzakirələrin ümumi nəticəsindən də bəlli olduğu kimi, ölkəmizi dünyada yaxşı təbliğ etmək üçün həm yaxşı təhsil almaq, həm xarici dillərə yiyələnmək, həm də vətənpərvər olmaq vacibdir. Bu yolda da əsas iş gənclərin boynuna düşür”, - deyib.
Onu da qeyd edək ki, jurnalistlər səfərin ikinci günü bu qədim Azərbaycan diyarının tarixi yerlərinə, həmçinin müasir dövrdə tikilən çoxsaylı obyektlərə baş çəkiblər. Belə ki, Azərbaycanın dahi şairi Nizaminin məqbərəsini və Nizami muzey kompleksini ziyarət edən KİV təmsilçiləri, eyni zamanda, Gəncə Qala qapıları, Məhsəti Gəncəvi adına Mədəniyyət Mərkəzi, Uşaq Yaradıcılıq Mərkəzi kimi yeni tikililərlə və Gəncə Dövlət Kukla Teatrının binasının əsaslı təmirdən sonrakı vəziyyəti ilə tanış olub, Göygöl Dövlət Qoruğunu ziyarət ediblər. Jurnalistlərə məlumat verilib ki, Prezident İlham Əliyevin bilavasitə təşəbbüsü və himayəsi sayəsində orta əsr qədim memarlıq incilərindən olan “İmamzadə” tarixi-memarlıq kompleksində təmir-tikinti, bərpa və abadlıq-quruculuq işləri başa çatmaq üzrədir. Eyni zamanda, bildirilib ki, şəhərin ən görkəmli komplekslərindən biri Ulu öndər Heydər Əliyevin adını daşıyan park və parkın içində fəaliyyət göstərən Heydər Əliyev Mərkəzidir.
Nadir AZƏRİ

Paylaş:

Baxılıb: 696 dəfə