AzərTAc-ın xüsusi müxbiri ABŞ-ın “Eurasia Hoy” qəzetində dərc olunmuş məqaləsində Ermənistanın işğalçılıq siyasətindən yazıb

Bakı:

30 °C

52 %

7 m/s

AZ RU EN

Ana səhifə / Xarici siyasət / AzərTAc-ın xüsusi müxbiri ABŞ-ın “Eurasia Hoy” qəzetində dərc olunmuş məqaləsində Ermənistanın işğalçılıq siyasətindən yazıb

AzərTAc-ın xüsusi müxbiri ABŞ-ın “Eurasia Hoy” qəzetində dərc olunmuş məqaləsində Ermənistanın işğalçılıq siyasətindən yazıb

02.09.2014 [09:03]

ABŞ-ın ispandilli “Eurasia Hoy” qəzetində AzərTAc-ın Vaşinqtondakı xüsusi müxbiri Yusif Babanlının “Füzuli, Cəbrayıl və Qubadlı - müharibənin acı tarixi” sərlövhəli məqaləsi dərc edilib.
Məqalədə Ermənistan silahlı qüvvələrinin Azərbaycanın Dağlıq Qarabağ bölgəsini və ona bitişik yeddi rayonunu işğal etməsindən və 1992-ci ilin fevralında törədilmiş Xocalı qətliamı da daxil olmaqla dinc azərbaycanlı əhaliyə divan tutmasından bəhs edilir.
Müəllif yazır ki, ermənilər Dağlıq Qarabağ regionu ilə yanaşı, 1993-cü il iyulun sonunadək Azərbaycanın Kəlbəcər və Ağdam rayonlarını da işğal ediblər və bu ərazilərdə etnik təmizləmə aparıblar. Bu rayonların işğalından sonra BMT Təhlükəsizlik Şurası tərəfindən 822 və 853 saylı qətnamələrin qəbul olunmasına baxmayaraq, Ermənistan ordusu hücumlarını davam etdirərək 1993-cü il avqustun 23-də Füzuli və Cəbrayıl rayonlarını, avqustun 31-də isə Qubadlı rayonunu işğal edib.
Yazıda qeyd edilir ki, BMT Təhlükəsizlik Şurası Füzulinin işğalından dörd gün əvvəl Ermənistanı bu rayona hücumları dayandırmağa çağırıb, lakin işğalçı ölkənin rəhbərliyi həmişə olduğu kimi, beynəlxalq birliyin müraciətinə məhəl qoymayıb.
Məqalədə “Human Rights Watch” təşkilatının Dağlıq Qarabağ münaqişəsi üzrə hesabatına istinad edilərək bildirilir ki, adları çəkilən rayonların işğalı günlərində mülki əhali ermənilər tərəfindən aramsız artilleriya atəşinə tutulub. Sakinlər işğal edilmiş rayonları Araz çayı boyunca yeganə ensiz torpaq sahəsindən keçməklə tərk ediblər. Bu, sübut edir ki, Ermənistan ordusunun məqsədi yalnız ərazilərin işğal edilməsi deyil, həm də azərbaycanlı əhaliyə divan tutmaq olub. Müəllif vurğulayır ki, yüzlərlə qaçqın artilleriya atəşindən daldalanmaq üçün Araz çayını üzüb keçməklə İran ərazilərinə getmək qərarına gəlib. Onların çoxu isə suda boğulub.
Müəllif diqqətə çatdırır ki, 1993-cü il oktyabrın 14-də BMT Təhlükəsizlik Şurası Ermənistanın işğalçı ordusunun hərəkətlərini pisləyən, qoşunların dərhal çıxarılmasına və məcburi köçkünlərin geri qayıtması üçün şərait yaradılmasına çağıran 874 nömrəli qətnamə qəbul edib. Ermənistan bu tələbə də etinasızlıq göstərib və oktyabrın 29-da Zəngilan rayonunu işğal edib. Noyabrın 12-də isə BMT Təhlükəsizlik Şurası 884 saylı qətnaməni qəbul edib. Lakin rəsmi Yerevan bu sənədə də məhəl qoymayıb. 1993-cü il dekabrın 22-də Azərbaycan ordusu əks-hücuma başlayıb və bunun nəticəsində Horadiz qəsəbəsi, Füzuli rayonunun 22 kəndi, Ağdamın və Ağdərənin bəzi strateji yüksəklikləri ermənilərdən azad edilib.
Sonda müəllif Azərbaycanın işğal altındakı ərazilərinin tezliklə azad olunacağına və məcburi köçkünlərin doğma yurd-yuvalarına qayıdacaqlarına əminliyini ifadə edir.

Paylaş:

Baxılıb: 1559 dəfə