Novruz Bayramı-Birlik, Həmrəylik və Qələbə Rəmzi

Bakı:

12°C

87%

0m/s

Əlaqə

AZ RU EN

Ana səhifə / YAP xəbərləri / Novruz Bayramı-Birlik, Həmrəylik və Qələbə Rəmzi

Novruz Bayramı-Birlik, Həmrəylik və Qələbə Rəmzi

16.03.2025 [15:19]

Novruz bayramı Azərbaycan xalqının ən qədim və əziz milli bayramlarından biridir. Bu bayram yalnız təbiətin canlanmasını deyil, həm də dostluq, birlik və yüksək mənəvi dəyərləri tərənnüm edir. Müsbət dəyişikliklərin rəmzi olan Novruz bayramı Azərbaycanın tarixində, mədəniyyətində və milli dəyərlərində xüsusi yer tutur.

Ulu öndər Heydər Əliyev 21 mart 2000-ci il tarixində Novruz bayramının dərin məzmununu belə ifadə etmişdir: “Bu bayram bir də onunla fərqlənir və səciyyələnir ki, bu bayramda siyasi baxışlarından, siyasi dünyagörüşündən asılı olmayaraq hamı bayram edir... Bu, dostluq, həmrəylik, yüksək mənəviyyat bayramıdır.” Heydər Əliyevin sözləri Novruz bayramının hər kəsin ürəklərini bir araya gətirdiyini və insanlarda barış və dostluq hisslərini oyatdığını vurğulamaq üçün ən uyğun təsvirdir.

Novruz bayramı Azərbaycan xalqının milli adət-ənənələrini yaşadan, insanları öz köklərinə bağlı edən ənənələrdən biridir. Keçmişdən gələn bu bayram, əsrlər boyu mədəniyyətimizin ayrılmaz bir parçasına çevrilmişdir. Novruz bayramı yalnız milli deyil, həm də ümumbəşəri dəyərləri tərənnüm edir. O, sülhün, tolerantlığın və humanizmin simvoludur. Bayram günləri hər kəs birlikdə şadlanır, insanlar arasında sevgi və anlayış möhkəmlənir.

Novruz Bayramı əslində həm mədəniyyətimizin, həm də bəşəri dəyərlərin əksidir. Novruz hər zaman yeni başlanğıc rəmzi olub, eyni zamanda insanları bir masa ətrafına toplamağı, dostluq və sevgini önə çıxarmağı təşviq edir.

Baharın gəlişi ilə təbiətin oyanışını qeyd edən bu bayram həm də fərqli mədəniyyətləri və inancları birləşdirən universal bir dəyərdir. Hər bir detalı-xüsusilə də səməni, şamlar və şirniyyatlar-xeyirxahlıq, məhsuldarlıq və harmoniya anlamlarını daşıyır.

2007-ci ildə Mehriban xanım Əliyevanın təşəbbüsü ilə başlayan “Hərəmiz bir ağac əkək” kampaniyası, Novruz bayramının yalnız milli ənənələri yaşatmaqla məhdudlaşmadığını, həm də təbiətin qorunması və ekoloji problemlərin həllinə töhfə verən bir hadisə olduğunu göstərdi. Kampaniya başlayandan sonra respublikanın bütün şəhər, rayon və qəsəbələrində vətəndaşlar, ayrı-ayrı idarə və müəssisələrin kollektivləri bu çağırışa səs verərək, yaşıllaşdırma kampaniyasına qoşulmuşdur. Ətraf mühitin sağlamlaşdırılmasına, ekoloji problemlərin həllinə töhfə olan bu layihə çərçivəsində respublikanın bütün guşələrində yüz minlərlə ağac əkilmiş, yeni parklar və bağlar salınmışdır. Novruz bayramının beynəlxalq müstəvidə tanıdılması yönündə əhəmiyyətli işlər görülmüş, Azərbaycanın Birinci vitse-prezidenti Mehriban xanım Əliyevanın böyük səyi nəticəsində Novruz bayramı UNESCO tərəfindən Qeyri-Maddi Mədəni İrs üzrə Reprezentativ siyahısına daxil edilmişdir. Ümumiyyətlə, Mehriban xanım Əliyevanın bu bayramla bağlı təşəbbüs və əməkləri böyükdür.

Məlumdur ki, artıq, Azərbaycan xalqı ali hədəfinə çatmışdır. Azərbaycan Respublikasının Prezidenti, Müzəffər Ali Baş Komandan, ölkə Prezidenti, cənab İlham Əliyev Ümummilli Liderin vəsiyyətini və Azərbaycan xalqının arzularını reallaşdırdı. Ali Baş Komandanın rəhbərliyi altında müzəffər Azərbaycan Ordusu doğma torpaqlarımızı işğaldan azad etdi və biz artıq həmin ərazilərdə Novruz bayramını qeyd edirik.

Prezident İlham Əliyevin 20 mart 2021-ci il tarixində Şuşada söylədiyi bu sözlər tarixi və emosional əhəmiyyətə malikdir: “Biz Şuşanı bərpa edəcəyik, mütləq bərpa edəcəyik.” Bu ifadə, Azərbaycanın müstəqilliyinin və ərazi bütövlüyünün möhkəmlənməsi istiqamətindəki qətiyyətini göstərir.

Prezident İlham Əliyev 18 mart 2023-cü ildə Talışda demişdir: “Üçüncü dəfədir ki, Azərbaycan xalqına Novruz təbriklərimi doğma Qarabağ diyarından deyirəm.” Bu nitq, Qarabağın dirçəlişinə və inkişafına yönəlmiş diqqəti bir daha vurğulayır.

2024-cü ildə Xankəndində təşkil olunan bayram mərasimində Prezident İlham Əliyev demişdir: “Dördüncü dəfədir ki, bayram tonqalı azad edilmiş Qarabağ torpağında qalanır. Qələbəmizin növbəti rəmzi.” Bu sözlər, Azərbaycanın zəfərlər dolu tarixinin təcəssümüdür.

Novruz bayramı Azərbaycan xalqı üçün həm milli, həm də mənəvi dəyərdir. Heydər Əliyevin sözləri ilə desək, “Bu bayram insanları dostluğa, həmrəyliyə, qarşılıqlı anlaşmaya dəvət edir.” Bu əziz bayramın hər il qeyd edilməsi xalqımızın birliyinə, mənəvi dəyərlərinə və gələcək arzularına güclü töhfə verir.

Tutu Kamal qızı,

YAP Zəngilan rayon təşkilatının sədr müavini

Paylaş:

Baxılıb: 215 dəfə