İqtisadi sahədə əməkdaşlıq

Bakı:

24 °C

78 %

4 m/s

Əlaqə

AZ RU EN

Ana səhifə / YAP xəbərləri / İqtisadi sahədə əməkdaşlıq

İqtisadi sahədə əməkdaşlıq

04.04.2025 [15:41]

Müşfiq Səfərov,

YAP Beyləqan rayon təşkilatının sədri

Aprelin 1-də Almaniya Federativ Respublikasının Prezidenti Frank-Valter Ştaynmayerin Azərbaycana rəsmi səfəri iki ölkə arasında əlaqələrin daha da möhkəmləndiyini və qarşılıqlı faydalı əməkdaşlığın yeni mərhələyə qədəm qoyduğunu göstərir. Bu səfər siyasi-iqtisadi münasibətlərin inkişafına töhfə vermiş, xüsusilə bərpaolunan enerji və ekoloji sahələrdə yeni əməkdaşlıq imkanları yaradılmışdır. Həm təkbətək görüşdə söhbət əsnasında, həm də nümayəndə heyətlərinin iştirakı ilə aparılan danışıqlarda Almaniya-Azərbaycan əlaqələrinin gələcək inkişafı müzakirə edilmişdir. Azərbaycan Prezidenti İlham Əliyev tərəfindən verilən bəyanatlar əlaqələrin gələcək inkişafı ilə bağlı yeni perspektivlər açır.

İki ölkə arasında diplomatik əlaqələr 1992-ci ildən bəri davamlı olaraq güclənmişdir. Almaniya Azərbaycanın müstəqilliyini ilk tanıyan dövlətlərdən biri olmuş və ötən dövrdə ikitərəfli münasibətlər yüksələn xətlə inkişaf etmişdir. Almaniya Prezidenti bəyanatında iki ölkə arasında əlaqələrin strateji əhəmiyyətini bir daha vurğulamışdır. Dövlətimizin başçısı isə çıxışında qeyd edib ki, bu səfər bizim əlaqələrə yeni müsbət təkan verəcəkdir, iqtisadi sahədə əldə edilmiş nəticələr bizi təbii olaraq ruhlandırır. Azərbaycan və Almaniya arasında iqtisadi əlaqələrin inkişafı, xüsusilə ticarət dövriyyəsinin sürətlə artması ilə müşayiət olunmuşdur. Cari ilin yanvar-fevral aylarında ticarət dövriyyəsi təxminən üç dəfə artmışdır. Bu artımın əsas səbəbi Azərbaycan tərəfindən Almaniyaya ixrac edilən xam neftin həcminin artmasıdır. Gələcək illərdə, xüsusilə bərpaolunan enerji sahəsində əməkdaşlığın genişləndirilməsi planlaşdırılır. Azərbaycan 2030-cu ilə qədər bərpaolunan enerji istehsalını 6 giqavata çatdırmaq üçün məqsədyönlü işlər həyata keçirir. Bu sahədə Almaniyanın yüksək texnoloji təcrübəsi və sərmayələri Azərbaycanın enerji sektorunun modernləşdirilməsində mühüm rol oynaya bilər. Ötən ilin noyabr ayında ölkəmizin ev sahibliyi etdiyi COP29 tədbiri həm region, həm də qlobal miqyasda əhəmiyyətli nəticələr əldə etmişdir. Konfransda 197 ölkə iştirak etmiş və 77 mindən çox nümayəndə qeydiyyatdan keçmişdir. COP29-da əldə edilən uğurlar, xüsusilə iqlim dəyişikliyi ilə mübarizədə ölkələr arasında əlaqələrin güclənməsinə şərait yaradacaqdır. Almaniya ilə bu sahədəki təcrübə mübadiləsi və birgə layihələr Azərbaycanın ekoloji siyasətinin inkişafına böyük töhfə verəcəkdir.

Xarici siyasət kursunu son dərəcə düzgün quran Azərbaycan təkcə region ölkələri üçün deyil, həm də beynəlxalq aləmdə vacib tərəfdaşa çevrilib. Bölgənin iqtisadi, siyasi gücü olan ölkəmizin nüfuzu və mövqeyi günü-gündən möhkəmlənir. Qlobal arenada tərəfdaşlıq əlaqələrini genişləndirən Azərbaycan bu gün beynəlxalq münasibətlər sisteminin aparıcı aktoru kimi söz sahibidir. Liderlərin ölkəmizə səfərləri, qlobal əhəmiyyətli tədbirlərin məhz respublikamızda keçirilməsi qeyd olunanların təsdiqidir. Rəsmi Bakı dünyanın nüfuzlu dövlətləri, xüsusilə Qərbi Avropa ölkələri ilə siyasi və iqtisadi maraqlara uyğun olaraq qarşılıqlı hörmət və ehtirama əsaslanan geniş əlaqələr qurub. Bunun nəticəsidir ki, respublikamız artıq Avropanın enerji xəritəsini dəyişib və dünyanın maraq dairəsində qərarlaşıb.

Görüşün mühüm mövzularından biri də regional təhlükəsizlik məsələləri olub. Cənubi Qafqazdakı gərginliklər və Ermənistanla münasibətlərdəki vəziyyət, Azərbaycan üçün ən vacib prioritetlərdəndir. Prezident İlham Əliyev, Azərbaycanın regional təhlükəsizlik və sülhün bərqərar olması istiqamətində atdığı addımları, xüsusilə Ermənistanla normallaşan münasibətləri qeyd edib. Almaniya Prezidenti Ştaynmayer də Cənubi Qafqazda sülhün təmin edilməsi və bölgədəki gərginliyin azaldılması mövzusunda Azərbaycanın fəaliyyətini dəstəklədiklərini bildirib. O, həmçinin, Almaniyanın bu istiqamətdə Azərbaycanın səylərinə dəstək verməyə davam edəcəyini ifadə edib. Bu əməkdaşlıq, iki ölkə arasında siyasi əlaqələrin möhkəmləndirilməsinə və regional sabitliyin qorunmasına yardım edəcəkdir. Görüşdə Avropa İttifaqı ilə Azərbaycan arasındakı əlaqələr də xüsusi müzakirə mövzusu olub. Azərbaycanın Avropa ilə əlaqələrinin inkişafını prosesində Almaniyanın rolu yüksək qiymətləndirilib. Almaniyanın Avropa İttifaqı ilə Azərbaycan arasındakı əməkdaşlığın genişlənməsində və qarşılıqlı maraqların təmin edilməsində mühüm vasitəçi olduğunu bildirib.

Almaniyanın Avropa İttifaqında lider mövqeyə sahib olması, Azərbaycan üçün Avropa bazarlarına çıxışın genişləndirilməsi və siyasi, iqtisadi münasibətlərin daha da dərinləşdirilməsi baxımından böyük əhəmiyyət kəsb edir. Bu istiqamətdə iki ölkə arasındakı əməkdaşlıq, Azərbaycanın Avropa ilə əlaqələrini də möhkəmləndirəcək.

Paylaş:

Baxılıb: 511 dəfə