Abituriyentlər üçün ilk imtahan keçirilib

Bakı:

24 °C

70 %

4 m/s

Əlaqə

AZ RU EN

Ana səhifə / Sosial / Abituriyentlər üçün ilk imtahan keçirilib

Abituriyentlər üçün ilk imtahan keçirilib

02.05.2017 [10:06]

Aprelin 30-da Dövlət İmtahan Mərkəzi (DİM) 2017/2018-ci tədris ili üçün Azərbaycan Respublikasının ali təhsil müəssisələrinə qəbul olunmaq istəyən abituriyentlər üçün II və III ixtisas qrupları üzrə qəbul imtahanı keçirib. İlk imtahanda iştirak edən 18681 abituriyent II qrup üzrə, 16752 abituriyent isə III qrup üzrə sualları cavablandırıb. Bütün binalarda imtahanlar saat 11-də başlayıb.
Yeri gəlmişkən, “Yeni Azərbaycan” qəzeti olaraq imtahanın gedişatını izləmək üçün Binəqədi rayonu, İbrahimpaşa Dadaşov küçəsi 171-də yerləşən Bakı şəhəri Sovet İttifaqı Qəhrəmanı Həbibulla Eynulla oğlu Hüseynov adına 83 nömrəli məktəb-liseyə yollandıq. Abituriyentlər sualları cavablandırdıqları vaxt imtahan binasının qarşısında onları səbirsizliklə gözləyən valideyn və yaxınlarının prosesin gedişi və övladlarının imtahanlara hazırlığı ilə bağlı münasibətini öyrəndik. Qızı Səidəni imtahana gətirən Vəfa Babayeva üçün bu imtahan ikiqat həyəcanlı keçib. Çünki Vəfa xanımın digər övladı da eyni vaxtda başqa məktəbdə imtahan verirdi: “Bu gün iki övladımın da imtahanıdır. Qızımla imtahana mən, oğlumla isə atası getdi. Övladlarımın 11 illik zəhmətlərinin bəhrəsini gözləyirəm. İlboyu demək olar ki, mən də onlarla birgə bəzən səhərə qədər oyaq qalmışam. Sınaqlardan həmişə yüksək bal toplayıblar. Ümid edirəm ki, nəticə uğurlu olacaq və üzümüzü güldürəcəklər”.
Abbas Hüseynov da əminliklə oğlunun imtahandan uğurlu nəticə ilə çıxacağını bildirib: “Övladımdan çox mən həyəcanlıyam. Oğlum olduqca çalışqandır. Daim mütaliə etməyə və öyrənməyə çalışır. Əminəm ki, bu gün bütün zəhmətimizi dəyərləndirəcək və yüksək bal toplayacaq. Sınaqlardan 600-ə yaxın bal toplayıb. Bu dəfə də ondan eyni nəticəni gözləyirik”.
Nəhayət, imtahanın başlamasından 2 saat keçdikdən sonra abituriyentlər az-az da olsa, binanı tərk etməyə başladılar. III ixtisas qrupu üzrə imtahan verən Xəyyam Həsənov imtahandan olduqca razı ayrılıb: “İmtahan normal keçdi. Çox abituriyent sualların çətinliyindən şikayət etsə də, o qədər də çətin deyildi. İki ildir ki, sərasər imtahanlara hazırlaşıram. Sınaqlardan da yüksək bal toplamışam. İmtahan zamanı həyəcanlanıb özümü itirərəm deyə narahat olsam da, sual kitabçasını əldə etdikdən sonra bütün qorxularım yox oldu. Yüksək nəticə əldə edəcəyimə inanıram”.
Kəmalə Hüseynova isə Xəyyamdan fərqli olaraq, sualların, xüsusilə də, Ədəbiyyat fənni üzrə sualların çətinliyini dilə gətirib: “III ixtisas qrupu üzrə imtahan verdim. İmtahan normal keçdi. Amma ədəbiyyatdan suallar çox çətin idi. İlk növbədə bildiyim sualları cavablandırmağa çalışdım. Bu imtahanın nəticələri yüksək olmazsa, növbəti imtahanda bir daha şansımı sınamağı düşünürəm”.
Məlumat üçün bildirək ki, imtahan nəticələrinin yaxın 3-4 gün ərzində elan edilməsi nəzərdə tutulur. Mayın 7-də isə I və IV ixtisas qruplarına sənəd verən abituriyentlərin bilikləri yoxlanılacaq. İyul ayında isə abituriyentlərə daha bir şans veriləcək. Belə ki, bu il ilk dəfə olaraq abituriyentlərə ikinci dəfə imtahan vermək üçün şans yaradılacaq.
Müşfiqə BAYRAMLI

Paylaş:

Baxılıb: 568 dəfə