Ermənipərəst konqresmenlərin ölkəmizə qarşı olan “arzularına” sevinən bir ermənilərdir, bir də “beşinci kolon”un nümayəndələri

Bakı:

20 °C

64 %

2 m/s

AZ RU EN

Ana səhifə / Xarici siyasət / Ermənipərəst konqresmenlərin ölkəmizə qarşı olan “arzularına” sevinən bir ermənilərdir, bir də “beşinci kolon”un nümayəndələri

Ermənipərəst konqresmenlərin ölkəmizə qarşı olan “arzularına” sevinən bir ermənilərdir, bir də “beşinci kolon”un nümayəndələri

09.01.2015 [10:03]

Məlum olduğu kimi, həyata keçirilən inkişaf siyasəti nəticəsində Cənubi Qafqaz regionunun lider dövlətinə çevrilən Azərbaycan, eyni zamanda, beynəlxalq aləmdə yaxın tərəfdaş, etibarlı müttəfiq kimi qəbul edilir. Daha dəqiq desək, Ulu öndər Heydər Əliyevin əsasını qoyduğu və Prezident İlham Əliyev tərəfindən uğurla davam və inkişaf etdirilən bu siyasət Azərbaycanın beynəlxalq aləmdə kifayət qədər ciddi tərəfdaş kimi qəbul edilməsində mühüm rol oynayıb. Azərbaycan hakimiyyətinin yürütdüyü xarici siyasət kursunun aydın və səmimi olması nəticə etibarı ilə dünya tərəfindən təqdir edilir. Məsələlərə yalnız beynəlxalq hüquq və milli maraqlar çərçivəsindən yanaşması və ədalətli mövqeyi Azərbaycanın bütün dövlətlərlə eynidərəcəli münasibətlər qurmasına imkan verir.
Bu gün Azərbaycan, eyni zamanda, bir sıra mühüm beynəlxalq tədbirlərin ev sahibi kimi çıxış edir. Dünyanın əksər böyük dövlətlərinin, təşkilatların rəhbərləri, nümayəndələri məhz bəşəriyyətin qarşılaşdığı problemlərdən çıxış yollarını Bakıda təşkil olunan tədbirlərdə müzakirə edirlər. Bu, həm də ölkəmizin beynəlxalq aləmdəki nüfuzunun, hər zaman diqqət mərkəzində olmağımızın göstəricisi sayıla bilər.
Amma təəssüflə qeyd etmək lazımdır ki, bəzi məqamlarda Azərbaycanın bu uğurları bir sıra şəxslər və ölkəmizə qarşı olan antimilli mərkəzlər tərəfindən həzm edilmir. Müstəqillik tarixinin az olmasına baxmayaraq mühüm nailiyyətlər əldə etmiş Azərbaycanın iqtisadi-siyasi yüksəlişi və bunun nəticəsində də Ermənistan-Azərbaycan, Dağlıq Qarabağ münaqişəsində öz ərazi bütövlüyünü təmin etmək istiqamətində əsaslı üstünlük əldə etməsi xüsusilə erməniləri və xaricdəki ermənipərəstləri qıcıqlandırır. Bunun nəticəsidir ki, “beynəlxalq QHT” pərdəsi altında gizlənən təşkilatlar min bir yalanlarla ölkəmizə qarşı təzyiq kampaniyası aparmağa cəhd göstərirlər.
Belə ki, Azərbaycanın dinamik inkişafından, müasir dünya siyasəti və beynəlxalq münasibətlər sistemindəki mövqeyinin davamlı surətdə möhkəmlənməsindən narahatlıq keçirən bu dairələr “demokratiya”, “insan hüquqları” kimi məfhumlardan istifadə edərək ölkəmizə qarşı öz maraqlarını diktə etməyə çalışırlar. Məsələn, “Freedom House” təşkilatının sabiq prezidenti, ABŞ Mərkəzi Kəşfiyyat İdarəsinin agenti kimi tanınan, hazırda Vaşinqtondakı Makkeyn İnstitutunun baş direktoru Devid Kramer ABŞ mətbuatındakı məqaləsində Azərbaycanda müəyyən şəxslərin qanun pozuntusuna görə məsuliyyətə cəlb olunmasını siyasiləşdirərək bunu demokratiya və insan haqları problemi kimi təqdim etməyə çalışıb. Beləliklə, o, ölkəmizdə hüququn aliliyi prinsipini heçə sayaraq qanun pozuntularına yol vermiş şəxsləri müdafiə edib, bir növ, onların cinayətkar fəaliyyətinə haqq qazandırıb. Bundan başqa, o, Azərbaycana qarşı müəyyən təzyiqlərin göstərilməsi təklifi ilə çıxış edib. Devid Kramer, hətta öz məqaləsində yayda keçiriləcək ilk Avropa Oyunlarını da hədəfə alıb.
