İqtisadi sahədə əməkdaşlıq

Bakı:

25 °C

78 %

8 m/s

Əlaqə

AZ RU EN

Ana səhifə / YAP xəbərləri / İqtisadi sahədə əməkdaşlıq

İqtisadi sahədə əməkdaşlıq

07.04.2025 [22:38]

Fəxrəddin Vəliyev,
YAP Şəmkir rayon təşkilatının sədri

Almaniya Azərbaycanın Avropada ən vacib siyasi-iqtisadi tərəfdaşlarından biridir. İkitərəfli münasibətlərimizin tarixində Almaniya Prezidentinin Azərbaycana ilk dəfə rəsmi səfər etməsi xüsusi əhəmiyyət daşıyır. Prezident Frank-Valter Ştaynmayerin Azərbaycana səfəri həm də iki ölkə arasında etibarlı tərəfdaşlığın hərtərəfli və yüksələn xətlə inkişafının əyani göstəricisidir.

Azərbaycan və Almaniya arasında iqtisadi əlaqələrin inkişafı, xüsusilə ticarət dövriyyəsinin sürətlə artması ilə müşayiət olunmuşdur. Cari ilin yanvar-fevral aylarında ticarət dövriyyəsi təxminən üç dəfə artmışdır. Bu artımın əsas səbəbi Azərbaycan tərəfindən Almaniyaya ixrac edilən xam neftin həcminin artmasıdır. Gələcək illərdə, xüsusilə bərpaolunan enerji sahəsində əməkdaşlığın genişləndirilməsi planlaşdırılır. Azərbaycan 2030-cu ilə qədər bərpaolunan enerji istehsalını 6 giqavata çatdırmaq üçün məqsədyönlü işlər həyata keçirir. Bu sahədə Almaniyanın yüksək texnoloji təcrübəsi və sərmayələri Azərbaycanın enerji sektorunun modernləşdirilməsində mühüm rol oynaya bilər.

Almaniya Azərbaycanın müstəqilliyini tanıyan ilk dövlətlərdən biridir. 1992-ci il yanvarın 12-də Azərbaycanın müstəqilliyini tanıyan Berlinlə Bakı arasında həmin ilin fevralın 20-də diplomatik münasibətlər qurulub. Altı ay sonra - sentyabrın 2-də Azərbaycanın Almaniyada səfirliyi, sentyabrın 22-də isə bu ölkənin Bakıda diplomatik nümayəndəliyi açılıb. Diplomatik münasibətlərin yaranmasından sonra iki ölkə arasında əlaqələr mütəmadi olaraq inkişaf edib. Xalqlarımız arasında əlaqələrin də dərin tarixi kökləri var. XIX əsrdə bir sıra alman tayfaları Azərbaycan ərazisinə köçüb, burada üzümçülüyün və şərabçılığın inkişafında mühüm rol oynayıb, eləcə də iqtisadiyyatın digər sahələrinin inkişafına böyük töhfə veriblər. Onlar Azərbaycanın siyasi həyatında da iştirak ediblər. Belə ki, Azərbaycan Xalq Cümhuriyyətinin Parlamentində milli azlıq fraksiyasının 4 üzvündən biri almanəsilli Lorentz Kuntz olub (Azərbaycanda alman icmasını təmsil edib). Hazırda da ölkəmizdə alman tarixi və mədəni irsinə böyük hörmətlə yanaşılır.

Prezident Frank-Valter Ştaynmayerin səfəri həmçinin onu sübut edir ki, Almaniya Azərbaycanı Cənubi Qafqazda vacib tərəfdaş kimi qəbul edir, ölkəmizin regionda lider mövqeyini dəstəkləyir. Almaniya Azərbaycanın beynəlxalq səviyyədə tanınmış sərhədləri daxilində suverenliyini və ərazi bütövlüyünü tam dəstəklədiyini də dəfələrlə bəyan edib. Frank-Valter Ştaynmayerin prezidentlərin mətbuata birgə bəyanatında “Biz Qarabağın Azərbaycan ərazisi olduğunu bilirik, tanıyırıq” deməsi bunun əyani sübutudur.

Prezident İlham Əliyev almaniyalı həmkarı Frank-Valter Ştaynmayeri Azərbaycan-Ermənistan sülh prosesi barədə də ətraflı məlumatlandırıb. Dövlətimizin başçısı Ermənistan ilə sülh müqaviləsinin imzalanması üçün şərtləri də açıqlayıb. Bildiyiniz kimi, İkinci Qarabağ müharibəsi başa çatandan sonra Prezident İlham Əliyev sülh danışıqlarının başlanmasının təşəbbüskarı olub. Azərbaycan lideri bu təklifi etməklə dünya tarixində ilkə imza atıb. Çünki qalib tərəfin məğlub tərəfə sülh təklifinə heç vaxt rast gəlinməyib. Bu, Azərbaycanın, onun liderinin humanistliyindən xəbər verir. Əgər Ermənistan doğurdan da sülh müqaviləsini imzalamaq istəyirsə, Azərbaycanın iki legitim şərtini qəbul etməlidir. Onlar ATƏT-in Minsk qrupu ləğv və Ermənistan konstitusiyasında dəyişiklik etməlidir. Bu halda ancaq sülh müqaviləsi imzalana bilər.

Dövlətlərarası əlaqələr təkcə iqtisadi və ekoloji sahələrdə deyil, həm də mədəniyyət, təhsil və təhlükəsizlik sahələrində davamlı inkişaf etməkdədir. Bu münasibətlərin inkişafı üçün 77 sənəd imzalanmış və bir çox əməkdaşlıq sahələrində möhkəm təməl yaradılmışdır. Almaniya-Azərbaycan yüksək səviyyəli İşçi Qrupu və Alman-Azərbaycan Xarici Ticarət Palatası qarşılıqlı ticarət və investisiya mühitini daha da inkişaf etdirməyə yönəlmiş mühüm addımlardır.

Almaniya Prezidenti Frank-Valter Ştaynmayerin bu səfəri zamanı keçirilən görüşlər, aparılan danışıqlar iki ölkə arasında münasibətlərin daha yüksək səviyyəyə qaldırılmasına əhəmiyyətli təkan verəcək, gələcək inkişaf üçün böyük perspektivlər açacaq.
Almaniya və Azərbaycan arasında inkişaf edən əlaqələr yalnız iki ölkə üçün deyil, həm də Avropa və Cənubi Qafqaz bölgəsi üçün əhəmiyyətlidir. Bu səfərlə Azərbaycan-Almaniya əlaqələri yeni bir mərhələyə qədəm qoyacaq və ikitərəfli münasibətlərin daha da möhkəmlənməsinə şərait yaradacaqdır. Bu əməkdaşlıq yalnız iqtisadi və siyasi əlaqələrə deyil, həm də beynəlxalq səviyyədə qlobal təhlükəsizliyin təmin edilməsinə mühüm töhfələr verəcəkdir.

Paylaş:

Baxılıb: 544 dəfə