Vyetnam-Azərbaycan münasibətləri dostluq və faydalı əməkdaşlıq prinsipləri üzərində inkişaf edir

Bakı:

26 °C

63 %

12 m/s

AZ RU EN

Ana səhifə / YAP xəbərləri / Vyetnam-Azərbaycan münasibətləri dostluq və faydalı əməkdaşlıq prinsipləri üzərində inkişaf edir

Vyetnam-Azərbaycan münasibətləri dostluq və faydalı əməkdaşlıq prinsipləri üzərində inkişaf edir

14.05.2025 [19:20]

Prezident İlham Əliyevin rəhbərliyi ilə Azərbaycanda həyata keçirilən xarici siyasət kursunun prioritet istiqamətlərindən biri beynəlxalq əlaqələrin inkişafı və bu çərçivədə dost ölkələrlə münasibətlərin möhkəmləndirilməsidir. Bu, dövlətimizin başçısının 22 il ərzində atdığı praqmatik addımlar və müəyyən etdiyi aydın hədəflər nəticəsində mümkün olmuşdur. Ölkəmizdə milli maraqlarımızın qorunmasına yönəlmiş uğurlu və dünya ölkələrinə nümunə olacaq xarici siyasət həyata keçirilir.

Dövlətimizin xarici siyasətində Asiya qitəsinin böyük və kiçik dövlətləri ilə ikitərəfli və çoxtərəfli əlaqələrin inkişafı əsas istiqamətlərdən birini təşkil edir. Bu baxımdan mayın 7-də Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lamın ölkəmizə səfəri də bunu bir daha təsdiqləyir.

Prezident İlham Əliyev Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lamın ölkəmizə rəsmi səfəri çərçivəsində mətbuata bəyanatla çıxış edib. Bu bəyanat Azərbaycan-Vyetnam əlaqələrinin dərinləşdirilməsi, qarşılıqlı hörmətə və faydalı əməkdaşlığa əsaslanan ikitərəfli münasibətlərin yeni mərhələyə keçidini nümayiş etdirib.

Azərbaycan və Vyetnamı birləşdirən dostluq münasibətləri uzun illərə söykənir və bu münasibətlər SSRİ dövründən başlayaraq daim qarşılıqlı anlayış və dəstək ruhunda inkişaf edib. Dövlət başçısı öz bəyanatında cənab To Lamın Azərbaycana ilk rəsmi səfərinin ikitərəfli əlaqələrin inkişafı baxımından əlamətdar hadisə olduğunu vurğulamış, ölkələrimiz arasında siyasi dialoqun möhkəm təməllər üzərində qurulduğunu qeyd edib. Prezident İlham Əliyev bildirib ki, Azərbaycan və Vyetnam arasında diplomatik münasibətlərin 30 ildən artıq tarixə malik olması əməkdaşlığın müxtəlif sahələrdə genişlənməsi üçün etibarlı zəmin yaradıb.

Azərbaycan Prezidenti qeyd edib ki, bugünkü danışıqlar zamanı enerji, kənd təsərrüfatı, informasiya texnologiyaları, təhsil və mədəniyyət sahələrində əməkdaşlığın genişləndirilməsi istiqamətində konkret razılaşmalar əldə olunub. İkitərəfli iqtisadi əməkdaşlıq üzrə hökumətlərarası komissiyanın fəaliyyəti fəallaşdırılacaq və yeni investisiya imkanlarının araşdırılması üzrə birgə işçi qruplar yaradılacaqdır.

Xüsusi olaraq dövlətimizin başçısı Azərbaycanın “Yaşıl Enerji” strategiyasına toxunaraq Vyetnamın bu sahədə təcrübəsinin ölkəmiz üçün faydalı ola biləcəyini qeyd etdi. İqlim dəyişikliklərinə qarşı birgə mübarizə, ətraf mühitin qorunması və dayanıqlı inkişaf məsələləri də tərəflərin əsas müzakirə mövzuları sırasında yer alıb.

Nəticə etibarilə diplomatik münasibətlərin 30 illiyi ərəfəsində baş tutan bu səfər ölkələrimizin qarşılıqlı etimada əsaslanan tərəfdaşlığının nə qədər dərin olduğunu bir daha təsdiq edib.

Fidan Hüseynova,

YAP Quba rayon təşkilatının sədri

Paylaş:

Baxılıb: 544 dəfə