Yeri gəlmişkən, ermənipərəstlərin daha bir dəstəkçisi konqresmen Bill Keatinq də cinayətdə təqsirli bilinən bəzi şəxslərin həbsini siyasiləşdirməyə və bundan da manipulyativ şəkildə istifadə etməyə çalışıb. Yenidən özünəməxsus şəkildə “demokratiya” və “insan haqları” ifadələrindən qalxan kimi istifadə etməyə çalışan bu şəxslər, görəsən, nə üçün illərdir ki, işğalçı Ermənistan tərəfindən hüquqları pozulan vətəndaşlarımızın qayğısına qalmağı yada salmayıblar. Maraqlıdır nə üçün istər Kramer, istərsə də Keatinq bir dəfə də olsun işğalçı Ermənistana qarşı hansısa sanksiyaların tətbiqi ilə bağlı “təkliflə” çıxış etməyiblər?
Əslində, bu sualların cavabları məlumdur. Azərbaycanın uğurlarından narahat olan ermənilər bu qüvvələrin əli ilə ölkəmizə qarşı yenidən çirkin kampaniya həyata keçirməyə çalışırlar. Çünki ermənilər və imperialist təfəkkürə malik mərkəzlərə başçılıq edənlər Azərbaycanın müstəqil siyasət yürütməsindən narahatlıq keçirirlər. Bu narahatlıqlarını isə özünəməxsus yalanlarla ifadə etməyə çalışırlar.
Bu fonda təəssüfləndirici hal isə ondan ibarətdir ki, ermənipərəst amerikalı konqresmenlərin, ermənilərin ölkəmizə qarşı apardıqları bu kampaniyanın dəstəkçisi qismində çıxış edənlərin bir qrupunu da hər zaman olduğu kimi, radikal müxalifət düşərgəsi, “beşinci kolon” adlanan xəyanətkar dəstə təşkil edir. Məsələn, AXCP sədrinin müavini Fuad Qəhrəmanlı az qala sevinə-sevinə ölkəmizə qarşı hansısa qarayaxmanı dəstəklədiyini bildirir. Bu isə onu göstərir ki, “beşinci kolon” sayılan bu xəyanətkar dəstə yenidən erməni “dəyirmanına su tökməkdə” və öz ampluasındadır. Görəsən, bu şəxslər öz mətbu ruporlarında anti-Azərbaycan təbliğatı aparmaqla nəyə nail olacaqlarını düşünürlər? İndiyə qədər Azərbaycanın ərazi bütövlüyü, ermənilərin təcavüzü ilə bağlı istər daxili, istərsə də xarici arealda bir dəfə də olsun danışmayan, amma ermənilərin “hüquqlarının” müdafiəsi ilə bağlı yaxa cıran belələri özlərini hansı millətdən hesab edirlər? Bu, bir daha xalqın maraqlarına, dövlətin mənafeyinə düşmən kəsilən bu zavallı düşərgə üçün ülvi, müqəddəs dəyərlərin olmamasını sübuta yetirir. Vətəndaşlıq mövqeyini, dövlət, millət hisslərini unudan, yalnız ermənilərin verdikləri ianələri düşünən, milli maraqları siyasi alver predmetinə çevirən belələri üçün əsas olan yalnız ermənilərin göndərəcəkləri pullardır. Bu pulun yolunda isə onlar nəinki Kramerin və ya Keatinqin, hətta düşmən erməninin də fikrini açıq dəstəkləyirlər.
P.SADAYOĞLU

Paylaş:

Baxılıb: 1828 dəfə