İtaliyanın AGİ xəbər agentliyi Azərbaycan-İtaliya mədəni əlaqələrini təhlil edib

Bakı:

26 °C

38 %

6 m/s

Əlaqə

AZ RU EN

Ana səhifə / Xarici siyasət / İtaliyanın AGİ xəbər agentliyi Azərbaycan-İtaliya mədəni əlaqələrini təhlil edib

İtaliyanın AGİ xəbər agentliyi Azərbaycan-İtaliya mədəni əlaqələrini təhlil edib

02.09.2014 [09:04]

İtaliyanın AGİ xəbər agentliyinin saytında Azərbaycan-İtaliya mədəni əlaqələrinin təhlil olunduğu məqalə yerləşdirilib.
Məqalədə qeyd olunur ki, cari ilin iyulunda Azərbaycan Respublikasının Prezidenti İlham Əliyevin İtaliyaya rəsmi səfəri çərçivəsində bir çox istiqamətlərdə, o cümlədən mədəniyyət sahəsində münasibətlərin daha da genişləndirilməsi diqqət mərkəzində olub. Ölkələrimiz arasında qəbul olunmuş “Azərbaycan Respublikası ilə İtaliya Respublikası arasında strateji tərəfdaşlıq haqqında Birgə Bəyannamə”də də mədəni əlaqələrin dərinləşdirilməsinin vacibliyi vurğulanıb.
Azərbaycan-İtaliya mədəni əlaqələrinin həmişə yüksək səviyyədə olduğunu yazan müəllif diqqətə çatdırır ki, hər iki ölkədə qarşılıqlı şəkildə konsertlərin və sərgilərin təşkil edilməsi, müxtəlif mədəni tədbirlərin birgə keçirilməsi bunun bariz nümunəsidir. “Azərbaycan uzun müddətdir ki, İtaliyanın mədəni həyatına mühüm töhfələr verməkdədir. Heydər Əliyev Fondunun dəstəyi ilə Romanın Kapitolini Muzeyinin “Filosoflar zalı”nın təmiri, Müqəddəs Roma katakombalarının bərpası, Aleksandria ərazisində qazıntıların aparılmasına Azərbaycan tərəfindən maddi yardımın ayrılması bu töhfənin ən gözəl nümunələrindəndir”.
Yazıda, həmçinin cari il sentyabrın 12-də İtaliyanın Verona şəhərindəki simfonik musiqi konsertləri və opera tamaşaları ilə dünyada məşhur olan “Arena Di Verona” amfiteatrında Azərbaycan musiqisi konsertinin keçiriləcəyi ilə bağlı məlumat verilib. Qeyd olunub ki, konsertdə Azərbaycanın Xalq artisti Yalçın Adıgözəlovun dirijorluğu ilə İtaliyanın tanınmış simfonik orkestri “Orchestra Italiana del Cinema” və “Qarabağ” muğam ansamblı, məşhur ifaçılar Mənsum İbrahimov, Aygün Bayramova və Azər Rzazadə Azərbaycan musiqisinin əvəzsiz nümunələrini təqdim edəcəklər. Müəllif Azərbaycanın muğam sənətinin UNESCO-nun Qeyri-Maddi Mədəni İrs Siyahısına daxil edildiyini oxucuların diqqətinə çatdıraraq bildirir ki, Veronada keçiriləcək bu konsert Azərbaycan və İtaliya arasında yaxın mədəni əlaqələrin parlaq nümunələrindən biri olacaq.
Məqalədə Azərbaycanın İtaliyadakı səfiri Vaqif Sadıqovun bu fikirlərinə də yer verilib: “Verona bütün dünyada məşhur olan bir şəhərdir. Musiqiçilərimizin burada keçirilən konsertdə iştirak etməsindən olduqca məmnunuq. Bu konsert bizim Verona sakinlərinə hədiyyəmizdir”.

Paylaş:

Baxılıb: 1691 dəfə