Firuddin Əliyev: Son dövrlərdəki yanğınların 90 faizindən çoxu məhz insan ehtiyatsızlığı ucbatından baş verir

Bakı:

22 °C

88 %

3 m/s

AZ RU EN

Ana səhifə / Sosial / Firuddin Əliyev: Son dövrlərdəki yanğınların 90 faizindən çoxu məhz insan ehtiyatsızlığı ucbatından baş verir

Firuddin Əliyev: Son dövrlərdəki yanğınların 90 faizindən çoxu məhz insan ehtiyatsızlığı ucbatından baş verir

05.08.2021 [08:43]

Məlum olduğu kimi son vaxtlar qardaş Türkiyə də daxil olmaqla, dünyanın bir çox ölkələrində meşə yanğınları tüğyan edir. Bəzən təkcə meşələrin deyil, hətta kənd və qəsəbələrin belə alovlara qərq olması ilə nəticələnən bu yanğınların baş verməsində isə əksərən insan ehtiyatsızlığı əsas rol oynayır. Bu isə bizlərdən daha da ehtiyyatlı olmağı tələb edir.
Öz növbəsində, mövzu ilə bağlı qəzetimizə açıqlama verən Ekologiya və Təbii Sərvətlər Nazirliyi (ETSN) Bioloji Müxtəlifliyin Qorunması Xidmətinin rəisi Firuddin Əliyev də öncə onu deyib ki, nazirlik tərəfindən aparılan statistikaya əsasən, son dövrlərdəki yanğınların 90 faizindən çoxu məhz insan ehtiyatsızlığı ucbatından baş verir: “Çox təəssüf ki, hər il maarifləndirici tədbirlər həyata keçirməyimizə və bu barədə ətraflı məlumat verməyimizə baxmayaraq, hələ də bu qaydalara əməl etməyən vətəndaşlarımız mövcuddur. Amma müsbət halları da qeyd etmək lazımdır. Belə ki, artıq son dövrlərdə baş verən yanğınların söndürülməsində yerli kənd icmalarının nümayəndələrinin, həmçinin yerli sakinlərin də fəal iştirak etdiklərinin şahidi oluruq”.
F.Əliyev bildirib ki, təbiətdə baş verən yanğınların qarşısını almaq məqsədilə ETSN tərəfindən mütəmadi təlimlər keçirilir: “Buraya, həmçinin Fövqəladə Hallar Nazirliyinin (FHN) əməkdaşları da cəlb olunurlar. Təlimlər zamanı “yanğın baş verəndə hansı funksiyalar yerinə yetirilməlidir”, “hansı qabaqlayıcı tədbirlər görülməlidir” kimi suallar ətrafında müzakirələr aparılır”.
Müsahibimiz onu da xatırladıb ki, cari ildən başlayaraq bu kimi tədbirləri praktik olaraq həyata keçirməyə başlamışıq: “Belə ki, əzilərdə baş vermiş imitativ yanğın prosesi zamanı əməkdaşların reaksiyasını yoxlayıb, onları qiymətləndiririk”.
“Təbii ki, heç kəs təbiət hadisələrindən yuz faiz sığortalanmayıb. Buna baxmayaraq, hadisənin fəsadlarını minimuma endirmək üçün əlimizdən gələni etməliyik. Bildirmək istəyirəm ki, xüsusilə bu həssas dövrlərdə vətəndaşlar təbiət qoynunda olarkən açıq alovdan qətiyyən istifadə etməsinlər. Piknik yerlərini tərk edərkən ərazidə qalanan ocağın sönməsindən tam əmin olsunlar. Meşəlik ərazilərə siqaret kötüklərini atmasınlar. Onu da qeyd edim ki, kənd təsərrüfatı məqsədilə əkilmiş sahələr biçildikdən, məhsul yığıldıqdan sonra sahələrə od vurulur və düşünülür ki, bu yolla növbəti məhsuldarlığın daha da çox olmasını təmin etmiş olurlar. Bu, tamamilə yanlış yanaşmadır. Əslində elə yanğınların baş verməsi torpağın üst hissəsində olan mineralların məhv olmasına gətirib çıxarır. Nəticədə, bu yanğınlar baş verdiyi zaman həmin əkin sahələrindən meşəlik ərazilərə, digər yaşıllıq ərazilərə od düşür və bunun da qarşısını almaq çox çətin olur. Əgər həmin günlərdə küləkli hava müşahidə olunursa ümumiyyətlə bu yanğına müdaxilə etmək çox çətinlik yaradır”, - deyə Firuddin Əliyev sonda vurğulayıb.
MÜŞFİQƏ

Paylaş:

Baxılıb: 808 dəfə