8 Mart - Beynəlxalq Qadınlar Günü və Azərbaycan Qadınının Cəmiyyətimizdə Rolu

Bakı:

9°C

93%

0m/s

Əlaqə

AZ RU EN

Ana səhifə / YAP xəbərləri / 8 Mart - Beynəlxalq Qadınlar Günü və Azərbaycan Qadınının Cəmiyyətimizdə Rolu

8 Mart - Beynəlxalq Qadınlar Günü və Azərbaycan Qadınının Cəmiyyətimizdə Rolu

06.03.2025 [16:44]

Abbas Pənahov,

Yeni Azərbaycan Partiyası Nəsimi rayon təşkilatının sədr müavini

8 Mart - Beynəlxalq Qadınlar Günü, dünyada qadınların hüquqları, nailiyyətləri və cəmiyyətdəki mühüm rolları üçün qeyd olunan xüsusi bir gündür. Azərbaycan tarixində qadınların rolu əsrlər boyu böyük olmuşdur. Qadınlar hər zaman cəmiyyətin ən aktiv üzvlərindən biri olmuş, ölkənin inkişafında mühüm töhfələr vermişlər.

Azərbaycan qadınları 1918-ci ildə seçmək və seçilmək hüququ qazanmışlar. Bu, Şərqdə ilk demokratik respublika olan Azərbaycan Xalq Cümhuriyyətinin qadınlara verdiyi mühüm bir nailiyyət idi.

Azərbaycan qadınları milli dəyərlərə sadiq qalaraq, ana dilinin, mədəniyyətinin və mənəviyyatının ən etibarlı dayaqları olmuşlar. Onlar nəsildən-nəslə milli adət-ənənələri ötürmüş, cəmiyyətin mənəvi inkişafında mühüm rol oynamışlar.

Azərbaycanda qadın hüquqlarının hüquqi əsasları möhkəm təməllərə söykənir. Ölkə bir sıra beynəlxalq təşkilatlara və konvensiyalara qoşulmuş, milli qanunvericilikdə qadın hüquqları mövzusunu təkmilləşdirmişdir.

Azərbaycanda qadın siyasətinin effektivliyini təmin edən bir sıra amillər vardır:

Azərbaycan Respublikası Prezidentinin 1998-ci il 14 yanvar tarixli Fərmanı ilə Azərbaycan Respublikasının Qadın Problemləri üzrə Dövlət Komitəsi yaradılmışdır.
1998-ci il 14 yanvar tarixində "Azərbaycanda qadınların rolunun artırılmasına dair tədbirlər haqqında" Sərəncam imzalanmışdır.
Ulu Öndər Heydər Əliyev tərəfindən 6 mart 2000-ci il tarixində "Azərbaycan Respublikasında dövlət qadın siyasətinin həyata keçirilməsi haqqında" Fərman imzalanmışdır.
2000-ci ildə Azərbaycan Respublikasının Nazirlər Kabineti 2000-2005-ci illər üçün "Azərbaycan Respublikasında Qadın Problemləri üzrə Milli Fəaliyyət Planı"nı qəbul etmişdir.
Azərbaycan Respublikasının Prezidenti İlham Əliyevin 2006-cı il 6 fevral tarixli Fərmanı ilə Azərbaycan Respublikasının Ailə, Qadın və Uşaq Problemləri üzrə Dövlət Komitəsi yaradılmışdır.
"Gender (kişi və qadınların) bərabərliyinin təminatları haqqında" Azərbaycan Respublikasının Qanunu 2006-cı il 10 oktyabr tarixində qəbul olunmuşdur.
2010-cu ildə "Məişət zorakılığının qarşısının alınması haqqında" Azərbaycan Respublikasının Qanunu qəbul olunmuşdur.

Azərbaycan bir sıra beynəlxalq təşkilatlara və konvensiyalara qoşulmuş, milli qanunvericilikdə qadın hüquqları mövzusunu təkmilləşdirmişdir:

1995-ci ildə "Qadınlara qarşı ayrı-seçkiliyin bütün formalarının ləğv olunması haqqında" konvensiya;
Beynəlxalq Əmək Təşkilatının (BƏT) qadın əməyi sahəsində qəbul etdiyi müxtəlif konvensiyalar;
"2008-2015-ci illərdə Azərbaycan Respublikasında yoxsulluğun azaldılması və davamlı inkişaf Dövlət Proqramı";
"Azərbaycan Respublikasının Məşğulluq Strategiyasının həyata keçirilməsi üzrə 2011-2015-ci illər üçün Dövlət Proqramı".

Bu gün Azərbaycan qadınları cəmiyyətin bütün sahələrində fəal iştirak edirlər. Onlar elm, təhsil, mədəniyyət, səhiyyə, siyasət və digər sahələrdə mühüm nailiyyətlər əldə edirlər.

8 Mart - Beynəlxalq Qadınlar Günü, qadınların cəmiyyətdəki mühüm rolunu və hüquqlarını bir daha vurğulamaq üçün əla bir fürsətdir. Bu gün bütün qadınlara hörmət və ehtiramımızı bildirir, onlara can sağlığı, xoşbəxtlik və uğurlar arzulayırıq.

Paylaş:

Baxılıb: 330 dəfə