Baş nazir yeni siyasi imtahan qarşısındadır

Bakı:

23 °C

64 %

4 m/s

Əlaqə

AZ RU EN

Ana səhifə / Xarici siyasət / Baş nazir yeni siyasi imtahan qarşısındadır

Baş nazir yeni siyasi imtahan qarşısındadır

07.06.2022 [10:00]

Boris Consona qarşı etimadsızlıq planı

PƏRVİZ

Son dövrlərdə Rusiya-Ukrayna münaqişəsində işlərin Qərbin arzuladığı kimi inkişaf etməməsi göz önündədir. Bu isə anti-Rusiya blokunun ən fəal üzvlərindən sayılan Böyük Britaniya üçün də müəyyən “siyasi problemlər” yaratmaqdadır. Belə ki, bir neçə il öncə Aİ üzvlüyündən çıxaraq Avropanın “siyasi qütb” kimi formalaşması prosesinə zərbə vuran və bununla da ABŞ-ın qlobal liderliyi üçün “yaşıl işıq” yandıran Britaniya krallığının Baş naziri Boris Conson maraqlı siyasi ittihamla üz-üzə qalıb. Krallıq parlamentinin üzvləri Consonu etimad səsverməsinə çıxarmaq üçün kifayət qədər səs toplayıblar. “Bu barədə “Sunday Times” öz mənbələrinə istinadən yazır. Nəşrin məlumatına görə, müvafiq səsvermənin iyunun 8-də keçirilməsi nəzərdə tutulur. Bunun üçün isə səbəb və ya əsas Mühafizəkarlar Partiyasının 54 deputatının sorğu məktubları olub. Hazırda prosesin məxfiliyinin qorunmasına çalışılsa da, artıq 28 deputat Consonu açıq şəkildə könüllü istefaya səsləyib.

Qeyd edək ki, Conson məlum Partygate qalmaqalı səbəbindən ittiham olunur. Baş nazir COVID-19 pandemiyası dövründə alkoqollu ziyafətlər təşkil etməkdə günahlandırılır. Halbuki, həmin dövrdə ölkədə bu cür toplantılar qadağan edilmişdi. Bu yaxınlarda aparılan araşdırma nəticəsində məlum olub ki, Conson əvvəllər bu faktı təkzib etsə də, həmin ziyafətlərdə şəxsən iştirak edib. Məlum hadisə isə Consonun siyasi reytinqinin aşağı düşməsinə səbəb olub - ConservativeHome-un yazdığına görə, o, partiya üzvlərinin “kabinet masası hesabatı”nda sonuncu yeri tutur. Hesabatda bildirilir ki, britaniyalıların onun işindən məmnunluq reytinqi də mənfi 15-ə düşüb.

Conson kabinetinin son davranışları - liberalizm xilas yoludurmu?

Qeyd edək ki, britaniyalı Baş nazirə irəli sürülən məlum ittihamın “üzdə bəhanə fürsəti” anlamı verdiyi ilk baxışdan məlum olur. Yuxarıda adıçəkilən ittihamda vaxtilə Boris Consonla yanaşı bir sıra britaniyalı nazirlər günahlandırılsalar da, hazırda hədəf yalnız baş nazirə fokuslanıb. Bu isə məsələnin heç də üzdə göründüyü kimi olmadığı anlamını verir və siyasi səbəblərini ortaya qoyur. Bu səbəblərdən biri, bəlkə də birincisi son dövrlərdə Rusiyanın Ukrayna ərazisində fəal hərbi əməliyyatlara start verməsi, bunun qarşılığında isə Avropanın prosesə fəal müdaxiləsinin təşkil edilməməsidir. Xatırladaq ki, bir müddət öncə Aİ-nin videokonfransına qatılan Ukrayna prezidenti Volodimir Zelenski də “köhnə qitə”ni qınamışdı. O bildirmişdi ki, Avropa yalnız quru bəyanatlar səsləndirməklə işini bitmiş sayır. Zelenski Rusiya neftindən imtina etməyən Avropa ölkələrini açıq şəkildə hədəfə almışdı. Ukraynanın Aİ üzvlüyü məsələsinin düyünə “salınması”nı da ölkə başçısı Avropanın qeyri-səmimiliyi kimi ifadə etmişdi.

Həqiqətən də, Rusiyanı iqtisadi məngənəyə salmağı nəzərdə tutan 6-cı sanksiya paketinin məlum iflası Moskva üçün stimula çevrilib. “Köhnə qitə”nin prosesi sakit şəkildə izləməsi, üstəlik, Mərkəzi Avropa dövlətlərinin bir sıra şirkətlərinin Rusiyanın tələblərinə boyun əyərək enerji daşıyıcılarını rubl qarşılığında idxal etməsi, hətta Aİ-nin də buna xüsusi razılıq verməsi anti-Rusiya koalisiyasındakı çatdan xəbər verir. Britaniya isə Aİ üzvü olmadığı üçün prosesə təmas etmək qabiliyyətində deyil. Britaniyadakı ABŞ siyasətinin dəstəkçiləri isə gözlənilən təzyiqin sadəcə istənilmədiyi üçün edilmədiyi fikrindədirlər. ABŞ xarici siyasət kursunun əsas müttəfiqi sayılan Britaniyanın prosesdəki zəif iştirakı isə məlum kabinet dəyişikliyi məsələsini zəruri edir ki, indiki halda bunun adı “içki ziyafəti” qoyulub...

Britaniya Uzaq Şərq planından yayınır?

Maraqlıdır ki, Britaniyanın son günlərdə tutduğu mövqedəki anlaşılmazlıq yalnız Rusiya ilə məhdudlaşmır. Belə ki, ABŞ-ın açıq şəkildə Çinə meydan oxuduğu, Yapon dənizinin “təlim poliqonuna” çevrildiyi bir vaxtda Londan sükuta qərq olub. ABŞ prezidenti Co Baydenin məlum Uzaq Şərq səfəri zamanı “AUKUS+3” formatında keçirdiyi görüşlərə, əldə olunan razılaşmalara və ya qurulan yeni koalisiyalara Londonun reaksiyası yoxdur. Bu, rəsmi Vaşinqton üçün mühüm amildir. Üstəlik, Çinə qarşı aparılan “KİRPİ” planında da rəsmi Londan “gözə dəymir”. Tayvan adası ilə bağlı Britaniya parlamentariləri səviyyəsində belə loyal bəyanatlar eşidilmir. Bu isə, başlama ehtimalı günü-gündən böyüyən növbəti qlobal savaşda Britaniyanın tutacağı mövqeni müttəfiqləri üçün anlaşılmaz edir. Əgər II Dünya müharibəsindəki kimi, Britaniya yalnız qalibiyyətə şərik olacaqsa, bu, ABŞ-a və onun müttəfiqləri üçün gərəkli olmaya bilər. Bəzi siyasi mütəxəssislər Britaniyanın əvvəlkinə nisbətən daha liberal xətt seçməsini Avropada irəliləməyə başlayan ərzaq, enerji böhranı kimi problemlərlə əlaqələndirirlər. “Dumanlı Albionun” sis içində gözdən itməyə çalışması isə yaxşı əlamət olmaya bilər. Əks halda bu iddiaların Consonun “impiçmentinin” müzakirəsi üçün fəal arqumentə çevrilməsi qaçılmazdır...

Paylaş:

Baxılıb: 1298 dəfə