Müstəqilliyimizin, sabitliyin və inkişafın başlanğıcı

Bakı:

25 °C

52 %

2 m/s

Əlaqə

AZ RU EN

Ana səhifə / YAP xəbərləri / Müstəqilliyimizin, sabitliyin və inkişafın başlanğıcı

Müstəqilliyimizin, sabitliyin və inkişafın başlanğıcı

04.10.2025 [12:44]

Azərbaycan xalqının Ümummilli Lideri, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin ilk dəfə Prezident seçilməsindən 32 il keçir.

1993-cü il 10 oktyabr tarixində xalqın mütləq əksəriyyətinin etimadını qazanaraq Azərbaycan Respublikasının Prezidenti seçilən Ulu Öndər andiçmə mərasimində bildirmişdi: “Mənə göstərilən bu böyük etimada görə Azərbaycan vətəndaşlarına, Azərbaycan xalqına hörmətimi, məhəbbətimi bildirir və əmin etmək istəyirəm ki, həyatımın sonuna qədər xalqıma sədaqətlə xidmət edəcək, bütün fəaliyyətimi Azərbaycan Respublikasının gələcək inkişafına sərf edəcəyəm.”

Heydər Əliyevin dövlət başçısı kimi fəaliyyətə başlaması qısa müddətdə ölkədə köklü dəyişikliklərə səbəb oldu. Azərbaycan 1969-cu ildə onun əsası qoyduğu inkişaf yoluna qayıtdı. Ulu Öndərin həyata keçirdiyi sosial-iqtisadi və siyasi tədbirlər nəticəsində nizami silahlı qüvvələr yaradıldı, torpaqlarımızın işğalının qarşısı alındı, atəşkəs əldə olundu və Azərbaycanın haqq səsi dünyaya çatdırıldı.

Yaradılmış sabitlik beynəlxalq aləmdə ölkəmizə münasibətin müsbət istiqamətdə dəyişməsinə gətirib çıxardı. İllər keçdikcə Ümummilli Liderimizin şərəfli ömür yolunun xalqımız, Türk dünyası və bəşəriyyət üçün nə qədər dəyərli olduğu daha aydın görünür. O, bütün ömrünü xalqına həsr edən, böyük dövlət xadimi və mütəfəkkir kimi tarixdə qalacaqdır.

Ulu Öndərin müəyyənləşdirdiyi strateji inkişaf kursu nəticəsində müstəqil Azərbaycan dövləti qısa müddətdə dünya dövlətləri arasında layiqli yerini tutdu, iqtisadi və siyasi əlaqələr qurdu. Heydər Əliyevin ən böyük xidmətlərindən biri bu strateji xəttin davamlılığını təmin etmək idi.

2003-cü ildə xalq qarşısında müraciət edən Ulu Öndər, İlham Əliyevi ölkəyə rəhbərlik etməyə qadir lider kimi dəyərləndirərək demişdi:
“Mən ona özüm qədər inanıram və gələcəyinə böyük ümidlər bəsləyirəm.”

Prezident İlham Əliyev bu etimadı doğruldaraq öz enerjisi, uzaqgörən siyasəti və quruculuq fəlsəfəsi ilə dövlət idarəçiliyində yeni model formalaşdırdı. Onun qəbul etdiyi fundamental qərarlar, həyata keçirdiyi sosial-iqtisadi islahatlar Heydər Əliyev kursunun müasir tələblərə uyğun şəkildə davam etdirildiyini sübut etdi.

44 günlük Vətən müharibəsində qazanılmış möhtəşəm qələbə də məhz Ulu Öndərin miras qoyduğu siyasi xəttə, Prezident İlham Əliyevin isə qətiyyətli liderliyinə əsaslandı. Azərbaycanın haqq səsi dünyada daha güclü eşidildi, ölkəmiz beynəlxalq münasibətlər sistemində nüfuzlu mövqeyə yüksəldi.

Bu gün hər bir azərbaycanlı qürur hissi ilə qeyd edir ki, dövlətimizin idarəçilik sükanı arxasında Ümummilli Lider Heydər Əliyevin yetişdirdiyi siyasi məktəbin ən layiqli davamçısı, möhtərəm Prezidentimiz İlham Əliyev dayanır. Onun dövlətçilik bacarığı və rəhbərlik qabiliyyəti sayəsində müstəqil Azərbaycan daha da güclənəcək, inkişaf və tərəqqi yolunda yeni zirvələr fəth edəcəkdir.

Fidan Hüseynova

YAP Quba rayon təşkilatının sədri

Paylaş:

Baxılıb: 772 dəfə