Ürək-damar xəstələri də COVID-19 pandemiyası dövründə ehtiyatlı olmalıdırlar

Bakı:

29 °C

51 %

1 m/s

Əlaqə

AZ RU EN

Ana səhifə / Sosial / Ürək-damar xəstələri də COVID-19 pandemiyası dövründə ehtiyatlı olmalıdırlar

Ürək-damar xəstələri də COVID-19 pandemiyası dövründə ehtiyatlı olmalıdırlar

30.12.2020 [09:15]

Ürək-damar xəstəliklərindən əziyyət çəkən şəxslərin yeni növ koronavirus (COVID-19) infeksiyasına yoluxma riski yüksəkdir. Çünki COVID-19 virusu ürək-damar sisteminə təsir göstərərək xəstəliyin kəskinləşməsinə səbəb ola bilər. Ekspertlərin sözlərinə görə, ürək-damar xəstələri normal həyatda riayət etdikləri qaydaları COVID-19 pandemiyası dövründə də gözləməlidirlər.
Məsələ ilə bağlı qəzetimizə açıqlama verən Azərbaycan Tibb Universiteti Tədris-Cərrahiyyə Klinikasının invaziv kardioloqu Sara Bayramzadə bildirib ki, COVID-19 infeksiya olsa da, təkcə ağciyərlərin yoluxmasına deyil, yanaşı olaraq ürək-damar sisteminin xəstəliklərinə də ciddi təsir göstərir. Ona görə də kardioloji xəstələr normal həyatda gözlədikləri qida pəhrizi qaydalarına, duzsuz diyetaya riayət etdikləri kimi COVID-19 pandemiyası dövründə də həmin qaydaları gözləməlidirlər: “Həmin dövrdə bol meyvə-tərəvəzə üstünlük verməli, gün ərzində 5 qramdan artıq yodlaşdırılmış duz qəbul etməməlidirlər. Ürək çatışmazlığı və arterial təzyiqi olan xəstələr həddindən artıq duzlu qidalardan istifadə etdikdə orqanizmdə artıq maye toplanmasına və ürək çatışmazlığının kəskinləşməsinə səbəb olur. Tünd çay içilməsi ürək döyüntülərini artırdığına görə onun qəbul edilməsi tövsiyə olunmur və açıq rəngli çaylardan istifadə edilməsi daha yaxşı olar. Təkcə ürək-damar xəstələrinə deyil, sağlamlıq problemi olmayanlara da gün ərzində 5 kilometr sürətli yeriş məsləhət görülür. Pandemiya dövründə məhdudiyyətlərlə əlaqədar açıq havada olmasa da, evin içində, eyvanda, dəhlizdə də iti addımlarla gəzmək mümkündür”.
Həkim-kardioloq COVID-19-la əlaqədar bəzi xəstələrdə yaranan panikatak barəsində isə bunları söyləyib: “Nə qədər maarifləndirilsələr də, insanlar bəzən öz psixoloji aləmlərini idarə edə bilmirlər. Letallıq daha çox yanaşı xəstəliyi olanlar və COVID-19 infeksiyasına yoluxduğuna inanmayıb heç bir müalicə qəbul etmədən öz vəziyyətini ağırlaşdıranlar arasında baş verir. Xəstəliyin əlamətləri hiss olunmağa başlayan ilk günlərdə həkimə müraciət edən xəstə virus əleyhinə preparatlar və vitaminlər qəbul edərək əvvəlki sağlamlığına qovuşa bilər. Vaxtında ilkin əlamətləri ciddi qəbul edib ona məhəl qoymayan xəstələrə sonrakı mərhələdə heç bir müalicə kömək etmir. Ona görə də qorxu hissi, panikatak yaşamağa ehtiyac yoxdur. Bitki tərkibli sakitləşdiricilər, açıq havada olmaq və özünütəlqinlə vəziyyəti sakitləşdirmək, vaxtında müdaxilə ilə vəziyyəti aradan qaldırmağa çalışmaq lazımdır”.
MÜŞFİQƏ

Paylaş:

Baxılıb: 691 dəfə